Angutit marluk pineqaatissinneqarput: Hashi 93 kiilunik oqimaassusilik kilisaammut toqqorlugu, Kalaallit Nunaannut anngiortumik eqqusseriaraluartut

Kilisaammi Kalaallit Nunaannut ingerlaartussami, ilanngaaserisut ikiaroornartumik hashimik 93 kilomik oqimaassusilimmik sisamanngormat nassaarnerisa kingorna, angutit marluk Hjørringimi eqqartuussivimmi tallimanngormat pigasuartumik pineqaatissinneqarput.

Tamanna TV2 Nord-imi allaaserineqarpoq.

Angutit marluk tallimanngormat ullaap tungaani killisiorneqarput. Angutip 26-nik ukiullip hashi 22,2 kilo Kalaallit Nunaannut eqqutissallugu, nassuerutigaa.

Hashi annertungaatsiartoq Hirtshalsip umiarsualiviani, ilanngaaserisut ileqquusumik nakkutilliinerannut atatillugu sisamanngornermi ualikkut nassaarineqartoq, Jyllandip avannaani politiit tusagassiutitigut nalunaarummi allapput.

Kilisaammi 22,2 kilonik ilanngaaserisut nassaarput, tamatuma kingorna Jyllandip avannaani politiit aggersarneqarput, umiarsuarlu misissoqqissaarneqarpoq:

"Misissueqqissaartartutta umiarsuaq tamaat unnuap ingerlanerani ullaaq ilanngullugu misissuiffigaat, umiarsuarmilu hashimik 71 kiilut sinnerlugit oqimaassusilimmik nassaarfigaat. Angutit marluk anngiortumik eqqusseriarnertik nassuerutigaat, ataatsimuunngillalli. Taamaattumillu suliat marluk immikkut suliarineqarput, Hjørringimilu eqqartuussivimmi marlunnik ullumikkut sassartitsisoqarluni", politikommissær Kasper Brix Jyllandip avannaani politiinit oqarpoq.

Paarnaarussaasussanngorlugit pineqaatissinneqartut

Pinerluttut marluk inatsit tunngaviusoq naapertorlugu killisiuinermi, danskit nalunaaqutaat malillugu 11:00 pineqaatissinneqarput.

Angut 26-nik ukiulik nassuernera tunngavigalugu pineqaatissinneqarpoq. Taanna hashimik 22,2 kilonik oqimaassusilimmik Kalaallit Nunaanni tuniniarneqaqqittussamik tigummiaqartut pineqaatissinneqarpoq.

Pillaatisinissaa kingusinnerusukkut isumaqatigiissutigineqarmat, angut taanna iperagaavoq.

Angut 45-nik ukiulik hashimik 71 kilomik oqimaassusilimmik Kalaallit Nunaanni tuniniarneqaqqittussamik siunertaqarluni tigummiaqarsimanini pillugu nassueruteqartoq, ukiumik ataatsimik affarmillu parnaarussaasussatut kingorna eqqartuunneqarpoq.

"Pineqaatissinneqartut taakkua marluk, ikiaroornartut qanoq annertutigisut tgummiarnerat assigiinngilluinnarput, eqqartuussutip saqqummiunneqarnerata kingorna, 45-nik ukiullip parnaarussaaginnarnissaanik piumasaqarnitsinnit, tamanna aamma erserpoq“ Jyllandip avannaani politiini unnerluussisussaatitaasoq Julie Lauesen oqarpoq.

Jyllandip avannaani politiit naapertorlugit pineqartut marluk assingusumik pinerluttuliorsimasutut siornatigut pineqaatissinneqarsimanngillat.