Aningaasanut inatsit ataasinngornermi saqqummiunneqassaaq

Aningaasaqarnermut Naalakkersuisoq Múte B. Egede (IA) 2026-mut aningaasanut inatsit pillugu tusagassiortunik katersortitsinissaminut aggersaavoq.

Aningaasaqarnermut Naalakkersuisup, Múte B. Egedep (IA), ataasinngornermi 2026-mut aningaasanut inatsit pillugu politikkikkut isumaqatigiissut saqqummiutissavaa.

Assi: Jensine Berthelsen

Thomas Munk Veirum Thomas Munk Veirum Tusagassiortoq

Saqqummersinneqarpoq 10. Novembari 2025 - 08:47

Naalakkersuisut Inatsisartuni amerlanerussuteqarlutik aappaagumut aningaasanut inatsisissaq isumaqatigiissuteqarfigaat, ataasinngornermilu saqqummiunneqassaaq.

AAMMA ATUARUK

Aningaasanut inatsisissaq pillugu Naalakkersuisooqatigiinni isumaqatigiinneq annertooq

Aningaasaqarnermut Naalakkersuisoq, Múte B. Egede (IA), 2026-mut aningaasanut inatsit pillugu politikkikkut isumaqatigiissut, tusagassiortunik katersortitsinissamut nalunaaqutaq qulinut qaaqqusivoq.

Partiit sorliit isumaqatigiissummut peqataanersut oqaatigineqanngilaq, maannamulli illuatungiliuttut partiiat Naleraq kisiartaallutik isumaqatiginninniarnermiit aninikuunerat ilisimaneqarpoq.

Ussassaarut

Taamaalilluni partiit naalakkersuisooqatigiit Demokraatit, Siumup, Inuit Ataqatigiit aamma Atassutip akornanni siammasissumik isumaqatigiittoqarnilersaarpoq.

Naalakkersuisut nutaat aggustimi aningaasanut inatsisissatut siunnersuutertik saqqummiuppaat, tassanilu neriuutaarutsitsisumik sipaarniuteqangaartiartariaqarnermik oqariartuuteqarput.

Aningaasatigut ajornartorsiorneq pissutigalugu Naalakkersuisut sipaarniuteqarnissamik pilersaaruteqarput, Namminersorlutillu Oqartussat aningaasaqarniarnerat ataqatigiissarumallugu ukiuni sisamani tulliuttuni sipaarniuteqarneq isertitanillu nutaanik nassaarniarnissaq aqqutigalugu 864 millionit koruunit sinnerlugit pissarsiniarlutik.