Benjamin Netanjahu: Timmisartortartup timmisartoq Israelimut nakkartinniarsimagunaraluarpaa

Timmisartoq Dubaimiit Israelimut ingerlasoq ajunaalernermi kalerrisaarinerata kingusinnerusukkullu minnerata kingorna timmisartortartoq, Saudi Arabiami pingasunngornermi ullaakkut tigusarineqarpoq.

Taama Israelimi ministeriuneq Benjamin Netanjahu pingasunngornermi ualikkut oqarpoq.

- Timmisartoq Israelimut qanilliartortillugu timmisartortartut aappaata timmisartortartoqatini kapoorpaa, qularnanngitsumik timmisartoq nakkartinniarlugu, oqaaseqarnermini taama oqarpoq.

Timmisartup silaannarmiinnerani qanoq pisoqarsimanera pillugu apeqqutit suli akissutissarsineqanngitsut amerlapput.

Timmisartornermulli paasissutissat takutippaat timmisartoq Flydubaimeersoq Dubaimit aallarnermi kingorna nalunaaquttap-akunneri marluk qaangiuttut appariarsimasoq.

Timmisartoq 5,2 kilometerinik qutsissusilimmik appariariarpoq kingornalu 2,1 kilometerillu sinnerlugit aamma appariarpoq.

Timmisartumit ajunaalernermi kalerrisaarut aallartinneqarpoq, timmisartumik tiguaanermik allatigulluunniit akornusersorneqarsimanermut kalerrisaarut kingusinnerusukkut aallartilluni.

Timmisartortartoq tigusarineqartoq saudiarabiamiut oqartussaannik maanna killisiorneqartoq, Netanyahu paasissutissiivoq.

Timmisartortartup aappaa qanoq innersoq suli nalunaarutigineqanngilaq, timmisartulli minnerata kingorna napparsimmaviliaanneqarpoq.

Timmisartumi ilaasut ilaqutaallu qanoq pisoqarsimanera pillugu assigiinngitsunik pingasunngornerup ingerlanerani paasissutissaqarpoq.

Timmisartortartulli marluk imminnut assortuussimanerat tusagassiuutit arlallit — ilaatigut Sky Newsip — nalunaarutigaat.

Timmisartortitseqatigiiffik ilisimatitsivoq ilaasut tamarmik ajoqusersimanngitsut. Timmisartoq Saudi Arabiami mittarfimmut Tabukimut nalunaaqutaq 07.44 (danskit nalunaaqutaat) mippoq.

Israelimi naalakkersuisut siulittaasuat Benjamin Netanjahu allappoq timmisartumi ilaasut ilaat Israelimioq oqaloqatigisimallugu.

- Oqaluttuuppaanga timmisartup inuttaa ilagaluni qanoq ililluni timmisartup aquttarfianut isersimalluni, tassanilu timmisartortartoq timmisartup atortuinik ajoqusiiniarsarisoq unitsissimavaat, ministeriuneq allappoq.

RITZAU