Arnaq toqungasoq Paamiuni nassaarineqarpoq

Paamiuni toqungasumik nassaartoqarsimaneranik politiit tallimanngormat januaarip 23-ani nal. 22.45 kalerrinneqarput.

Politiit tusagassiorfinnut taama nalunaaruteqarput.

Toqungasoq nassaarineqartoq arnaavoq 60-inik ukiulik, pissutsillu qanoq innerat naliliivigineqareersorlu misissuinerit aallartinneqartut politiit ilanngullugu ilisimatitsissutigaat.

Suliamut atatillugu Danmarkimi Pinerluttoqartillugu Misissueqqissaartarfimmeersut  aamma Toqusut Timaannik Misissuisarfimmeersut aggersarneqarput.

Angut tigusarineqarpoq

Angut suliamut atatillugu pasineqartoq tigusarineqarsimasoq vicepolitiinspektøri oqarpoq:

- Angut unnummi tassani arnap toqungasup nassaarineqarfianiissimasoq  tigusarineqarpoq suliamullu tunngatillugu pasineqarluni. Pisut assigiinngitsut misissuleruttorpagut, vicepolitiinspektøri Malik Sandgreen oqarpoq. 

Angut Eqqartuussisoqarfik Sermersuumi sapaammi sassartinneqarpoq, ullunilu 26-ni tigummigallagassanngortinneqarluni. Taanna sunarpiaq tunngavigalugu pasineqarnersoq politiit ilisimatitsissutiginngilaat.

Suliaq suli misissorneqarmat eqqartuussivimmilu sassartitsineq matoqqasuummat politiit allanik paasissutissaateqanngikkallarlutik ilisimatitsipput. 

Arnap qanigisai ilisimatinneqareerput.