Canada Nuummi konsulatimik ammaavoq

Canadap konsulatia tallimanngormat ualikkut ammarneqarpoq, tassungalu atatillugu nunanit arlalinnit sinniisut Nuummut takkupput.

Konsuali Islandimiut konsulatiata illutaani, Annaassisitta Oqaluffiata saninnguani inissisimavoq. Aallartitaq Julie Croteau konsulimik ataavartumik toqqaasoqarnissaata tungaanut konsulatip ingerlanneqarnerani pisortaagallarpoq.

- Aningaasaqarnikkut ineriartorneq, silaannakkut assartuussineq innuttaasullu akornanni attaveqaatit pillugu Kalaallit Nunaannik qaninnerusumik suleqateqarniarpugut, Canadap nunanut allanut ministeria Anita Anand Nuummi tallimanngornerup ualiani tusagassiortunik sivikitsumik naapitsinermi oqarpoq.

Nunanut allanut ministerip naalakkersuisumik Vivian Motzfeldtimik naapitseqqamminini oqaluttuaraa, ilaatigullu Canadami Kalaallillu Nunaanni Inuit pitsaasumik attaveqarnerat isumagalugulu oqilisarnissaa suliassaralugu erseqqissaavoq.

Nunanut allanut ministeri ilaatigut Nuummi konsulatimik ammaanermikkut Donald Trumpimut oqariartornersoq ilanngullugu aperineqarpoq.

Tassungalu Canadap USA-mik immikkoortuni arlalinni, soorlu illersornissamik niuernermillu suleqateqarnera, ammaanerlu Canadap nunanut allanut politikianut tunngasoq, taamaalillunilu nunanik allanik attaveqarnermut tunnganngitsoq, aallartitarpalaartumik akissutigaa.

Tikeraat nuimasut

Pilersaarut malillugu Nuummi Canadamiut tikeraat allat tassaapput generalguvernør Mary Simon, ambassadør Carolyn Bennett aamma Issittumi Ambassadøri Virginia Means.

Generalguvernør Mary Simon nammineq ukiuni qulikkaani politikikkut sulinermini Inunnit kingoqqisoq Inuit pisinnaatitaaffiinik suleqatigiinnermillu sorsuutiginnittutut ilisarisimaneqarpoq.

Generalguvernøritut Mary Simonip ullumikkut tuluit kunngiannut sinniisuuvoq, taannalu pisortatigoortumik Canadap naalagaaffianut qullersaavoq. Generalguvenøri Canadallu nunanut allanut ministeria sisamanngornermi Danmarkimut tikeraareerlutik tikipput.

Sisamanngormat timmisartoq Canadami konsulatip ammarneqarneranut atatillugu Nuummukartunik Inunnik ilaasulik tikippoq. Maanna USA-mit politikikkut tatisimaneqarnermut illersuinermik takutitsinissaq tamatumani siunertaavoq.

Canadamiut umiarsuaat Nuummut tikittoq

Taamattaaq Canadamiut sinerissami nakkutilliisuisa umiarsuaat pisumut atatillugu Nuummut tikippoq.

Canadamiut konsulatiat tallimanngornermi nalliuttorsiorneq sioqqulluguli sulilluni aallartereerpoq. Pisortatigoortumik ammaaneq ilassinninnerlu novembarimi 2025-mi pisussatut pilersaarutaaqqaarsimagaluarput. Silalli ulloq taanna Nuummut tikinnissaq ajornartimmagu, tamanna kinguartinneqarpoq.

Canada 2024-mili Kalaallit Nunaanni konsulatimik ammaanissaminik aalajangerpoq. Kingorna Frankrig taamatut aamma aalajangerpoq. Franskit konsuliat nutaaq toqqarneqaqqammivoq, taannalu aamma tallimanngornermi siullermeerluni sulivoq.

– Canadap konsulatianik ammaanerup saniatigut Issittumi isumannaallisaanikkut politikimi inissisimaneq pillugu politikikkut oqaloqatigiinnerit arlallit ingerlanneqassasut, danskit nunanut allanut ministereqarfiat ilisimatitsivoq.