Barbienit qapikkaniit ullorsiutinut ulikkaaqqasunut: Esterp suliffeqarfiutini nammineq isummani malillugu ineriartortippaa

Ester Jensenip meraalluni inuusani barbiet pinnguanik atortoqarluni inimini unnuakkut qapertarnikuuai. Nuannarinninnerali pinnguarnerinnaanngilaq. Salon Tamikamik maanna piginnittuuvoq, tassanilu sullitaasa nujaleritinnertik naammassikatareeraluartoq kaffisugartik nungoqqaartarpaat.

Tamika pillugu oqaluttuaq aanaaminiit anaanaminiillu suliumatussutsimik sakkortuumik kingornussaqarnermiit aallaaveqarpoq. Takorluukkap piviusunngortinniarnera uippakajaarnermik qularnaveeqqutinillu akisunaakkanik naleqartoq, angusaqarusussuseq pingaarnerutinneqarani unneqqarissuuneq qanilaarnerlu tunngavigalugit timitalerneqartoq.

- Nujalerisunngorusuttuaannarnikuuvunga. Meeraagallarama inuusama barbiet nujaat killortarpakka. Anaanap unnuakkut alakkaraangamitigut barbit nujaqanngitsut initta natianiittartut kingorna oqaluttuuppaanga. Aap, meeraagallaramali nujalerinermik suliaqartarpunga, Ester oqaluttuarpoq, illalerlunilu.

Nammineq pisortaanerup akia

Naak inuusuttorpassuit namminersortuunissamik angorusutaqaraluarlutik, taamaattoq ikittuinnaat taamaattuunerup qanoq timimut tarnimullu akeqartarnera paasisarpaat. Estermut allanngorfik ilinniarnermi nalaani takkuppoq, tassanilu ikorfartuisuata piviusumi aallarnisaasutut matuersaammik tunivaa.

- Siusissukkulli namminersortuunissara ilisimavara. Salon Pukimi nujalerinermik ilinniartunngorama pisortarissaarpunga, Puki. Aahh Pukinnguaq!

-  Nammineq suliffeqarfiuteqarnissamik soqutiginninnera malugilertorpaa. Pukip isumassarsitillungalu ilitsersortuarpaanga. Allat assiginagit namminersortuunerup ilungersunartortaanik unneqqarissumik oqaluttuuttarpaanga – inuttut timikkut tarnikkullu ”peqataajuarnissamik” Ester silatimini biilerpalaaq tusarsaasoq oqaluttuarpoq.

Salon Tamikali Esterp namminersortutit aallartiffiginngilaa. Taassuma tungaanut aqqut siusinnerusukkut suliniutinit namminersortutut paasisaqarfigisaanit misilittakkanik pissarsiffiupput.

- Salon Priscilla Kiwi Salonilu piginikuuakka. Salon Tamika ammartussanngorakku nammineq kissaatikka atorlugit ilusiliinissara siunertaraara. Salon Priscilla angajoralu pigaarput, taamaalillutalu ilusilersornera aalajangiinerillu marluulluta ingerlataraagut, taanna oqaluttuarpoq.

Avatangiisinit tapersersorluarneqarneq, ataatsimik ukiulik inniminniinerillu ulikkaaqqasut

Namminersortut aallarterlaat piffissami siullermi inniminniisoqanngissinnaanera isertitaqannginnissarlu annilaangatigisarpaat. Estermulli Salon Tamika ammaqqaaramiuk atuutinngilaq.

- Ajunngitsumik ingerlajumaarneranik ilisimasaqarneq uannut piumalersitsivoq – tamatumanilu aalajangersimasunik amerlasuunik sullitaqarnera patsisaavoq. Nujaleriffiga ammarakku annertuumik nittarsaassisariaqarsimanngilanga, qaammat siulleq inniminniisunik ulikkaarpunga. Sullitannaakka piumassutsimik annertuumik pilersitsisuupput, Ester oqarpoq.

