Angut Sisimiuni qaqqamut pisutsilluni ajunaartoq
Politiit Sisimiuni angummik toqusoqarneranik misissuipput. Angut nunamit allameersuuvoq, politiillu takornariaasoq ilimagaat.
Assi: Oscar Scott Carl
Sisimiuni ajutoortoqarnera Kalaallit Nunaanni Politiit misissuiffigaat.
Angut qaqqami pisuttuartilluni nakkarsimasoq, nakkarnermilu kingunerisaanik toqusimasoq misissueqqissaarnerit siulliit takutippaat.
- Angut nunanit allaneersutut isikkoqartoq misissuinerit siulliit takutippaat. Sumiiffimmi tassani maqaasineqartunik nalunaaruteqartoqarsimanngilaq. Taamaammat ajunaartoq takornariaassangatinneqarpoq. Tamannali suli misissorparput, taamaammallu suli uppernarsarneqanngilaq, Kalaallit Nunaanni Politiini pigaartut pisortaat Poul Kreutzmann oqarpoq.
Toqungasumik nassaartoqarnera ataasinngornermi unnukkut nalunaaqutaq 19.43 qamuteralannik angalasunit politiinut nalunaarutigineqarpoq, taakkualu aallaqqaammut pigisat qimatat pillugit nalunaarput. Kinguninngua inuit taakkorpiaat pigisat qimatat eqqaanni angummik toqungasumik nassaarsimallutik politiinut nalunaarput.
Innuttaasut angutip sumiinneranik kinaaneranillu ilisimasaqarsinnaasut Sisimiuni politiinut saaffiginniqqullugit imaluunniit Kalaallit Nunaanni Politiinut oqarasuaat 70 14 48-mut sianeqqullugit pigaartut pisortaata kajumissaarpai.
Imigassartorsimalluni biilertoq unitsinneqartoq
Sisimiuni politiit biili imigassartorsimalluni aquttoq aamma marlunngornerup unnuaani unitsippaat.
- Angut 30-t sinnerlugit ukiulik tigusarineqarpoq, eqqartuussivimmilu suliaq ingerlateqqinneqassaaq, Poul Kreutzmann oqaluttuarpoq.
Politiit Maniitsumi Pisiffimmi tillinniartoqarneranik misissuipput. Tassani tillinniartoqarsimanera marlunngornermi ullaakkut nalunaarutigineqartoq pigaartut pisortaat oqaluttuarpoq.
- Aamma innuttaasut Maniitsumi Pisiffiup eqqaani pasinartumik takusimagunik Maniitsup politeeqarfianut imaluunniit pigaartut oqarasuaataannut 70 14 48-mut saaffiginneqqullugit kajumissaarpagut, pigaartut pisortaat oqarpoq.
