Danmarkimi ornittagaq: Atuisut namminneq aalajangiisarput

Amagerimi Sankt Elisibeth Hospitaliusimasoq quleriit aappaanni napparsimmavimmi uninngasunut ornittagaq sannaviutigisoq Maskine Maskine inissisimavoq.

Tassani katsorsaasoqanngilaq, atuisulli namminneq kajumissutsiminnik takkuttarlutillu tarnikkut nappaatillit allat qalipaaqatigalugit, mersorlutik, titartaallutik, nipilersorlutik, atuakkanik atuarlugit nerisassioqatigiittarput.

Illoqarfiit pingaarnersaanni immikkoortortaqarfik inimik piginnittuuvoq. Atuisunut namminneq isumagineqartussanngorlugu ini akeqanngitsumik atorneqarsinnaatillugu. Suliassat suliariuminartut ilaasa suliarisarpat, ilaallu sannavimmi suliaqartarlutik.

Malittarisassarpassuaqanngilaq — taamaattoq aalakoorluni ikiaroorluniluunniit inimiittoqarsinnaanngilaq. Pisariaqartikkaanni nalaasaartoqarsinnaavoq, tamanna ajunngilluinnarpoq.

Ini kiffaanngissuseqarfiusoq

Matumi "Iserit pilersitsillutillu” sangujoraartunik allassimavoq, matullu aappaani annoraamineq ilusilersorneqarsimasoq "Anersaalisimaarluni mersorneq" allaqqavoq. Qalipakkat sumi tamaani nivingapput, ilusilersukkat, qiperukkallu takussaapput.

Taanna 6.00 m2-mik angissuseqarpoq, Københavnillu eqqaani tarnikkut nappaatillit kiffaanngissuseqarlutik, naqqissorneqaratik isersimaartarfigaat. Tamaanilu inuit allat peqatigineqarsinnaallutik.

– Maani nappaasersorneqarneq ajorpugut, ilassineqatarpugulli. Inuillu iliusaat pillugit tikkuartuineq ajorpugut, taamaattorli nammineq pissusilersuutigut allanut sunniutsinnaveersaartarpagut, ulluinnarni aqutsisoq Johanne Filipsen oqarpoq, taanna kisiartaalluni tassani atorfeqarpoq, taamatullu kisiartaalluni tarnikkut napparsimasuunani.

Napparsimasut iluaqutaasutut isigineqarput

Johanne Filipsenip saniatigut ullup ilaa 15-it sulisarput, taakkuli aamma nappaataat suussusersineqarnikuullutik. Maskine-Maskine-mi napparsimasut akisussaaffeqalernissaat siunertaavoq, tamanna kivitseqataasarmat piginnaanngorsaataallunilu. Allat ikiornerisigut imminut aamma ikiornerusarmat.

Søren Dixen Maskine Maskine-mik isumassarsisuuvoq. Taanna inuunermi annersaani tarnikkut nappaateqarpoq, Nuummilu oktobarimilu Nunamed-imi ataatsimeersuarnermi suliniut ima qulequtalik saqqummiullugu: ”Tarnikkut nappaateqartut imminnut isumassoqatigiinnissaannut piginnaanngorsarlugit – Københavnimit maligassiuineq”.

– Napparsimasut sulisinnaanerat suiunertaavoq, qanorlu piginnaasaqarnertik takutissinnaalerunikku isumalluutaasinnaakutsoorlutil, Søren Dixen 2019-imi Maskine Maskinemik aallartitsisoq oqarpoq, taannalu Oak Foundation Danmarkimit suliniummut 2023-mi annertuumik tapiiffigineqarpoq.

- Ullormut agguaqatigiissillugu napparsimasut 35-40-t maannartarput, allanik nuannisaaqateqarlutik, atuarlutik imaluunniit nerisassanik 10 koruunilerlugit pisiarineqarsinnaasunik nerillutik. Atuisullu nammineq nerisassiortarput, Søren Dixen oqarpoq.

Kalaallit atuisut

Panéraq Rémy Nuummeersoq aamma Martha-Marie Jensen Qaanaameersoq ornittakkamukakulasarput.

Panéraq Rémy mersorpoq, Martha-Marie Jensenilu atisanut naqiterillunil

– Maanga takkuttarnera nuannaraara, tassanimi nutaaliortoqartarpoq allallu qanoq iliornersut takuneqarsinnaallutik. Iserfigiuminarpoq, akuersaarneqarluni. Napparsimasutut katsorsaaviunngilaq, maani napparsimasutut isigineqarneq ajorpugut, Panéraq Rémy Nuummi inunngortoq sisamanillu ukioqarluni ataatani qallunaaq anaananilu kalaaleq peqatigalugit Djurslandimut nuuttoq oqaluttuarpoq.

- Angerlarsimaffinni mersorsinnaagaluarpunga, kisianni maanga takkullunga allanillu mersoqateqartarnera nuannaraara. Nuannerpoq toqqissisimanarlunilu, oqarpoq.

Kikkut tamarmik inissaqartinneqarput

"Anersaalisimaarluni" mersortarnerup saniatigut allanik aamma sammisassaqarpoq. Assersuutigalugu nammineq titartagaq atorlugu T-shirtimut naqiterisoqarsinnaavoq.

Martha-Marie Jensenip 24-nik ukiullip tamanna misilittarpaa.

– Eqqumiitsuliornermik pikkoriffeqarpallaanngilanga, kisianni tujuuluaqqamut allannissamik isumassarsivunga, taannalu sanavarput. Ornittagaralugu nuannerpoq. Tamaani namminiussuseqarsinnaavugut, paasineqarsinnaalluarlutalu, tassami tamaani atuisut tamarmik arlaannik unammilligassaqarput, Martha-Marie Jensen Qaanaameersoq oqarpoq.

– Eqqumiitsuliornermik suliaqarnissamut piumassuseqarnerulerpunga, maani neqeroorutaammat, nuannaraaralu eqqumiitsulianik ulikkaarnera, misigisimavungami uangattaaq inissaqarlunga.

Katsorsaanermut tapertaasoq

Johanne Filipsen naapertorlugu napparsimasut ilarpassui katsorsaariaatsinit assigiinngitsuneersunit artornartorsiortinneqartarput, tassanilu Maskine Maskine oqimaaqatigiissaarisuuvoq:

– Amerlasuut angerlarsimaffeqanngitsuuneq atornerluisuunerlu misigereernikuuaat, taamaammat maanga orniguttartut ilarpassuisa inuunerup aqussinnaajunnaarneranik aqqusaagaqarnikuupput. Tassani inuunerminnik namminneq aqutsilernissaat pineqarpoq. Akisussaaffimmik tigusineq eqqumiitsuliamillu iikkamut nivinngarsinnaanerat. Tamanna ineriartornarpoq, Johanne Filipsen oqarpoq.

Søren Dixenip Nuummi Ilulissaniluunniit assingusumik neqerooruteqarnissaq sulissutigaa.