Nukappissat marluk 15-inik aamma 16-inik ukiullit Qeqertarsuarmi Uunartuarsuup qaqqaani qamuteralallutik qaarsumit sapaammi februaarip aallaqqaataani nakkarlutik ajutoorput.
Inuusuttut aappaata ilaqutai taakku qamuteralallutik aallaramik suli angerlarsimanngitsut unnukkut Facebookikkut nalunaarutigaat, tamatumalu kingorna Qeqertarsuarmi Politiit illoqarfimmiullu arlallit ingerlaannaq qamuteralannik ujaasilerput.
Nukappissat marluk 15-inik aamma 16-inik ukiullit Qeqertarsuarmi Uunartuarsuup qaqqaani qamuteralallutik qaarsumit sapaammi februaarip aallaqqaataani nakkarlutik ajutoorput.
Inuusuttut aappaata ilaqutai taakku qamuteralallutik aallaramik suli angerlarsimanngitsut unnukkut Facebookikkut nalunaarutigaat, tamatumalu kingorna Qeqertarsuarmi Politiit illoqarfimmiullu arlallit ingerlaannaq qamuteralannik ujaasilerput.
Taarsereerpoq, anorlertorujussuulluni nittaallunilu, tamannalu ujaasisunut ajornakusoortitsilluni.
Nukappiaqqat ajoqusersimasut ilisimajunnaarsimasullu nalunaaquttap-akunneri arlallit ujaasinerup kingorna unnuap qeqqa sioqqutitsiarlugu nassaarineqarput. Nukappiaqqap aappaa qeritsitersimavoq, annaassiniartartunillu ajutoortunut siulliullutik apuuttunit napparsimmavimmukaanneqarluni.
Qamuteralannik kalittaatilinnik angutip inuusuttup aappaa aaneqarpoq, taannalu nalunaaquttap-akunnerata affaa qaangiummat napparsimmaviliaanneqarpoq.
Napparsimmavimmi marluullutik peruluttut paasineqarpoq, ilaatigut niaqqumikkut ajoquserujussuarsimallutik. Angut inuusuttoq annertuumik ajoqusersimasup ataataa ikinngutaatalu ujaasinermut peqataasut siulliullutik napparsimavimmut apuuttut, napparsimmaviup matoqqasup silataani isersinnaanatik minutsit 30-t tungaanut utaqqisariaqarsimapput.
Sermitsiap inuusuttut marluk ajutoortut angajoqqaavi oqaloqatigai, taakkualu napparsimmavimmi pissutsit ernumanartutut akuerineqarsinnaanngitsutullu isigaat.
Inuusuttut taakku marluk Nuummut aallarunneqarput, aappaalu Københavnimi Rigshospitalimut ingerlateqqinneqarluni.
30 minutsit angullugit utaqqisut
Illoqarfinni nunaqarfinnilu 1600-nit ikinnerusunik inoqartuni napparsimmaviit nalunaaqutaq sisamat kingorna matuneqartassasut Peqqinnissaqarfimmit aalajangerneqarnikuuvoq, Qeqertarsuarmilu peqqinnissaqarfimmut tamanna atuulluni. Tassanimi innuttaasut 800-t sinneqalaarput.
Aalajangerneq taanna Qeqertarsuarmiunit ernumagineqarluni ukiaq akerliussutsimik takutitsiffigineqarnikuuvoq.
Hanseeraq Olsen, angutip inuusuttup 15-inik ukiullip ataataa, ajutoorfimmut siulliulluni apuuppoq ujaasisullu sinneri sumiiffimmukartillugit. Taassuma erneratalu ikinngutaata ajutoortoq qamuteralannik peqqissaavimmukaappaat, tupaallaatigeqisaannullu peqqissaavik matoqqasoq paasillugu.
- Nukappiaqqat nassaarigakkit ilisimanngillat. Ajutoornermi qanoq ajoqusersimanersut naluara. Kinguninngua ujaaseqataasut allat takkupput, ernerma ikinngutaa ernera ikiorsiullugu ernera qamuteralannut ikiteriarlugu napparsimmavimmut aallarupparput. Ujaaseqataasut politiillu angut inuusuttup aappaa ikioraat taamaaliorpugut, oqaluttuarpoq.
- Matumut kasuttorpunga sianerlu toortarlugu, inuilli inissiamit anisut oqarfigivakka peqqinnissaqarfimmut ingerlaannaq sianeqqullugit.
- Tamatuma kinguninngua Qeqertarsuarmi politiinit sianerfigineqarpunga, nassuiaapparalu peqqissaavik matoqqasoq. Qeqertarsuarmi nakorsaq toqqaannartumik sianerfigissallugu oqarput. Aasiannili napparsimmavimmut sianeqquneqarsimasullutik, taakkualu Qeqertarsuarmi pigaartoq sianerfigissagaat paasitippaannga, Hanseeraq Olsen oqarpoq.
