Arctic Hubip siulersuisuini ilaasortat nutaat marluk toqqarneqartut

Arctic Hub Kalaallit Nunaata Danmarkillu akornanni ataatsimoorussamik ilisimatusarnermut, ilinniartitaanermut, nutaaliornermut, inuussutissarsiutilinnut, eqqaanilu inuiaqatigiinnut ataatsimoorfissatut suliniutaasoq nutaanik siulersuisoqalerpoq.

Avatangiisinut, pinngortitamut, nukissiuutinut, ilisimatusarnermullu naalakkersuisoq Jørgen Rosbach (D) suliassaqarfinnik allannguineq pissutigalugu, ilaasortamillu tunuartoqarmat Arctic Hubip siulersuisuini ilaasortanik nutaanik marlunnik toqqaavoq.

Naalakkersuisut tusagassiuutitigut nalunaarutigaat.

- Arctic Hub-ip qanimut suleqatigilluarnissaa ilisimatusarnermut naalakkersuisunngorlaatut qilanaaraara. Kalaallit Nunaanni ilisimatusarnermut, ataatsimullu isigalugu inuiaqatigiinnut Arctic Hub qitiusumik, nalituumillu tapersiissuteqartarpoq. Siulersuisuni sulineq tamakkiisumik ingerlaqqissinnaaniassammat, ilaasortat tamakkernissaat sivisujunnaarmat pitsaavoq, Jørgen Rosbach oqarpoq.

Siulittaasoqarfik Kalaallit Nunaata aamma Danmarkip akornanni ukiut pingasukkaarlugit paarlakaanneqartarpoq. Siulittaasoqarfik Kalaallit Nunaata juulip 15-iani 2024-miit, 2027-mi marsip aallaqqaataata tungaanut tigummivaa.

Kalaallit Nunaannit ilaasortassatut toqqarneqartut tassaapput:

• Natuk Lund Meire, Avatangiisinut, Pinngortitamut, Nukissiuutinut, Ilisimatusarnermullu Naalakkersuisoqarfimmi pisortaq (atorfimmik pissuteqartumik siulersuisuni ilaasortaq)

• Elna Thomsen Heilmann Ilinniartitsisut Meeqqat Atuarfianneersut Kattuffianni siulittaasoq (IMAK) (siulersuisuni ilaasortaq)

• Frederik Fuuja Larsen, Nunatta Katersugaasivia Allagaateqarfianilu pisortaq (siulersuisuni ilaasortaq)

• Gerth P. Olsen, Qeqertalik Business Council A/S-imi allaffissornermi pisortaaneq, (siulersuisuni ilaasortaq)

Danmarkimit ilaasortassatut toqqarneqartut tassaapput:

• Lise-Lotte Terp, CEO & Founder ProConsi International (siulersuisuni ilaasortaq)

• Torben Røjler Christensen, professori, Aarhus Universitet, Scientific leader, Greenland Ecosystem Monitoring and Zackenberg Research Station (siulersuisuni ilaasortaq)

• Christina Viskum Lytken Larsen, professori, ilisimatusarnermik aqutsisoq, Kalaallit Nunaanni inuit peqqissusaannik centeri, Syddansk Universitet (siulersuisuni ilaasortaq)

• (toqqarneqarnissaa utaqqineqarpoq)

Siulersuisut Arctic Hubip anguniagaanut pingaarnertut akisussaapput, issittumilu ilisimatusarnerup iluani suliaqarfinnut attuumassuteqartunut kiisalu issittumi nunap immikkoortortaannut, inuussutissarsiutinullu attuumassuteqarlutik ingerlatsisunut sinniisunit arfineq pingasunik ilaasortaqarluni.