Innaallagialersueqqilerneq aallartippoq: Innuttaasut innaallagissamik atuinertik annikillisissagaat

Umiarsuaq atortussanik usilluni Uummannamut akunnerup ataatsip missaa matuma siorna tikippoq.

Nukissiorfinni sulisut maanna atortunik usingiarpiy illoqarfimmilu innaallagissiorfiup pisariaqartunik iluarsaanneqarnissaa piareersarlugu aallartillutik. Erngiinnaq atortut ikkussuunneqarlutillu attavilerneqassapput, taamaalilluni illoqarfiup sinneranut innaallagissamik pilersuineq aallartinniarneqassalluni. Nukissiorfiit nittartakkamini taama paasissutissiivoq.

- Iluarsartuussinermut ikkussuinermullu atatillugu innaallagissamik pilersuineq uneqattartarsinnaassaaq, suliaq isumannaatsumik sapinngisamillu sukkasuumik naammassiniarneqartussaammat, ilisimatitsissutigineqarpoq.

Innaallagissamik sipaarit

Uummannap annersaa ataasinngornermi ullaakkut illoqarfiup innaallagissiorfiani ikuallattoqareernerata kingorna innaallagiamik pilersorneqarunnaarpoq. Atortut Ilulissaniit ataasinngornermi unnukkut nassiunneqarput, innaallagialersueqqilernissamut pisariaqartinneqarmata. Avannaata Kommunia katersortarfitoqqami utaqqiisaasumik kialaarfimmik pilersitsivoq, tassani innuttaasut pisariaqartitsigunik imermik innaallagiamillu atuisinnaaqqullugit, kiisalu pisariaqartitsinermi nerisassiorsinnaaqqullugit.

Illoqarfiup pingajorarterutaa ataasinngornermi unnukkut innaallagiamik pilersorneqalerpoq. Maannali illoqarfiup sinneranut innaallagiamik pilersuisoqarnerup aallarteqqinneqarnissaa aallartimmat, suliaqarnermi pilersuineq annikitsumik unittoortarsinnaassangatinneqarpoq.

- Nukissiorfiit sulisui ulloq unnuarlu maanna sullipput illoqarfimmut innaallagissamik pilersuineq sukkanerpaamik tamakkiisunngorteqqinniarlugu.

- Taammaattumik Uummannarmiut suliaqarnerup nalaani innaallagissamik atuivallaarnaversaaqqullugit kaammattorusuppagut. Assersuutigalugu kiassaatit inaalliartortut, errortanut panersiiviit, erruiviit innaallagiatortut allallu sarfamik atuinertuut pisariaqavitsinnagu uninngatikkallarnissaat kaammattuugissavarput, taamaaliornikkummi innaallagissamik pilersuineq allangujaannerusumik ingerlassammat, Nukissiorfiit ilisimatitsivoq.