Annaassiniartartut allat angut inuusuttoq nassarlugu napparsimmavimmut apuupput. Hanseeraq Olsen, ernera aqqunartitersimasoq ikinngutaatalu peqqinnissaqarfimmi sulisut takkunnissaat utaqqillugit napparsimaviup suli silataaniipput. Napparsimaveqarfimmi sulisut kinguninngua takkupput ingerlaannarlu matu ammarlugu.
Ernumanartoq akuerineqarsinnaanngitsorlu
Hanseeraq Olsen inuusuttut marluk taakkua navianartorsiortut annaassiniartartullu sulisunit peqqissaaviullu ammarnissaanut taama sivisutigisumik utaqqisariaqarsimanerat alianartoq isumaqarpoq.
- Kiisami matu ammarneqarmat akiutit qungatsimullu qerattaqqutit nassaariniarnerat ajornakusoorpoq. Erneralu passunneqarsinnaaqqullugu napparsimavimmut nammineerluta eqquttariaqarsimavarput.
- Qeqertarsuarmi peqqissaavimmi ammasarfiit allanngortinneqarnerat ernumanartorujussuuvoq akuerineqarsinnaananilu, oqarpoq.
Hanseeraq Olsenip ernera Københavnimi Rigshospitalimi maanna katsorsarneqarpoq.
Iliuusissaarunneq
Bea Thorleifsen 16-inik ukiulimmut anaanaasoq napparsimaviullu akiani najugaqartoq, peqqissaavimmi pissutsit aamma ernummatigai. Annaassiniartut siulliit napparsimavimmut apuummata ingerlaannaq Aasianni napparsimmavimmut sianerpoq. Qallunaatut oqaluttup oqarasuaat tiguaa taassumalu iluamik paasisinnaanagu, taamaattumik kalaallisut oqaluttumik oqaloqateqarumalluni.
- Pissutsit ilungersunartuunerat nassuiaappara, minutsilli 15-it missaat qaangiuttut suli sulisut takkutinngimmata, nammineq qipivut atorlugit aqqunartitersimasumut siullermut qeritsissimasumut oqorsaasiuppagut.
- Taava peqqissaasoq qanitatsinni najugalik ornippara matumullu kasuttorlunga, tassani paasivara aniniarluni pikisoq.
- Matut ammarneqarnissaannut minutsit 30-t missaat ingerlapput. Iliuusissaaruttutut misigaanga, isumaqaleraluarpungalu aqqunartitsersimasoq siulleq napparsimaviup silataaniittoq annaassallutigut.
Bea Thorleifsenip Hanseerallu Olsenip ernermik napparsimaviliaanneqareernerata kingorna pisariaqartitaannik pitsaasumik isumagineqarnerat qujamasuutigaat.
Sillimasut piareersimasut
Bodil Jensenip, Kalaallit Nunaanni Peqqinnissaqarfimmi attaveqaqatigiinnermut siunnersorti, Qeqertarsuarmi innuttaasut ulloq unnuarlu peqqinnissaqarfimmut attaveqarsinnaanerat ilisimatitsissutigaa.
- Qeqertarsuarmi oqarasuaat ukiorpassuarni nal. 16.00-miit 08.00-ip tungaanut aamma sapaatip-akunnerisa naanerini Aasiaat napparsimmaviannut ingerlateqqinneqartarput. Pinartunik pisoqartillugu Aasiaat napparsimavianiit Qeqertarsuarmi sillimasoq attavigissavaat, taamaasillunilu nakorsiartoq isumagineqassalluni.
- Napparsimasoq perululluni napparsimalerpat Aasiannut imaluunniit Dronning Ingridip Napparsimmavissuanut aallartinneqartussaavoq, katsorsarneqarnissaq qanoq pinartiginera apeqqutaalluni, oqarpoq.
Bodil Jensenip Qeqertarsuarmi peqqissaavimmi sulisunik piareersimasoqartuaannartoq, sianerfigineqaraangamillu piaartumik suliartorsinnaasut naqissuserpaa.
- Qeqertarsuarmi februaarip aallaqqaataata aappaatalu akornanni unnuami qamuteralannik ajutoornermut atatillugu Aasianni peqqinnissaqarfik inuk ajoqusersimasoq Qeqertarsuup peqqissaavianukaanneqarsimasoq unnuap qeqqata missaani kalerrinneqarpoq.
- Aasiaat napparsimmavianiit Qeqertarsuarmi sulisut sianerfigineqarput, paasissutissaatigullu naapertorlugit siulleq nalunaaqutaq 00.10 missaani peqqissaavimmut apuussimavoq peqqissaavillu ammarlugu. Sulisut allat nalunaaqutaq 00.14 sianerfigineqarput ingerlaannarlu peqqissaavimmukartinneqarlutik, taanna oqarpoq.
Bodil Jensen inuit marluk aqqunarsimasut Qeqertarsuarmi peqqissaavimmi isumagineqartut ataasinngornerullu ingerlanerani Nuummi napparsimmaviliaanneqartut nassuiaavoq.
