Angutinik maqaasineqartunik marlunnik ujaasineq unitsinneqarpoq

Angutinik marlunnik sapaatip akunnerani uani pingasunngornermi maqaasineqartutut nalunaarutigineqartunik ujarlerneq ajoraluartumik kinguneqanngilaq, oqartussallu arfininngornermi annaassiniarnermik unitsitsinissaq aalajangiuppaat.

Taama Kalaallit Nunaanni Politiit arfininngornermi unnukkut tusagassiuutinut nalunaarumminni allapput.

- SAR-mik upalungaarsimasut suleqatigalugit imaanit silaannarmillu ujarlerfigineqarsinnaasut tamaasa ujarlerfigaagut. Ajoraluartumillu sineriammi ajornakusoortumi ulluni arlalinni ujarlerneq kinguneqanngilaq, taamaammallu ujarlernerup ingerlanneqartup unitsinnissaa pillugu aalajangiineq oqimaatsumik aalajangertariaqarput, vicepolitiinspektør Allan Bredahl oqarpoq.

Kalaallit Nunaanni Politiit SAR-imik upalungaarsimasut, tassani Issittumi Sakkutooqarfik, isumasioqatigalugit ujarlernermik pingasunngormalli ingerlanneqartumik unitsitsinissamik aalajangerput.

Angutit pingasut pingasunngormat ullup qeqqata missaani maqaasineqartutut nalunaarutigineqarput. Angutit aavariarnerminnit utersimanngillat, SAR-illu annaassiniarneq nalunaarutiginninnerup kinguninngua aallartinneqarpoq.

Pingasunngormat unnukkut arfineq marluk missaani angutit pingasut ilaat ataaseq Paamiut Arsuullu akornanni Sermiligaarsummi illuaqqami nassaarineqarpoq.

Innuttaasup illuaraq alakkarlugu angut nassaaraa. Pineqartoq kingorna Nuummi Dronning Ingridip Napparsimavissuanut ingerlanneqarpoq, tassanilu angut nakorsanit misissorneqartoq, politiit ilisimatitsipput.

Pingasuullutik umiatsiamik ingerlanerminni kassumut apornermik kingorna imaanut nakkarsimallutik nassuiaatigigaa, politiit siusinnerusukkut oqaluttuaraat.

Pingasunngornermi unnukkut angutit pingasut umiatsiaat Sermiligaarsuup kangerluani imaani nassaarineqarpoq.

- Angallatit helikopterillu ujarlernermi akuutinneqarput, soorluttaaq politiit inuit maqaasineqartut pillugit paasissutissat tigusatik, taakku nassaarineqarnissaannut ilapittuisinnaasut, tamakkerlugit misissorpaat, Kalaallit Nunaani Politiit ujarlerneq annertooq ingerlanneqarsimasoq pillugu allapput.

Ujarlernerup unitsinneqarneranik inuit maqaasineqartut ilaqutaat kalerrinneqarput.