- Aallaqqaammut suliffeqarfik Salon Ester Lauramik atserlugu pilersippara. Panimmali atiata atornissaa nalornissutigaara – immaqa ingasatsiarsinnaasoq eqqarsarpunga, siunissaalu eqqarsaatigaara. 15-iinnarnimmi qaammateqarpoq tamannarpiarlu pissutigalugu aalajangiinernut ilaatinneqartarnani. Ataataali oqarpoq: ”Soorunami nujaleriffik Tamikamik ateqassaaq – aterlu taanna tulluusimaarutigissavat!"

- Taamanikkulli Salon Tamikanngorpoq. Ateq immikkuullarippoq taamaammallu eqqaamajuminarluni, tulluusimaarluni oqaluttuarpoq.

Amerlasuunut naalungiarsuk suliffeqarfillu aallarterlaaq immaqa annertuginarsinnaapput. Estermulli sakkortuumik pingaarnersiuineq avatangiisiminiillu tapersersiorluarneqarnissaq pisariaqarput.

- Naartunerma nalaali eqqarsarluarnissamik periarfissaqarpunga, suliffimmullu uteruma namminersortutut uternissara ilisimaaraara.

- Taamanikkut angajoqqaatut suna iserfiginerlutigu ilisimanngilarput. Ammaanerlu ilimagisamik pitsaaneruvoq. Naalungiarsuuteqarneq piffissamik atuinartupilussuuvoq, panimmali angutaalu suleqatigiilluarpugut isumagisassallu avillutigit.

Suliumassuseq kingornussaq – unikaallassinnaanermillu ilisimasaqarneq

Isumassarsiamit piviusumut iliuuseqarneq avatangiiserisanik kaammattorneqarnermik oqilisarneqarpoq. Estermullu piffissaq siulleq annertuumik qujamasuffiusutut aamma misiginarpoq.

- Ammaaneq eqqummaariffigineqartupilussuuvoq, naasunik tunisiffiulluni pilluaqqutiffiullunilu. Piffissaq nuannerluinnarpoq sullitanillu suleqatinillu ikiorluarneqarpunga. Pukip nujaleriffiutini matugamiuk tarrarsuummik, issiavinnik allaallumi juullip pequtaanik tunivaanga, taamaalillungalu naqqaniit aallartinngilanga, qungujulluni oqaluttuarpoq.

Naasorpassuillu atortullu nutaat pisiat inniminniisunillu allattuiffik ulikkaaqqasoq aamma piviusumik nassataqarpoq. Nammineq nujaleriffiuteqarneq qiuutinik sullitanillu oqaloqatiginnilluarnermit annertunerujussuarmik piumasaqarfiuvoq.

- Namminersortuunerup qanoq akisussaaffimmik annertutigisumik nassataqarnera, allaffissornikkullu suliassat qanoq annertutiginerat tupaallaatigaara. Tamakku ataavartumik ingerlatinngikkaanni kinguussaaneq takkutilertortarpoq. Imminut sakkortuumik piumaffiginissaq pisariaqarpoq – qanorluunniillu qasutigigaluaruit isumagisassatit suliarisariaqarpatit.

Iluatsinnissamut nukerujussuaq piumassuserlu pigigaanni sulinerup naanera sunngiffiullu aallartinnera tammartuusinnaasarput. Imminut unikaallatsinnissap ilikkarniarnera Estermut ilungersunarnernut ilaasimavoq.

- Qasuersernissaq aamma eqqaamasinnaasariaqarpoq. Tamannalu pikkoriffigivallaarneq ajorpara. Tamanna anaanannit aanannillu Priscillamit kingornussimagunarpara; pingasuulluta suliumassusermik immikkuullarissumik pigisaqarpugut. Suliaqaraangatta pimoorulluinnarlugu suliarput suliarisarparput, suliarlu pitsaalluinnartumik naammassineqanngikkaangat iperarneq ajorparput, taanna nassuiaavoq.

Nujaleriffimmik ingerlalluartumik pilersitsinissaq isumassarsiatsialammik sullitanillu aalajaatsunit annertunerusumik piumasaqarfiuvoq; aningaasaateqarnissamik pisariaqartitsiffiuvoq. Esterp aallartinnermi naatsorsuutini kisitsisit kingumut qiviaraangamigit aningaasartuutit aalajangersimasut naalleraasutut ersertarput.

