Borgenimi ulloq kingulleq
Aaja Chemnitz ukiut qulit sinnerlugit Folketingimi ilaasortaareerluni ullumi naggataarpoq.
Aaja Chemnitzip Kalaallit Nunaannit folketingimut ilaasortanngortussanut pitsaasumik siunnersuutissaqarpoq: – Folketingimi gruppinut pulaaqattaartarnissat Kalaallit Nunaallu pillugu saqqummiussinissaat pingaaruteqarluinnarput. Partii ataasiinnaq qitiutinneqartariaqanngilaq. Partiit tamaasa siammasissumik suleqatiginissaat isumagineqartariaqarpoq, Aaja Chemnitz oqarpoq.
Assi: Trine Juncher Jørgensen
Allaffik torersaatereerpoq, karsillu poortorneqareersut teqeqqumiillutik. Aaja Chemnitz ingerlariaqqittussanngorpoq, Inuit Ataqatigiillu sinnerlugit folketingimi ilaasortaajunnaarnissaanut akunnialuinnanngorlutik.
- Nuannaarpunga. Aalajangereernikuuvunga ullorlu una utaqqinikuullugu.
Ukiuni aqqanilinni
ulloq unnuarlu sivisuumik sulisimagaluarluni allamik
pisoqartariaqalerpoq, Aaja
Chemnitzilli maannamut oqaatigerusunngilaa.
– Maannakkut
arlalinnik neqeroorfigitereerpunga, alloriaqqinnissannullu
pitsaanerpaaq toqqarusuppara. Kalaallit Nunaannut angerlarnissara
takorloorsinnaavara, qungujulluni oqarpoq.
Kalaallit Nunaat
pillugu paasissutissiinissaq "pingaaruteqarluinnarpoq“
Aaja Chemnitzip
allaffia kiap ilaasortanngorumaartussap kingornutissaneraa suli
ilisimaneqanngilaq, Christiansborgimili politikerip
misilittagaqarluartup ilaasortanngortussat nuimasariaqartut siunnersuutigaa.
– Folketingimi gruppinut
pulaaqattaartarnissaat Kalaallit Nunaallu pillugu saqqummiussinissaat
pingaaruteqarluinnarput. Partii ataasiinnaq
qitiutinneqartariaqanngilaq. Partiit tamaasa siammasissumik
suleqatiginissaat isumagineqartariaqarpoq, Aaja Chemnitz oqarpoq, nangillunilu:
- Kalaallit
Nunaannimi politikki partiimut ataatsimut politikkiunngilaq.
Danmarkimi naalakkersuisut kikkuugaluarpataluunniit partiit tamarmik
kalaallit soqutigisaat isumagisassaraat. Taamaattumik inuit
ilisarisimalerniarlugit piffissaqartariaqarputit, taakkualu
ilisarisimalissavaatsit, Aaja Chemnitz oqarpoq, taassumalu naggammik Borgenimiissalluni pilersaarutigaa –
qinersisoqarnerani unnussiuaarnermi.
