Canadap Danmarkimi aallartitaa: Landryp najuunnera pisariaqanngitsumik allamut saasaataavoq

Canada Kalaallit Nunaannik tapersersuinini oqariartuutigisareerpaa, Kalaallit Nunaatalu siunissaa Kalaallit Nunaannit Danmarkimillu kisimik aalajangiiffigineqartussaasoq isumaqarluni.

Canadap ministeriunera Mark Carney Davosimi Nunarsuarmi Aningaasaqarnikkut Isumasioqatigiinnermi februarimi oqalugiarpoq.

Taassuma USA-p silarsuarmut isiginnittaasia pissaaneqarnermik, tatisinermik sioorasaarinermillu tunngaveqartoq oqaatigaa, tamannalu inuit pisinnaatitaaffiinik ataqqinninnermik, ataavartumik ineriartornermik, ataasiussuseqarnermik, naalagaaffiit namminneq oqartussaanerannik nunallu ataatsimoorneranik illuatugiliivoq.

Canada Nuummi februaarimi sinniisoqarfittaarpoq, Future Greenlandimilu ataatsimeersuarnermi naammassineqaqqammersumi Canadap Danmarkimi aallartitaa Carolyn Bennett aamma peqataavoq. Taanna USA-meersoq Ken Howery, Tuluit Nunaanneersoq Victoria Billing Frankrigimeersorlu Christophe Parisot peqatigalugit oqalugiarpoq.

Inuusuttut ataatsimeersuarnermi oqalugiartut

Carolyn Bennett Trumpip immikkut aallartitaata Jeff Landryp Kalaallit Nunaannut tikeraarnerata nalaani nunatsinniinnermini misigisai pillugit Sermitsiamiit apersorparput, aamma USA-p Danmarkimi aallartitaanik Ken Howerymik oqalliseqateqarneranut atatillugu.

– Misigisimavara inuusuttut oqalugiarnerisa ataatsimeersuarneq tamaat aallartilluaraat, Carolyn Bennett oqarpoq, innersuussutigalugulu ilinniarnertuunngorniat marluk Uiloq Bak aamma Veronica Geisler Future Greenlandip ammaanersiorneqarnerani, kalaaliuneq pissutigalugu isummiussereertarnerit nalaassimasatik, Kalaallit Nunaatalu nunarsuarmi ilisimaneqanngippallaarnera pillugu oqalugiartut.

– Kalaallit Nuinaanni innuttaasuuneq qanoq misinnarnersoq qaqilerneqarnera pingaaruteqarpoq. Nalornineq aamma misigissutsit arlariit qanoq suliarinissai nalorninartut.

– Issittumi Siunnersuisoqatigiinni ilaasortatut siulersuineq peqataatitsiffiusoq tapersersornissaa pingaaruteqartoq isumaqarpunga, taamatullu Kalaallit Nunaat Issittumi Siunnersuisoqatigiinni siulittaasuuffimmik tunineqarpoq. Aamma danskit ministeriunerata ersarissumik oqaatigaa, Kalaallit Nunaat imminut sinnerluni kisimi oqarsinnaasoq. Tamakku tamarmik Kalaallit Nunaata siunissami ineriartornissaanut tunngaviliissapput, Carolyn Bennett oqarpoq.

Allamut saasaat

Carolyn Bennett, nakorsatut ilinniagalik ukiunilu 20-ni nakorsatut sulisimasoq, Canadami inatsisartunut 1997-imit 2024-mut liberalit sinnerlugit ilaasortaavoq. Pingasoriarluni ministeriusarsimavoq. Siullermik 2003-mit 2006-imut peqqissutsimut ministeritut, taava kunngikkormiut nunap inoqqaavisalu attaveqarnerannut (2015-2021) naggataatigullu eqqarsartaatsikkut peqqissutsimut pinngitsuuisinnaajunnaarnermullu ministeriulluni (2021-2023). Canadap Danmarkimi aallartitaatut 2024-mi maajimi toqqarneqarpoq.

Kalaallit Nunaannut immikkut aallartitaq Jeff Landry Future Greenlandimi peeqataanera ajuusaarnartuusoq Carolyn Bennett isumaqarpoq.

- Oqarlanga, taassuma najuunnera pisariaqanngitsumik allamut saasaataasoq, Carolyn Bennett oqarpoq nangillunilu:

– Amerikamiut sakkutooqarfinnik amerlanerusunik pilersitsinissamik kissaateqarnerat paasinarpoq, aamma aatsitassanut pingaarutilinnut aningaasaliinerit nuannersuusinnaasut iluaqutaasinnaasullu isumaqarpunga, taamaalilluta siumut ingerlariaqqissinnaavugut. Ilisimanngilarpulli isumaqatigiinniarnerit qanoq ingerlanersut, tamannalu nalorninermik pilersitsivoq. Kalaallit Nunaanniinnera misigissutsikkut assoralisimaarnarpoq, Carolyn Bennett oqarpoq, taanna Inuit Circumpolar Councilimi ataatsimiinnermi amerikamiut konsulateqarfiata eqqaani akerliussutsimik takutitsinermut peqataanngilaq, kisianni ima oqarpoq:

- Nunap inoqqaavisa akerliussutsimik takutitsisarnerat qaqutigoortuuvoq, taamaattumik tamanna pissutsit ilungersunarnerannik ersersitsivoq.