- Qularnaveeqqut kusananngitsumik annertussusilik aningaasaqarnermi ilungersunarnersaavoq. Inimik inuussutissarsiornermi atugassamik attartorniarneq ajornakusoorsimavoq, iluatsipporli.

- Aningaasat ingerlaarnerat ingerlaannartumik aallartippoq, qularnaveeqqutilli piffissami sivisunerusumi naafferarneqarsimasinnaagaluarunik aallartinniarneq oqinnerusimassagaluarpoq, erseqqissaavoq.

Københavnimi ilisarineqannginneq kalaallillu qanilaassusiat

Illoqarfissuarmi ilisarisimaneqarani ulluinnaqarsinnarluni, tusatsiakkat tapersersuinerillu suliffeqarfimmi ingerlapallattarnerannut. Danmarkimit Kalaallit Nunaannut nuunneq assigiinngitsorujussuarmik nujaleriffimmik ingerlatsiffiuvoq.

- Danmarkimi Dankort-terminalip inniminnerneraniit piareereerluni tikinneranut ullup affaa ingerlavoq. Maani Nuummi qaammatit marluk utaqqeqqaartariaqarpunga, namminerlu SIM-kortia isumaginiartussaavara sianeqattaassutigisariaqarlugulu. Malittarisassat allaffissornerujussuarlu allaanerusumik misiginarput, suullu tamarmik sivisunerusumik utaqqisariaqartarput.

- Københavnimi ilisarisimaneqanngilanga, aqqusinermilu pappiaqqanik ussassaarutinik agguaallunga nujaleriffinnut akikitsunut unammillerlunga sullitassarsiortariaqarpunga. Maanili Nuummi inuit ilisarisimavaannga. Ammassallunga Brugsenimi inuit oqaluttuukkakkit nuannaajallallutik ima nillertarput "Oh my God!". Kikkut tamarmik imminnut ilisarisimapput, tamatumalu sullitassat ajornannginnerulersippaat inuppalaarninngortillugulu, taanna oqaluttuarpoq. 

Nujaleriffimmik torraalluinnartumik pilersitsineq iluarusunnermik, piffissaqarluarnermik sullitanullu siammasissumik neqerooruteqarnernik nassaarnissamut tunngavoq. Periusissarluunniit pitsaanerpaaq illutap sananeqarnerani sinaakkutinut nalimmassartariaqartarpoq.

- Uatsinni iluarisimaarneq eqqissisimanermut, kialaarnermut qanilaarnermullu tunngavoq. Nunanit allanit sunnerneqalaaqqasoq. Tikilluaqquneqartutummi inuppalaartumik sullinneqarnermik misigisaqarfiusussaavoq – sullissineq annertunaarnagu annikinaarnagulu. Uatsinni tamakkiisumik namminiusoqarsinnaavoq, uagullumi aamma taamaappugut, oqaluttuarpoq, imalu nangilluni:

- Nujaleriviit allat arnanut killuinerminnut minutsit 45-t atortaraat angutinullu minutsit 15-30, minnerpaamik arnanut nalunaaquttap akunnera angutinullu minutsit 30-t inniminnertarpavut. Sullitap eqqissisimaneq tullissaminut uippallerutigineqannginnissani akilertarpaa.

- Maani siullernut ilaalluta nujaleriffinni kukileritinneq neqeroorutigaarput, pinnersaasarpugullu aamma. Katittunut aamma immikkuullarissumik neqerooruteqartarpugut, tassani nujalerivik sapaammi ullaakkut katittussamut malittaanullu sullinneqarnermut mimosasimut champagniatornermut nuannisaarnermullu attartorsinnaasarpaat.

