Danmarkimi illersornissamut ministerinngorlaaq Nuummut tikeraassasoq

Danmarkimi illersornissamut ministereqarfik nutaamik ministeritaarpoq; Jeppe Bruus, taannalu ataasinngornermi juunip 22-ani nunanullu allanut, inuussutissarsiornermut aatsitassanullu naalakkersuisumik Múte B. Egedemik ataatsimeeqateqarniarluni Nuummut tikeraassaaq.

Illersornissamut ministereqarfik naapertorlugu taakku marluk Nuummi Illersornissaqarfiup pigaartui nunatsinnilu suliffeqarfiit arlallit pulaassavaat. Tamatuma saniatigut Issittumi Sakkutooqarfik pulaassavaat.

- Illersornissamut ministeritut nutaatut Kalaallit Nunaannut tikeraarnissara nuannaarutigeqaara. Nunanut allanut, inuussutissarsiornermut aatsitassanullu naalakkersuisoq peqatigalugu illersornissaqarnermut sillimaniarnermullu politikkimut tunngasuni qanimut suleqatigiinneq ingerlateqqissallugu qilanaaraara.

- Ingammik Issittoq Atlantikullu Avannaa pillugit isumaqatigiissutini marlunni suliniuterpassuit NATO-milu suleqataasut nunap immikkoortuaniittut suleqatigiinnerulernerat eqqarsaatigalugit, illersornissamut ministeri Jeppe Bruus tusagassiuutinut nalunaarummi oqarpoq.

Arlalinnik oqaloqateqassasut

Illersornissamut ministerip nunanullu allanut tunngasunut naalakkersuisup tikeraarnermini Kommuneqarfik Sermersuumi borgmesteri Avaaraq Olsen ataatsimeeqatigissavaat, aamma kalaallit suliffeqarfiutaat arlallit soorlu Air Greenland, Tusass aamma Sikuki Nuuk Harbour A/S pulaassavaat.

- Suleqatima nutaap illersornissamut ministeritut atuutilernermi kinguninngua Kalaallit Nunaannut tikeraarnissaminik, ataatsimeeqateqarnissaminillu pingaartitsinera.

- Kalaallit suliffeqarfii, Illersornissaqarfiup suliassaanik assigiinngitsutigut tapersersuisut ataatsimeeqatigissallugit immikkut nuannaarutigaara. Tamanna Kalaallit Nunaannut Issittumilu isumannaatsuunermut iluaqutaassaaq. Naalakkersuisut illersornissaq pillugu isumannaatsuunermullu tunngatillugu ammasumik ineriartornartumillu danskit naalakkersuisuinik suleqateqarnissaq kissaatigaat, tamannalu inuiaqatigiinnut kalaallinut iluaqutaassaaq, nunanut allanut naalakkersuisoq Múte B. Egede oqarpoq.

Illersornissaqarfiup pisortaa Michael Wiggers Hyldgaard aamma peqataassaaq.

Jeppe Bruus siornatigut naalakkersuisooqatigiinni grøn trepartimi ministeriusimallunilu (2024-26) akileraartarnermut ministeriusimavoq (2022-24).