Avannaata Kommuniani borgmesteri Uummannami innuttaasunut: Oqariartuutit ingerlateqqissigit

Uummannap innaallagissiorfia ikuallammat illoqarfiup ilarujussua ippassaq ataasinngornermiit innaallagiaaruppoq.

Tamanna isumaqarpoq illoqarfiup ilaani tv-kkut, radiokkut, internetikkut mobilikkullu attaveqaatit kipisaqattaarsinnaasut.

Avannaata Kommuniani borgmesteri Lars Erik Gabrielsen (S) Uummannami innuttaasunut kaammattuivoq oqartussanit paasissutissanik pissarsinerminnik avitseqatiginneqqullugit, innuttaasut amerlanersaasa qanoq iliortoqarnersoq ilisimaniassammassuk:

- Attaveqarniarneq kipiluttunartumik ingerlavoq taamaattumik kaammattuutingissavara pisortat Uummannami innuttaasunut ilisimatitsissutingisartangaat innuttaasunit qanoq arlaatingut siaruartinneqartassasut qulakkeerumallugu tamanit paasineqartut. Taamatuttaaq erseqqissarusuppara oqartussanit ilisimatitsissutit inassutaasullu malinnissaat qanoq pingaaruteqartiginersoq, Lars Erik Gabrielsen Avannaata Kommuniata Facebookimi quppernerani naatsumik allappoq.

Kialaarfiugallartussamik pilersitsisoqartoq

AAMMA ATUARUK

Umiarsuaq pisariaqartitsisoqartillugu sarfalersuisussaq Uummannamut unnugu tikissaaq

Nukissiorfiit ullumi siusinnerusukkut nalunaarput umiarsuaq sarfalersuutinik sillimmatinik usilluni Uummannap tungaanut ingerlaartoq. Umiarsuaq tikereersimalerpat innaallagiamik pilersuinermik pilersitseqqinnissamik suliaqartoqalerpat, illoqarfimmi innaallagiaaruttoortaaqqaarnissaq naatsorsuutigeqquneqarpoq. Naatsorsuutigineqarpoq umiarsuaq marlunngornermi unnukkut Uummannamut tikissasoq, tamatumalu kingorna pilersuinermik pilersitseqqittoqalernissaa sulissutigineqassasoq.

- Kommunimut saaffinginnittoqarsinnaavoq paasitinneqarpungalu katersortarfitoqqamut saaffinginnittoqarsinnaasoq tassanngaaniit innuttaasunut sullissineq ingerlassammat.  Innuttaasunut kialaarfiusinnaasumik pilersitsisoqarnissaa sulissutigineqarpoq, Lars Erik Gabrielsen oqarpoq.

Aaqqiissutissat utaqqiisaasut sulissutigineqarput

Uummannami innuttaasut 1.400-t missaanniipput. Nukissiorfiit illoqarfiup pingajorarterutaa innaallagissamik pilersorsinnaaleqqereerpaa.

Avannaata Kommuniani borgmesterip erseqqissarpaa piffissami nalorninartorsiorfiusumi matumani aaqqiissutissarsiorniarneq suli ingerlanneqartoq:

- Taamatut inissinnerput nalornisitsivoq toqqisisimanaranilu. Neriuutingaara taamatut inissinnerput ulluni tulliuttuni aaqqiingallarnermi qaangerneqassasoq, ullut tulliuttut atungassangut taamaakkallarput, suleqatigiittariaqarpugut uatsinnut ikiorluta ataqatingiillutalu, oqarpoq.

Pilersuisoq Uummannamiittoq nalunaarpoq innaallagiaaruttooqqanerup nalaani akiliutit ilaat atorsinnaanngikkallartut, pisiniarfilli ammasoq. Ilanngullugu nalunaarutigineqarpoq illoqarfimmi ajornartoortoqarnerata nalaani imigassanik aalakoornartortalinnik nioqquteqarneq matoqqatinneqarallassasoq.