- Nujalerivimmiittuni quliffiit assigi kissaatigigaluaqaarput. Betonimillu iikkat, naqqit kiassakkat kuuffiliinissamullu piumasaqaatit pissutigalugit 60.000-70.000 koruuninik akeqassaaq. Peqatigisaanik attartortitsisup inip iserneratut qimanneqarnissaa kissaatigaa, tamannalu piiaanermi tamatuma annertoqataanik akiliinissaq kinguneraa, Ester oqaluttuarpoq. Eqqissisimaneq kialaarnerlu sullitat nujalerivimmi misigisartagaat sullissisuninngaanneerpoq. Ester Jensenimut Arnakkulummullu iluatsittumik ingerlatsineq sorsualiornermik pisussaarnermilluunniit aallaaveqanngilaq, peqatigiilluarnermillu ulluinnarnilu aporfiusinnaasunik matut ammannginneranni qaangeeqatigiittarnermik patsiseqarpoq.

- Arnakkuluk uangalu suleqatigiilluaqaagut. Inuuneq persuarsiorfiunngitsumik isigaarput. Imminut nittarsaanniarneq, kusanarniarneq biililluunniit akisuut soqutiginngilagut – toqqissisimaneq, qanilaartuuneq pilluarnissamullu naammattunik peqarneq pingaartippagut. Tamannalu sullitanut sunniuttarpoq.

- Inuunitsinni arlaanni sakkortuumik nalaataqarutta tamakku ullaakkut kaffisuunnermi ”qaqilertarpavut”, suut eqqarsaatiginerlugit immitsinnut oqaloqatigiittarluta misigissutsillu igaffimmiitittarlutigit. Matu ammaraangatsigu sullitatsinnut piareerluinnaqqasarpugut, Ester Jensen qungujulluni suleqatini qissimiutigalugu oqarpoq.

Pineqaatissinneqarsimasunut inissiisarfik nakkutilliisoq, parnaarussaq Naalakkersuisullu siulittaasuat imminnut naapittarput

Nujalerivimmi kikkut tamarmik naligiipput, naalakkersuinermi qullersaaneq inuiaqatigiinniluunniit pinerluttuuneq apeqqutaatinnagit. Salon Tamikami inuit nuimasut biiniamiillu naapittarput, tamannalu immikkuullarissumik inuit tamatigut qitiutillugit naapiffimmik pilersitsisarpoq.

- Sullitavut assigiinngitsupilussuupput – Naalakkersuisut siulittaasuannit inunnillu tusaamaneqartunit inunnut Brugsenip silataaniittartunut. Tusaamasat Julie Berthelsen, Zedna, Prussic, Nahome Katuami Arnaq-showimi suleqataasut ilanngullugit nujalerisarpavut.

- Ullut ilaanni pineqaatissinneqarsimasunut inissiisarfimmi nakkutilliisoq issiavimmi issiavoq. Naammassigami parnaarussani matumi naapippaa high fiverlugulu, paarlallugulu parnaarussaq ingippoq – kingunitsianngua Lars Emil Johansen iserluni. Tamarmik assigiimmik pineqartarput. Sullitaat ilaat aalakuualaarlutik isertarput, tamannalu qiimmassaqatigiittoqartillugu akornutissaqanngilaq. Aalakoortorujussuullunili allat akornusersoraannni taava sullinneqarsinnaaneq ajorput, Ester oqaluttuarpoq.

Inuiaqatigiinni Nuummiutut ittuni nujaleriffimmik nuannarineqarluartumik ingerlatsigaanni namminiuneq suliffeqarfimmut tussinnaasarpoq. Estermullu tamanna nujalerisuunerup piginnittuunerullu ullup suliffiusup naanerani suliffeqarfimmut ilillugu qimanneqarsinnaarpiannginneranik kinguneqartarpoq.

- Illoqarfimmi Nuummisut ittumi najugaqarneq nuannersorujussuuvoq, atuuttuassagaannilu aamma ingasatsialersinnaasarpoq. Brugsenimi niueriaraangama inuit akuttunngitsumik aggerlutik oqartarput: "Nutsakka takulaakkit – qanoq killortissaanga?"

