Avannaata Kommunia: Borgmesteri nunanut allanut arlariinnut angalassaaq
Avannaata Kommuneani borgmesteri Lars Erik Gabrielsen aalajangerpoq kuffertini poortorsinnarlugu siunissami qanittumi nunanut allanut marlunnut angalaniarluni. Torontomi aatsitassarsiornermik isumasioqatigiinnernini annersaanni PDAC-imi Københavnimilu atuarfimmi ataatsimeersuartoqassaaq.
Avannaata Kommuniani borgmesteri Lars Erik Gabrielsen Torontomi Canadamiittumi PDAC-mik isumasioqatigiinnermi peqataaniarluni aalajagerpoq.
Assi toqqorsivimmiit: Oscar Scott Carl
Perngaammik Avannaata Kommunia Torontomi PDAC-imi isumasioqatigiinnermi peqataassaaq.
Isumasioqatingiinnermi borgmesteri inuussutissarsiornermilu immikkoortortamiit atorfilik peqataassapput. Angalanerup siunertarivaa "aatsitassarsiornerup iluani ilisimasat anginerulernissaat aatsitassarsiornermilu sullissisut qanimut suleqatingisinnaanerinik aqqutissiussinissaq" kommunalbestyrelsemut februarip 13-niani ilisimatitsissummi taama allassimavoq.
Martsip aallartinnerani Canadami aatsitassarsiornermi isumasioqatingiinneq ingerlanneqartussaavoq, tassani nunatsinniit kommunit, Namminersorlutik Oqartussat inuutissarsiortullu ukiuni siuliini peqataasarput. Isumasioqatigiinneq martip aallaqqaataaniit sisamaat ilanngullugu ingerlanneqassaaq, siornatigut 130.000-it missaanniittut nunanit 130-nit amerlanerusunit najuupput.
Atuarfimmut pulaarneq
Borgmesterip aatsitassarsiorneq kisiat ilisimasassarsiorfigissanngilaa aammali Københavnimut angalaniarluni aalajangerpoq, tassani atuarfimmi immikkut ittumi siornatigut unammilligassarpassuaqarsimasumi, maannali siunnerfeqarluartumik suliniuteqarnermigut malunnaatilimmik pitsanngorsaasimasumi, pulaassaaq.
- Atuarfik annertuunik unammillingassaqartoq ajornartorsiuteqarsimasorlu, kisianni allanngornermik pittaanerulersitsilluni ingerlasimasoq alakkarneqassooq. Assersuutingalungu atuartut ingerlaqqinngittoortartut suliniutingineqarsimapput, atuartut naalanngittut ulluinnarsiutaasimapput suliniarnermi allannguisoqarsimavoq il. il. suliniuteqarnermilu allaanerusumik atungaqartitsisoqalersimavoq, kommunalbestyrelsemut ilisimatitsissummi taama allassimavoq.
Paasissutissat pingaarutillit
Lars Erik Gabrielsenip pingaaruteqarnerarpaa paasissallugu atuarfimmi "pissutsit ilungersunartut pitsaasumik ineriartortitsinissamut“ qanoq iliuuseqarfigineqarnersut.
Borgmesterip saniatigut pilersaarutaavoq Kulturimut, Ilinniartitaanermut Ullukkullu Paaqqinnittarfinnut Ataatsimiititaliami Siulittaasoq, allaffissornermilu sulisut marluk tusagassiutilerisorlu ataaseq Københavnimut angalaqataassasut.
Canadami ikuallaaviit
Ilisimatitsissummi aamma allassimavoq ingerlatsivimmiit sulisunik marlunnik allattoqarfimmilu pisortamik Canadamut Arctic Winter Gamesimut atatillugu aallartitsisoqassasoq, tassani kommunalbestyrelsimi ilaasortat arlallit peqataassapput ikuallaaviillu mikinerit tikeraarneqassallutik.
