Sakkutuujusussaatitaasut Kalaallit Nunaannut aallartinneqartassasut

Illersornissamut ministerip Jeppe Bruusip (S) sakkutuujusussaatitaasut Kalaallit Nunaannukartalernissaat folketingimut akissummini ilisimatitsissutigaa.

- Sakkutuujusussaatitaasut Illersornissaqarfiup suliassaanut peqataasinnaaleqqillugit qaammatini aqqanilinni ilinniartinneqartassapput. Sakkutuujusussaatitaasut suliassanut sivisunerusumik immikkut ilinniagaqarsimanermik pisariaqartitsinngitsunut atorneqarsinnaalissapput.

- Sakkutuujusussaatitaasut sakkutuut atorfillit Kalaallit Nunaanni peqatigissavaat, suliassanillu isumaginneqataassallutik, Jeppe Bruus akissummini ilaatigut allappoq.

Sakkutuujusussaatitaasut 100-t missaanniittut Kalaallit Nunaannut aasap kingorna aallartinneqassasut, TV 2-p allakkat isertuussat tunngavigalugit marsimi allaaseraa.

Folketingimi ilaasortamut akissummi sakkutuujusussaatitaaneq pillugu sukumiisumik paasissutissiisoqanngilaq, assersuutigalugu sakkutuujusussaatitaasut qassit qaqugulu aallartinneqassarnersut oqaatigineqarani.

Sakkutuujusussaatitaasut siulliit Nunatsinnut juulip naanerani aallassasut, Jeppe Bruus TV 2-mit apersorneqarnermini oqarpoq.

Aalajangiineq tamanna ‘nutaatut’ taavaa.

Kalaallit Nunaannut aallartinneqartarnerat "Kalaallit Nunaanni sakkutooqarnerup annertusarneqarnissaanik suliassap naammassineqarnissaanut aalajangersimasumik paarlakaattoqartarnissaanit aallaaveqartoq" Folketingimut akissummi aamma allassimavoq.

- Sakkutuujusussaatitaasut sakkutuut atorfillit suleqatigalugit ilinniartinneqarnikuuneqartit aallaavigalugu suliaqartassapput, taamaalillugit Illersornissaqarfiup ataatsimut suliassai eqqarsaatigalugit naapertuuttumik pitsaasumillu suleqataassallutik.

/ritzau/