- Inussiarnersumik oqaloqatigiinnerup allamut saatinnissaa ilikkartariaqarsimavara.
"Ullumikkut sulinngilanga, aqagu sianerit"-mik oqaraanni, tamanna inussiarniitsuutillugu paasinerlunneqarsinnaasarpoq. Taamaammallu avatangiisinut nujalerisuusaartariaqartarpoq, piumanngikkaluaraanniluunniit.

- Suna tamaat qimanniarlugu kangerluup iluanukartariaqartarpunga mobiilip angusinnaanngisaanut. Sapaatit allortarlugit meerartaqarnanga inuit nittartakkatigut attaveqaataat qamittarpakka – tassanilu inuit qangatuut sianerlutik taamaallaat pissarsiarisinnaasarpaannga, Ester oqaluttuarpoq.

»Sulinngikkaangavit suliffik eqqarsaatigisarnagu!« – uippakajaarnermiit takorluukkanut nutaanut

Naak suliumatussutsip qasujaatsuunerullu Ester annertuumik siuariartikkaluaraat, ulapittuaannarneq aamma illuatungeqarpoq. Naammassisaqarluartarneq namminerlu nukiit paariunnaaraanni timi qasoriataarsinnaasarpoq unitsitsilluni ikiorneqaqqullunilu.

- Qasujaatsuunera nutaaliortumillu eqqarsarsinnaanera nukittoqqutiginerpaavara. Suliumatussutsimmali aamma qasutissinnaavaanga. Qanittumi uippakajanaarnermik eqqugaaqqammivunga. Tamatumuunakkullu malugiitsoorpara. Suleqatinnguama eqqissisimanissannik eqqaasittariaqarsimavaanga.

- Malugigakku erngerlunga ikiorneqaqqullungalu qisuariarpunga. Uippakajaarnerup iliuuseqarfiginissaanut aqqutissiuussisora psykologeralu attavigaakka. Ilaquttakka akuliutsippakka tapersersorneqarsinnaaneralu tamakkerlugu atorlugu. Arnakkulullu nujalerivimmi pinngitsuugassaanngilaq – taannaqanngikkaluarpat ajutoorluinnarsimassagaluarpunga.

- Utersinnaagaluaruma uannut siunnersuutissara pitsaanerpaaq tassaassagaluarpoq:

- Sulinngikkaangavit suliffik eqqarsaatigisarnagu!

Tamakku tamaasa misilittagarilereerlugit suullu ajunnginnersut isumassarsiffigereerlugu, Ester manna siunissamut saappoq. Nujalerivik Nuussuarmi inissilluarpoq – siunissamulli takorluukkat annertunerupput inuunermullu pitsaasumut itinerusumik kalluaallutik.

- Nujalerivik Nuussuarmi inissisimavoq, tamannalu nuannaarutigisorujussuuara. Nuuk Centerimit akikinnipilussuuvoq. Tassanilu attartornermut akiliut qaammatini sisamani 100.000 koruuninit annertunerusinnaasarpoq; maani biilit uniffissaqarluarput, Nuussuarmilu nujaleriffituaavugut. Sullitannaagut Qinngutsinnit uatsinnukarusuttarput.

- Inimik annermik quliffissartalimmik ataatsimillu marlunnilluunniit suleqatitaarnissaq anguniagaavoq, Arnakkulullu uangalu taamaalilluta sulinngiffeqarsinnaalissagatta. Nunatsinni illoqarfinni allani ammaanissaq utaqqisikkallarpara. Periuserput namminiussutsitsinnik najuussinnaanitsinnillu annertuumik aallaaveqarpoq.

Ukiut tallimat qaangiuppata qanoq ikkumaarnini takorloorneraa aperiganni ima akivoq: 

- Salon Tamika nammineq iniminik piginnittuulersimanissaa, nujalerivik ingerlalluassasoq anaanalu tassani utoqqalissalluni toqqaappat immaqa Danmarkimi immikkoortumik ammaasimassasunga. Pingaarnertullu: Anaanaalluarnissara, namminersortutsialaanissara – uippakajaarnermillu eqqugaaqqinnginnissara, Ester qungujulluni oqarpoq.