Coding Classip kalaallit inuusuttut inuussutissarsiortullu attaveqaqatigiilersikkai

Tusassip suliniut Coding Class aqqutigalugu meeqqat inuusuttuaqqallu digitalimik piginnaaneqarnerulernissaat anguniarlugu 2020-miilli suliniutigisimavaa. Suliniut kommunit qanimut suleqatigalugit aallartinneqarpoq, maannamullu nuna tamakkerlugu 153-eriarluni pikkorissartitsisoqareerluni.

Coding Classimi ilinniartitsinermi kodelersuineq qitiuvoq, tamatumani atuartut misilittakkatik atorlugit ilinniartinneqartarlutik. Tamatumani siunertarineqarluni inuusuttuaqqat qarasaasiamiittuinnaanngitsunik piginnaasaqalernissaat, taamaalillutik teknikikkut ilisimasatik atorlugit ajornartorsiutinik piviusunik aaqqiissutissarsiorsinnaaniassammata.

Suliniut najukkami pigiliunneqarsinnaaniassammat, ilinniartitsisut 28-t ilinniartitsisinnaasussatut ilinniartinneqarsimapput, atuarfiit taamaalillutik digitalimik ineriartortitsineq ulluinnarni ingerlateqqissinnaalerlugu.

Coding Atuarfik Kilaaseeraq - Maniitsoq

Tusassimit kingullertut Maniitsumi Atuarfik Kilaaseeraq sapaatip-akunnerini 10-mi 11-milu tikeraarneqarpoq, 8. klassini atuartunik ilinniartitsisoqarluni. Tamatumani suliniut nuannarineqarluarpoq; ilinniartitsisup pisimasoq misigisaqarfigilluarlugulu atuartunut ilikkagaqarfiulluarnerarpaa. Tusass tusagassiuutitigut nalunaarummini taama ilisimatitsivoq.

- Coding Classimi atuartitsineq atuartunut amerlanerusunut misigisassarpassuaqartitsillunilu ilikkagassarpassuaqarpoq, taakkumi ulluinnarni atuarfimmi iPadimik aamma Gamingimik qarasaasiakkut pinnguaatinik atuinermik ilisimasaqareermata. Coding Classimik ilinniartitsisoq atuartitsinissaminut tulluartumik piareersarluarsimavoq tamatsinnullu inussiarnersorujussuulluni, Atuarfik Kilaaseeqqami ilinniartitsisoq Helene Heilmann oqarpoq.

Arctic Circle Businessip atuarfiit inuussutissarsiortullu attaveqaqatigiilersikkai

Maniitsumi atuarfinni ilinniartitsinermut peqatigalugu Tusass aamma Arctic Circle Business suleqatigiinnissamik isumaqatigiissuteqarput. Suleqatigiinnermi siunertarineqarluni ilinniartitsinerup piviusorpalaarnerunissaa, tamatumani atuartut Coding Class atorlugu suliamik piviusorpalaartumik aaqqiissutissarsiortinneqarlutik.

- Inuusuttut nipaasa tusaanissaat uagutsinnut assut pingaaruteqarsimavoq. Coding Class aqqutigalugu isumassarsiaat ajornartorsiutinullu aaqqiissutigisaat paasisaqarfigaavut, aamma tunniusimanerat takullugu isumassarsinarpoq. Tamatuma peqatigisaanik atuarfiup suliffeqarfiillu akornanni suleqatigiinnissaq Arctic Circle Businessimut pingaaruteqarpoq, atuartut taamaalillutik najukkami ilinniarfissatut suliffissatullu periarfissat pillugit pitsaanerusumik paasisaqarniassammata. Arctic Circle Business-imi aqutsisoq Naasunnguaq Beck Kristensen oqarpoq.

Coding Classip meeqqat siunissami ilinniarusuligassaannik isumassarsitissagai

Ulloq naggaserlugu atuartut namminneq suliaminnik takutitsipput aamma suliffeqarfinnit peqataasunit paasisimasatik pillugit suliatik oqaluttuaralugit.

Aaqqissuussinermi atuarfiup piviusumilu inuussutissarsiortut ataqatigiissinnissaat paasisaqarfigaat.

- Atuartut Coding Classip ingerlanerani unammillernartunik suliaqarnerat aamma aallussillutik aaqqiissutissarsiornerat takullugu nuanneqaaq. Atuarfimmik aamma Arctic Circle Businessimik suleqateqarneq ingerlalluarpoq, aammattaaq atuartut najukkami suliffeqarfiit ajornartorsiutaannut assingusunik suliaqarnissamut periarfissinneqarluarlutik, ilinniartitsinermut siunnersorti aamma Coding Classimik ilinniartitsisoq Nivi Thomassen Olsen oqarpoq.