Angut puiguttortoq nalunaaquttap akunnerini arlalinni periarfeerunneqartoq

Emanuel Joelsen nulianilu paniminnit Qaqortumi puiguttortunut angerlarsimaffimmi sulisumit ukioq manna novembarimi sianerfigineqaramik paasivaat, Emanuelip nukaa, puiguttortuusoq, Nuummut nakorsiartussanngorlugu sapaatip akunnerani tulliuttumi aallartussanngortoq – ingiallorteqarani.

- Nuliama puiguttortut angerlarsimaffiat sianerfigaa, paasiniarlugu sooq nukara ingiallorteqarani angalasariaqarnersoq, erseqqissumilli paasitinneqarata. Nukara kisimiilluni angalasinnaasutut ingiallorteqartariaqanngitsutullu naliliiffigisimavaat, Emanuel Joelsen oqarpoq, taamatullu naliliinerat akuerisariaqarsimallugu.

Ajortumilli pisoqarpoq. Angut puiguttortoq taanna Nuummut ingerlaartilluni Narsarsuarmut aqqusaarnermini sumiissutsiminik paatsiveerusimaaqqajaavoq.

- Ikinngutitta ilaata angajora qujanartumik Narsarsuarmi naapissimagamiuk. Taanna nammineq aamma Nuuliartussaagami nukara ingiaqatigisussanngoramiuk, timmisartumut eqqortumut ikinissaa isumagisinnaasimavaa.

- Sisamat qaangilaaraa panitta sianerfigeriasaarpaatigut. Taassuma politiit sinersimanerarpai, politiillu oqarlutik namminneq portørillu nukara tammaasimagaat. Tupattorujussuuvugut, Emanuel Joelsen oqaluttuarpoq.

Asseq ujaasinermi atugassaq

Nalunaaquttap akunnerata ataatsip missaa qaangiuttoq, Emanuelip nukaata aappaa sianerpoq. Taanna politiinit sianerfigineqarsimavoq, taakku angutip puiguttortup assinga Facebookikkut ujaasinerminni atorusuppaat. Emanuelip nukkami assingi marluk pitsaanerit politiinut nassiuppai, allanilli susoqarani.

- Unnukkut nalunaaqutaq arfineq-pingasut eqqaani Facebookikkut nammineq ujarniarlugu aalajangiupparput. Ikinngutittalu arlallit Nuummi biilerlutik ujaraat, iluatsitsinatilli. Bussinik ingerlatitsisup nanivaa.

- Bussinik ingerlatitsisup ujaasineq Facebookimi takusimagamiuk, ingerlaartillunilu aqqutaani angut qasoqqarpasissorujussuaq takugamiuk paasivaa taanna tassaasoq ujaarineqartoq.

Unnukkut qulingiluat qaangereeraa angut puiguttortoq ujaarineqartoq bussinit ikineqarpoq. Tamatuma kingorna bussertitsisup portørit sianerfigai angullu aaneqaqqullugu.

- Panitta ikinngutaata ujaasineq aamma takusimagamiuk, nukaralu bussinut ilaasoq naapissimallugu. Taassuma ingerlaannarluni panipput sianerfigisimavaa, oqarfigalugulu nukara bussini naapissimallugu, oqaluttuarpoq.

Tatineqartorujussuusut

Nukkami tammaaneqarneranut atatillugu tatineqarnerat sakkortoqaaq.

- Sakkortoqaaq. Isumaaluttorujussuugatta, eqqarsarlutalu sumiissimassanersoq qanorlu issimassanersoq, Emanuel Joelsen oqarpoq, nangillunilu:

- Nukara bussinik ingerlatitsisartumit ikineqarami qiiasorujussuuvoq kaattorujussuullunilu.

Angut puiguttortoq nalunaaquttap-akunnerini arfinilingajanni tammaaneqareerluni napparsimmavissuarmut apuunneqarpoq nakorsamillu misissorneqarluni.

Emanuel AG-mit oqaloqatigineqarami misigissutsimigut attortisimasorujussuuvoq. Misigissutsini aqussinnaajumallugit, arlaleriarluni itisuumik anersaartortarpoq nipaalu sajulluni.

- Ataasinngorninngormat nukkama kommunimi sullissisuanut sianerpunga. Kommunimi sullissisup pisoq ajuusaarutigisorujussuuaa, oqarlunilu taama pisoqarsimasussaanngikkaluartoq.

Oqarfigivara, suliap malersoqqinnissaanut sullissisussatsinnik ujaasiniarlunga.

Emanuel Joelsenip nukaa Qaqortumut maanna utereersimalerpoq, peqqissusiali pitsaavallaarani.

- Nukara angerlamut angalanermini ingiaqateqartinneqartoq napparsimasorujussuuvoq ajorsiartuinnavillunilu. Puammigut kræfteqarpoq, nappaataatalu siaruarsimanera pissutigalugu ikiorneqarsinnaanani, taamaattumik sapaatip akunnerini pingasuni najorniassagatsigu inimik attartorluta, Emanuel Joelsen naggasiivoq.

Allaaserisanik tunniussivissaq nallertinnagu peqqissutsimik isumaginnittunit akissutissarsisinnaasimanngilagut.