Angut qaartorumeerinissamik sioorasaarisoq iperagaasoq - Nuummi qoorortuumik eqqartoqartoq

Sisimiuni mittarfimmi qaartartumeerinissamik siorasaarisoqarnera pissutigalugu inuit qimagussortinneqartut politiit pingasunngornermi ualikkut nalunaarutigaat.

Angut sioorasaarisutut pasineqartoq mittarfimmiit ingerlasimavoq, taannalu illoqarfimmi najukkami kingusinnerusukkut tigusarineqarsimaosq pigaartut pisortaata Poul Kreutzmannip oqaatigaa.

Angut eqqartuussivilersuunneqarsinnaavoq, pigaartullu pisortaata mittarfinnik atuisunut tamanut ima kajumissaarivoq:

- Oqaaseq "qaartartoq" mittarfimmi atorneqartussaanngilaq. Pimoorullugu iliuuseqarfigisarparput, arlaannaalluunniit oqarpat aalajangersimasumik suleriuseq aallartinneqartarpoq. Taamaammat oqaatigineqartussanngilaq, pigaartut pisortaat oqarpoq.

Politiit qaammatini kingullerni arlaleriarlutik qaartartumeerinissamik siorasaarisoqarsimaneranik nalunaarfigineqartarput, ilaatigut Nuummi mittarfimmi. Nalunaarutiginnittoqaraangat mittarfimmiit aamma qimagussortitsisoqartarpoq.

Nuummi qoorortuuaqqamik eqqartoqartoq

Sisimiut mittarfiani sioorasaarinerup saniatigut politiit pingasunngornermi unnukkut nalunaaqutaq 20.20 Nuummi eqqartoqarneranik nalunaarfigineqarput.

Politiit sumiiffimmut, Saqqarliit aqquserngata eqqaani sissamut, biilerlutik ornigupput.

Tassani inuit arlallit naapinneqarput, qoorortuuaqqamillu nakatartigani eqqarsarluaqqaartoqartarnissaa pigaartut pisortaata tassani aamma kajumissaarutigaa:

- Illoqarfiimmiit inoqarfiusumiillu 500 meterisut ungasitsigisumi nakatarneq inerteqqutaavoq, aamma Nuup eqqaani nunami inunnik angalaarfigineqarluartartumi.

- Illoqarfik qimallugu, immaqa asimut allamulluunniit isumannaatsumik pisinnaasumut, angallammik aallariarluni taamaaliortoqaruni pitsaaneruvoq, Poul Kreutzmann oqarpoq.