Aningaasanut inatsisissami Greenland Airports-imut aningaasanik amerlanerusunik illuartitsisoqartoq

Greenland Airports Regional 2027-miit ukiumut 119 millioner koruuninik amerlanerusunik aningaasanik pissarsisalissaaq.

Qaqortumi mittarfik upernaaq manna ammarneqarpoq. Tassunga atatillugu Naalakkersuisut Inatsisartunut qinnuiginnipput aningaasanut inatsimmi 2027-moortumi 250 millioner koruuninik mittarfimmut tassunga illuartitsisoqassasoq.
Saqqummersinneqarpoq

Sapaatip akunnerata siuliani Greenland Airports uppernarsaavoq, nunanut allanut angalasartunut akigititat malunnaatilimmik qaffanneqassasut januaarip aallaqqaataani 2027-miit atuutilersumik, taamaaliornissamut pissutaatinneqarpoq nunat tamalaat akornanni mittarfiliarineqarsimasut ingerlannissaat naatsorsuutigisamit akisunerusimanera.

Aappaagumut aningaasanut inatsisissatut siunnersuut ataasinngornermi inaarutaasumik suliarineqartussaavoq, tassanilu Greenland Airportsimut aningaasaliissutaareersut qaavisigut aningaasaleeqqinnissaq siunertarineqarpoq.

Taamaalillutik Naalakkersuisut aammalu Inatsisartuni amerlanerussuteqartut Greenland Airports Regional-imik taaguutilimmut ukiumut tapiissutitut aningaasaliissutigineqartartut qaffanneqarnissaat qulakkiissavaat.

Ingerlatseqatigiiffik tamakkiisumik namminersorlutik oqartussanit pigineqarpoq taassumalu ingerlatarai Nuup Ilulissallu avataaniittut mittarfiit allat tamaasa, taannalu pigineqarpoq Greenland Airports Internationalimit, danskinit aamma piginneqataaffigineqartumit.

24 millioner koruuninik qaffanneqassapput

Greenland Airports Regional-imut tapiissutit 2027-miit ukiumut 24 milioner koruuninik ukiumut qaffanneqassapput, taamaalilluni katillugit ukiumut 119,4 millioner koruuninik tapiissutitigut aningaasaliisoqartalissalluni.

Aningaasaliissutit tapertaassapput ingerlatsinermut, aserfallatsaaliinermut, iluarsagassat kinguaattoorutaasimasut angummaffiginiarnissaannut kiisalu nunap immikkoortuini suluusalinnut qulimiguulinnullu mittarfinnut aningaasaleeqqinnissamut atorneqassallutik, taamak aningaasanut inatsisissap paasissutissartaani allassimasoqarpoq.

Paasissutissani aamma erserpoq, Greenland Airports-ip niuernermut nunap immikkoortuini Regionalini pilersaarutaa nutarterneqaqqammertoq naapertorlugu piffissami 2026-2035-mi amerlanerusunik aningaasaliisoqaqqinnissaa pisariaqartinneqavittoq.

– Niuernermut pilersaarut naapertorlugu aningaasaliisoqaqqittoqarnissaanik pisariaqartitsineq 500 millioner koruunit missaannik 2026-2035-mi annertussuseqartoq. Aningaasaliissutini pineqartuni ilaanngillat Upernavimmi, Sisimiuni, Aasianni, Maniitsumi, Paamiuni mittarfiup nutaamik asfaltilersorneqarnissaa aamma ilaanngillat Narsarsuarmi Kangerlussuarmilu aningaasaliissutissat, Naalakkersuisut allapput.

100 millioner koruunit siuartinneqartut

Nunanut allanut angalasartut akiliutaasa qaffanneqarnerata saniatigut aammalui Greenland Airports Regionalimut aningaasanik tapiissuteqartarnerup saniatigut, Greenland Airports Regionalimut 2028-mi tapiissutissat ilaat 100 millioner koruunit 2027-mut siuartinneqarput. Aningaasat pineqartut Qaqortumi mittarfimmut atugassatut illuartinneqarnikuupput.

Pilersaarutaaqqaaraluarpoq Qaqortumi mittarfiup naammassillugu suliarineqarnissaa 2027-mi aamma 2028-mi ingerlanneqassasoq, tamannali allanngortinneqarpoq aningaasanut inatsisissap pingajussaaneerneqarnissaanut Naalakkersuisut allannguutissatut siunnersuutaanni, taamaalilluni aningaasartuutaasussat, 250 millioner koruuninik aningaasartaqartut 2027-mi ataatsikkut tunniunneqartussanngortinneqarput.

Sermitsiami siusinnerusukkut oqaluttuarisinnaanikuuarput, aningaasat 180 millioner koruunit tapiissutineersut sanaartornermi akiitsorilersimasat matussuserneqarnissaannut atugassiissutigineqartussanngortut.

Powered by Labrador CMS