Qaanaami imigassat kimittuut akisuunngorlugit tuniniarneqartut

Qaanaap Pilersuisuani imigassanik pisiassaqarunnaarsimanera Sermitsiami maajip tallimaani allaaserivarput.

Inuit nittartakkakkut attaveqatigiittarfiini imigassanik kimittuunik, soorlu vodka aamma Aalborg Akvavit liiterit ilaatigut 2000 koruunilerlugit aamma akunnattut 1000 koruunilerlugit tuniniarneqartut takusimallugu, Ane Qujakitsoq, Qaanaami innuttaasoq Sermitsiamut oqaluttuarpoq.

- Takullattaasarpara facebookkimi imigassat kimittuut siullermik akitsorterneqarlutik tuniniarneqartartut, Ane Qujaukitsoq oqarpoq.

Imigassaq pillugu inatsit ima allaqqavoq:

"Imigassaq pillugu akuersissuteqarnani imigassanik aalakoornartortalinnik tuniniaanissaq sassaalliinerluunniit inerteqqutaavoq."

Qaanaami Politiinut innuttaasut imigassanik tuniniaasarnerannik nalunaaruteqartoqarnikuunngitsoq, Kalaallit Nunaanni Politiit ilisimatitsipput.

AAMMA ATUARUK

Immiaaqqat nungupput

Akia apeqqutaatinneqarpasinngitsoq

Qaanaap Pilersuisuani imigassanik aalakoornartortalinnik pisiassaqannginnera pissutigalugu, imigassaarniartut qanoq akeqartitsisagaluarpataluunniit tunisaqarsinnaasarnerat qularineqanngilaq.

- Tuniniaasartut aningaasat kisiisa pillugit inoqatertik eqqarsaatiginagu tuniniaqqiisarnerat naammanngikkaluarpoq, Ane Qujaukitsoq oqarpoq.

Imminut illersorniarluni imigassamik tuniniaasut politiinut nalunaarutigineqartanngitsut ilimagineqarpoq.

- Isumaliutigisarpara inuit ilisimanngikkaat politiinut nalunaaruteqarsinnaallutik. Takunnittutut nalunaarutiginninnermi narrugineqalernermik kinguneqarsinnaanera ernumatigineqartarunarpoq aamma, Ane Qujaukitsoq oqarpoq.

Politiinut nalunaaruteqartoqarsinnaasoq

Qaanaami politiinut imigassanik kimittuunik inuit akornanni tuniniarisoqarneranik piffissami kingullermi nalunaaruteqartoqarnikuunngilaq.

- Mattunneqarsinnaanngilaq inuinnaat imigassaarniartarnerat imaluunniit imigassanik kimittuunik tuniniaaqqittarnerat, politiinulli nalunaaruteqartoqarnikuunngilaq misissuinissatsinnik kinguneqartitsisinnaasumik, Kalaallit Nunaanni Politiit Sermitsiamut allakkatigut akissuteqarlutik ilisimatitsipput.

Politiit ilisimatitsipput innuttaasut takunnissimallutik misigisaqarsimallutilluunniit nalunaarutiginninnissaminnut nalornissuteqarunik Kalaallit Nunaanni Politiinut 701448-mut sianerlutik saaffiginninnissaminnut tikilluaqqusaajuaannartut.

Ilanngaaserisut Qaanaaliartunut misissuisanngillat

Qaanaaq nunani tamalaanit miffigineqarsinnaasumik mittarfeqanngimmat Qaanaamiit Qaanaamullu angalasut sunik nassataqarnersut misissuiffigineqarneq ajorput.

Qaanamut angalasut nassataat imigassanik kimittuunik imaqarnersut ilanngaaserisunit misissuiffigineqartannginnerat Qaanaami najugaqartup paasisinnaavaa.

- Ilanngaaserisut qullersaat allannguinianngippata, Qaanaamut imigassamik nassartunik misissuisalernissamik, imigassaarniartunik takunnittutut politiinut tunniussisarnissaq aqqutissatuaavoq, Ane Qujaukitsoq naggasiivoq.