Atuarfiup ilaa ikuallattoq – saassussinermullu takunnittut ujartorneqartut

Nuummi Atuarfik Samuel Kleinschmidtimi ikuallattoqarneranik politiit sisamanngornermi ualikkut nalunaaqutaq 17.17 kalerrinneqarput.

Taama pigaartut naalagaat Poul Kreutzmann oqarpoq.

Politiit qatserisartullu pisumut ornigupput, ikuallanneq atuarfiup timersortarfiani aallartittoq, pigaartut pisortaat oqaluttuarpoq.

- Ikuallanneq imminut aallartissinnaanngilaq, taamaattumik ikuallatsitsisoqarsimaneranik suliamik misissuivugut. Meeqqat minnerit suliamut atatillugu akuliunneqarput, Poul Kreutzmann oqarpoq.

Politiit ataavartumik misissuinerisa takutippaat meeqqat 15-it inorlugit ukiullit pinnguarnerminni ikuallannermik aallartitsisimasut.

Pinerluttoqartillugu politiit meeqqanik isumaginninnermut oqartussaasut meeqqallu angajoqqaavi ilisimatinneqarsimapput, politiillu suli misissuipput.

Saassussisoqarnera pillugu takunnissimasinnaasut ujaarineqarput

Aamma tallimanngornerup unnuaani nal. 01.17 Nuummi nukappiaraq 15-inik ukiulik saassunneqartoq politiinut nalunaarutigineqarpoq.

Nalunaarutigineqartoq naapertorlugu nukappiaraq Eqalugalinnguit tasersuata eqqaani nukappiaqqanik, pingasunit sisamallu missaani amerlassusilinnik saassunneqarpoq.

Pinerlunniat qernertunik taartunik atisaqassangatinneqarput, pigaartullu pisortaata ilisimatitsissutigaa takunnissimasinnaasut politiinut attaveqaqqullugit.

- Pisumit takunnissimagaanni politiinut saaffiginnittoqassaaq, Poul Kreutzmann oqarpoq.

Angut nunaqarfimmi navianartorsiortitsisoq

Unnuap ingerlanerani nunaqarfimmi Attumi pisoq, politiinit iliuuseqarfigineqarpoq.

Tassani angut aallaammik sioorasaarisoq pillugu nalunaaruteqarpoq.

Pisoq iliuuseqarfiginiarlugu politiit Aasianniit Attumut aallartinneqartut, Poul Kreutzmann oqaluttuarpoq

Politiit piffimmi misissuipput, pisumili pineqartut annertuumik imigassamik sunnertisimapput, misissuinerlu suli kinguneqartinneqanngilaq.

Pigaartut naalagaat naapertorlugu sineriak tamakkerlugu saaffiginnissutit, imigassartorsimanermut attuumassuteqarput.