Bentiaraq Ottosen: Akisussaaffik tamakkiisoq uanniippoq

- Aap. Naalakkersuisutut tunuarninnut nittartakkatigut sulisussarsiornermut suliaq peqqutaavoq. Suliaq taanna naalakkersuisunngunnginninni aallartissimavoq. Suliarli tamakkiisumik akisussaaffigaara. Allaffissornikkut kukkusoqarsimavoq, tamatumunngalu akisussaaffik tamakkiisoq uanniippoq, taamaattumillu Naalakkersuisutut tunuarpunga.

Bentiaraq Ottosen tunuarniuteqassalluni nalunaarneranit akunneq ataaseq qaangiuttoq Inatsisartut paarlersuini Sermitsiamit naapinneqarami taama oqarpoq.

Nittartakkatigut sulisussarsiorfissaq suliarineqalersimavoq, naak suliamut aningaasaliisoqarsimanngikkaluartoq. Maanna isumaginninnermut, suliffeqarnermut, nunamut namminermut avatangiisinullu naalakkersuisuusimalersup, suliaq pillugu aningaasaqarnermut akileraartarnermullu ataatsimiititaliaq pingasunngornermi unnoqqaakkut ammasumik siunersiorneqarnermini nassuiaatigisimavaa.

Akisussaaffimmilli inissiineq equngasoqarsoraa:

- Suliaq uanga sioqqullunga aallartinneqarnikuuvoq. Taamaammat eqqartorneqartariaqarsoraara ilumut inissaminiinnersoq akisussaaffiup taama inissinneqartarnissaa, Bentiaraq Ottosen oqarpoq.

- Akisussaaffigisanni suliat tamakkiisumik ingerlateqqissallugit akuersivutit Naalakkersuisutut inissittussanngoravit. Taamaammat suliat suulluunniit ilinniittut ilisimasaqarfigissallugit akisussaaffiginngiliuk?

- Ilumoorpoq. Aamma taamaattumik akisussaaffik tamaat tiguara. Ataatsimiititaliamulli erseqqissarpara, suliaq naalakkersuisunngunngitsungali aallartissimasoq, suliamullu tunngasut tamakkiisumik ilisimasaqarfigisimanagit, taamatuttaaq aningaasalerneqarsimannginnera, Bentiaraq Ottosen oqarpoq.

Naalakkersuisoqatigiit suli tapersersoraat

Bentiaraq Ottosen ilisimatitsivoq upernaakkut ataatsimiinnissap tungaanut Inatsisartunit sulinngiffeqaannarassalluni. Naalakkersuisutut ivertinneqarami Inatsisartunit sulinngiffeqalersimavoq.

Aqqalu Jeremiassen aamma Knud Kleemann Atassut sinnerlugu maanna Inatsisartuni ilaasortaapput, ataatsimiinnermilu suliat ingerlatiinnaqqullugit taakku issiaannarallassapput.

- Ilutsinni aalajangereerparput naalakkersuisoqatigiit suli tapersersussallutigit. Naalakkersuisuutitaqarnermut suli ammalluta ilisimatitsereerpugut. Qanorli inerneqarumaarnissaa apeqqutaanani tapersersussavagut, Bentiaraq Ottosen erseqqissaavoq.

Ottosenip neriuutigaa nittartakkatigut sulisussarsiortarfiup suliarineqarnera taartaasussamut ilungersortitsivallaassanngitsoq.

- Nittartakkatigut sulisussarsiortarfimmut suliamut tunngatillugu, tullissama ilugersorpallaannginnissaa qulakkeerniarsimagaluarpara. Tamannali iluatsikkuminaassimavoq, taamaammat neriuppunga tulliusussap suliaq pitsaasumik naammassiumaaraa, Bentiaraq Ottosen naggasiivoq.

Ottosenip neriuutigaattaaq isumaginninnerup iluani suliniutit, suliffeqarnerup iluani suliniutit kommunerujussuillu iluarsartuunnissaanut suliat pitsaasumik nanginneqarumaartut.

Bentiaraq Ottosen kimit taarserneqassanersoq suli ilisimatitsissutigineqanngilaq.