Danmarkimik USA-millu ataatsimeeqatigiinnerit aqagu aallartissasut

Ataasinngornermi 8. December aamma marlunngornermi 9. December Joint Committeemi Permanent Committeemilu Nuummi ataatsimiinnerit ingerlanneqassapput.

Kalaallimmi Nunaat maanna Kalaalit Nunaata, Danmarkip USA-llu akornanni ukiumoortumik ataatsimeeqatiginnerni qaaqqusisuuvoq.

Taama Nunanut allanut Ilisimatusarnermullu Naalakkersuisoqarfik ilisimatitsivoq.

Atuakkit aamma

Kalaallit Nunaat Danmarkilu USA-mik Nuummi decembarimi naapissapput

- Joint Committeemi Permanent Committeemilu ukiumoortumik ataatsimiinnerni Kalaallit Nunaanni qaaqqusisuusinnaanerput nuannaarutigaarput. Komitémi ataatsimiinnerit immikkoortuni arlalinni inuinnarnut sakkutooqarnermullu attuumasuni toqqaannartumik oqaloqatigiinnernik suleqateqarnermillu siuarsaasuupput.

- Ataatsimiinnerni oqaloqatigiittarfinni pioreersuni taakkunani issiaqatigiilluta kalaallit amerikamiullu soqutigisaasa ataqqineqarlutik illuaqungeriinnut tamanut iluaqutsiisumik siuarsarneri qulakkeertarpavut.

- Suleqatigiinnerni suniluunniit tatigeqatigiinneq ataqqeqatigiinnerlu tunngaviusarput, taamaammallu ukiut qaangiuttut ilungersunartuusimanerat isertuunneqarsinnaanngilaq. Taamaammat killiffilersuinissaq qanorlu qanittumik iligiittut immikkoortuni ataatsimut soqutigisaqarfigisatsinni suleqatigiinnermik ineriartortitsisinnaanitta oqaloqatigiissutinissaa Naalakkersuisut qilanaaraat, nunanut allanut ilisimatusarnermullu naalakkersuisoq Vivian Motzfeldt (S) oqarpoq.

Qaqqusisuuneq paarlakaattumik ingerlanneqartartoq

- Danskit kalaallillu Nuummi decembarip aallartinnerani Joint Committeemi Permanent Committeemilu ataatsimiinnissamut amerikamiut aallartitaat qaaqqusimagaat Det Hvide Hus Politikenimut novembarip naalernerani mailikkut allappoq.

Joint Committeemi ukiumoortumik ataatsimiinnerit killiffissiuinissaq Kalaallillu Nunaata USA-llu immikkoortut pingaarutillit akimorlugit suleqatigiinnerup siuariartorneranik oqaloqatigiissuteqarnissat siunertaralugit atorfilittatigoorumik ingerlanneqartarput. Ataatsimiinnerni danskit naalakkersuisuisa atorfilittaat aamma ilaasarput.

Permanent Committeemi ataatsimiinnerni Naalakkersuisut, danskit naalakkersuisuisa amerikamiullu naalakkersuisuisa sinniisui ataatsimeeqataasarput. Permanent Committee siunnersueqatigiinnissat pissutsinillu USA-p Kalaallit Nunaanni sakkutooqarnikkut najuunneranut attuumassuteqartunik paasissutissanik paarlaateqatigiinnerit oqilisaaviginiarlugit pilersinneqarpoq.

Komitémi ataatsimiinnermi qaaqqusisuunerit Kalaallit Nunaata USA-llu nikittaallutik ingerlattarpaat. Siorna taatsimiinnerit USA-mi ingerlanneqarput, Kalaallillu Nunaata taamaalilluni peqataasussat Nuummut tikilluaqqunissaat qilanaaraa.

Permanent Committee 1991-mi Kalaallit Nunaanni Namminersornerullutik Oqartussanit danskillu naalakkersuisuinit kiisalu amerikamiut naalakkersuisuinit USA-p sakkutooqarnikkut Kalaallit Nunaaniinneranut atatillugu paasissutissanik paarlaateqatigiittarnerit oqilisaaviginiarlugit pilersinneqarpoq.

Joint Committee 2004-mi pilersinenqarpoq pissutsinillu inuinnarnut attuumassuteqartunik suliarinnittarluni.