Borgmesteri: Sillimaniarneq illersornissarlu pillugit isumaqatigiissut nutaaq Ittoqqortoormiinut sunniuteqarsinnaavoq

– Mestersvig Kommuneqarfik Sermersuumut ilaanngilaq kisianni Ittoqqortoormiit illoqarfinni qaninnerpaavoq taamaattumik ineriartorneq qanittumik malinnaaffigeqqissaarparput. Immikkoortumi suliaqarnerulertoqarpat assigiinngitsutigut Ittoqqortoormiini malugineqarsinnaanissaa aaamma naatsorsuutigaarput, Avaaraq Olsen oqarpoq.

Mestersvig Tunup avannaani Nunami Allanngutsaaliukkamiippoq, taamaalilluni Kommuneqarfik Sermersuup ataaniinnani. Namminersorlutik Oqartussat ataaniippoq.

Naak sumiiffik kommunip killeqarfiiata avataaniikkaluartoq ineriartorneq malinnaaffigilluarneqarpoq. Borgmesterip naleqquttumik patajaatsumillu attaveqaasersuutinik pisariaqartitsisoqarnera tikkuarpaa.

Ittoqqortoormiini mittarfissaq nutaaq Naalakkersuisut aamma danskit naalakkersuisuisa sinaakkutissatut isumaqatigiissutiginikuunerat taassuma taamaammat eqqaavaa. Mittarfissap Nerlerit Inaanni mittarfik maanna atuuttoq taarsertussaavaa, pilersaarutilli qaqugu piviusunngortinneqarnissaat ersarissumik nalunaarutigineqarnikuunngilaq.

Avaaraq Olsenip sillimaniarnermut, illersornissamut attaveqaasersuutinullu aningaasaliissutit najukkami inuiaqatigiinni aamma ataavartumik naleqalersitsissasut naqissuserpaa.

- Tunup avannaani suliaqarneruneq najukkami inuiaqatigiinnut iluaqutaasinnaasumik attaveqaasersuutinik pitsaanerulersitseqataasinnaappat periarfissaqalersitsisinnaallunilu Ittoqqortoormiinut pitsaasuussaaq, borgmesteri oqarpoq.