Aningaasanut inatsisissatut siunnersuut: Ilulissani inuussutissarsiornermik ilinniarfimmut nutaamut millionit, akileraartarnermullu aaqqissuussaaneq ajuloornissaaniit annaanneqassaaq

Naalakkersuisut 2027-mut aningaasanut inatsisissatut siunnersuut sisamanngornermi ullup-qeqqata siorna saqqummiuppaat, kisitsisillu pingaarnerit aallarniutigalugit ukiut tulliuttut marluk amigartooruteqalaarnissaq naatsorsuutigineqarpoq, tamatumalu kingorna 2029-mi aamma 2030-mi sinneqartoortoqarnissaq naatsorsuutaalluni.

Aningaasartuutit isertitallu uani ataani takuneqarsinnaapput, DA-p inernera 2027-mi qiviassagaanni, naatsorsuutigineqarpoq 1 milliard koruuninik amigartooruteqartoqassasoq.

Aningaasanut inatsisissami aningaasartuutit amerlanersaat inatsisitigut aalajangersarneqartarput, taamaattumillu politikerinit siunersuutigineqartut aningaasalersorneqarnissaanut aningaasat immikkoortinneqarsinnaasut ikinnerusarput.

Siunnersuummi nutaarsiassat pingaarnerit ilagaat Naalakkersuisut Ilulissani inuussutissarsiornermik ilinniarfimmik ilinniarnertuunngorniarfiusumik ukiumut 20,5 million koruuninik aningaasaliissuteqartarnissamik siunnersuuteqarnerat.

Inuussutissarsiornermik ilinniarfik nutaaq pingaartinneqartoq Naalakkersuisut allapput, nunap immikkoortuani periarfissaqarluartumi inuussutissarsiornermut tunngasunik ilinniagaqarneq, ilinniartitaaneq najukkamilu ilinniarfiit nukittorsarneqarnissaat siunertaralugu.

Ilinniartitaanerup nukittorsarnissaanut Tasiilami ilinniarfimmik pilersitsinissamik Naalakkersuisut aamma suliniuteqarput. Ilinniarfik 2027-mi pilersinneqarpat 10,8 mio. kr.-nik aningaasaliiffigineqassaaq tamatumalu kingorna ukiumut 1,8 mio. kr.-nut aningaasaliissutaasartut ikilisinneqassallutik.

Ilinniarfimmut aningaasaliissutit Naalakkersuisut suliniutinik nutaanik immikkoortitsineranni takuneqarsinnaapput. Aamma Naalakkersuisut pingaarnersiuinerisa ilaat alla, tassa innarluutilinnut suliassaqarfiup nukittorsarneqarnissaa, tamatumani ersersinneqarpoq.

Innarluutillit pillugit inatsit nutaaq atuutilersinniarneqarpoq, kommunillu inatsisip nutaap malinnissaanut tapiissutinik amerlanerusunik tunineqassapput.

– Tamatuma siunertaraa innuttaasut inatsiseqartitsinermi innarlitsaalineqarnissaasa nukittorsarnissaat, kommunit akornanni sullissinerup assigiinnerulernissaa aamma innuttaasut ilaqutariillu tapersersorneqarnissamut pitsaanerusumik periarfissaqarnissaat, Naalakkersuisut aningaasanut inatsisissatut siunnersuummi allapput.

Naalakkersuisut nunanut allanut tunngasunut ukiumut 7,5 million koruuninik aningaasaliissuteqarusupput. Aningaasat nunanut allanut naalakkersuisoqarfimmi, Washington D.C-mi Bruxellesimilu sinniisoqarfinnik Issittumilu Siunnersuisooqatigiinni suliniuteqarnermut nukittorsaataassapput.

Siunertaavoq Kalaallit Nunaata nammineq soqutigisani suli annertunerusumik sulissutigisinnaalissagai, Naalakkersuisut allapput.

Suliniutit nutaat ilagaat akileraarutinut tunngasunik qarasaasiakkut ingerlatsivimmut aningaasaliisoqarnissaa. 105 millionit koruunit immikkoortinneqarput, Akileraartarnermut Aqutsisoqarfimmi maannakkut atortorissaarutigineqartut ukiualuillu qaangiuppata atorsinnaajunnaartussaaneri pissutigalugit.

Naatsorsuutigineqarpoq 2030-mi atortorissaarutit nutaat atorneqalernissaat.