Peqqinnissaqarfiup aningaasaqarnera kukkunersiorneqalersoq

Peqqinnissaqarfiup aningaasaliissutit 2 milliardit koruunit missaanniittut qanoq aquppai? Sulisutigut qarasaasiatigullu atortutigut qanoq inissisimava? Apeqqutit tamakkua ilaatigut akissutissarsiniarlugit attuumassuteqanngitsumik kukkunersiuinikkut misissuisoqartussanngorpoq. Aningaasaqarnermut Naalakkersuisoq, Aqqaluaq B. Egede (IA) Sermitsiamut allappoq.

- Allaffissornikkut kukkunersiuinermi sammisat sisamat pingaarnerit aallunneqassapput. Tamatumani missingersuutinik aningaasaliissutinillu aqutsineq, aningaasartuutit pisuussutinillu atuineq, sulisut, angusaqarsinnaaneq sulisoqariaaserlu kiisalu IT, paasissutissat ingerlatsinermullu paasissutissat pineqarput, Naalakkersuisoq allappoq.

Kukkunersiuineq juunip naanerani aallartissasoq pilersaarutaavoq. Suliap qiterpaarnerani nalunaarusiaq septembarimi piariissagatinneqarpoq. Kukkunersiuinermi suliaq tamakkiisoq oktobarip naanerani inaarneqassaaq.

- Suliaq taanna Aningaasaqarnermut Naalakkersuisoqarfik Peqqissutsimut Inunnullu Innarluutilinnut Naalakkersuisoqarfik suleqatigalugu suliakkiutaavoq, Naalakkersuisut Kukkunersiuisuinit isumagineqarpoq, Aqqaluaq B. Egede allappoq.

Suliffeqarfik Implement kukkunersiuissaaq.

AAMMA ATUARUK:

Naalakkersuisoq: Aningaasameeqaagut

Misissuineq tamanna ingerlasoq, Naalakkersuisoq Inatsisartunut ilaasortanit maajip 20-anni apeqqarissaarfigineqarnermini oqarpoq. Sermitsiap Naalakkersuisoq tamanna pillugu ulloq taanna attaveqarfigaa. Naalakkersuisup akissutai juunip 19-ani nassiunneqarput.

Naalakkersuisoq: Aningaasartuuteqarnerunissaq pisariaqarsinnaavoq

Kukkunersiuineq naammassisimalerpat, inernerillu qanoq inneri nalunarunnaarpata tamanna politikkikkut isummerfigineqassasoq, Naalakkersuisoq aamma allappoq.

Nunap karsiata aningaasameertup, peqqinnissaqarfimmullu 2 milliardit koruunit missaannik missingersuuteqartup, peqqinnissaqarfimmut suli aningaasartornerunissaa misissuinermi inerniliussaassappat, tamanna isumaqatigiinniutaassasoq, Aqqaluaq B. Egede erseqqissaavoq.

- Kukkunersiuinermi nalunaarutip ersersissappagu aningaasaliissutit nutaat imaluunniit pingaarnersiuinerit allat pisariaqartinneqartut, aningaasaliinissamut periutsit nalinginnaasut tunngavigalugit suliarineqassapput. Tassa imaappoq, pisariaqassappat, aningaasanut inatsisiliornikkut imaluunniit Inatsisartunut saqqummiussinikkut, Naalakkersuisoq allappoq.

Kukkunersiuinermilu aallartinneqalersumi aningaasartuuteqarnerunissaq inerniliussaassasoq ilimasuutigalugu, Naalakkersuisoq Inatsisartut oqaluttarfiannit maajip 20-ani oqarpoq.