Danmark aqqartartut Issittup imartaaniittut nakkutiginiarlugit timmisartunik marlunnik piniartoq

Danmark Issittumi aqqartartunik malersuillaqqinnerulissaaq.

Taamaattumik Issittumi Atlantikullu avannaani sakkutooqarnerulersinniarlugu timmisartunik imaani pisunut nakkutilliinermik atugassanik P-8A Poseidoniniik marlunnik piniartoqartussanngorpoq.

Taama illersornissamut ministeri Jeppe Bruus (S) tusagassiuutitigut nalunaarummi ilisimatitsivoq.

- Kalaallit Nunaanni naalakkersuisut qanimut suleqatigalugit illersornissaqarfiup sakkutooqarnini ukiuni kingullerni pitsanngorsarpaa, timmisartullu imarsiortut nakkutilliisut atorlugit Danmarkip nunap immikkoortuani oqartussaassutsiminik atuisinnaanera nakkutilliisinnaaneralu malunnaatilimmik pitsanngorsarneqassaaq. 

- Piniarneq Natomi ataatsimut suliassatta pimoorunneqarneranut takussutissiivoq, Jeppe Bruus oqarpoq.

Timmisartut taakku “timmisartuupput nutaaliaasut umiarsuarnut aqqartartunut akiuussinnaassuseqartut”, sakkutuullu imarsiortut akeqqat umiarsuaannik takunnissinnaanerulerlutillu akiuussinnaanerulissasut, Illersornissamut ministeriaqarfik allappoq.

Taamaalillutik danskit sakkutuui Issittumi Atlantikullu avannaani iliuuseqarnissamut periarfissaqarnerulissapput, Jeppe Bruus oqarpoq.

- Kunngeqarfiup immikkoortui tamaasa, aamma Issittoq Atlantikullu avannaa illersorsinnaasariaqarpagut.

- Natomut ataatsimoorluta illersornissaq pillugu pisussaaffeqarpugut, minnerunngitsumik aqqartartunik akiuinermut peqataanissamut tunngatillugu, Jeppe Bruus oqarpoq. 

Timmisartut P-8-t marluk illersornissamut sakkutuunut “ungasinnerusuni” malinnaaniarnermi nakkutilliiniarnermilu iluaqutaassasut, illersornissaqarfiup pisortaa Michael Wiggers Hyldgaard  oqarpoq.

- Tamanna pissutigalugu pissutsit pillugit paasinnilluarnerulissaagut, Illersornissaqarfiup pisortaa oqarpoq. 

Nunat qanimut suleqatigineqartut arlallit timmisartunik P-8A Poseidoninik imaatigut nakkutilliinermi siornaaniilli atuisartut Illersornissamut ministereqarfimmiit aamma paasissutissiissutigineqarpoq.

Taamaammat sakkutuut naalagaat timmisartut taakku pillugit Natomi maanna suleqatissarsiorpoq.

Illersornissamut ministeriaqarfik nunat assigiinngitsuneersut timmisartoqarfimmi ataatsimi ilaatigut suleqatigiissinnaalissasut aamma paasissutissiivoq.

Tassanngaanniit Danmarkip Natomilu nunat allat atortussanik pisinermi, atuutilersitsinissaq, ingerlatsineq, aserfallatsaaliineq sungiusaanerlu pillugit suleqatigiilissapput.

Ritzau//