Danskit aviisii isumaqatigiissut pillugu: Trumpi kisimi pinnani sinneri ajugaasut

Politikikkut suliarilluagaq danskillu kalaallillu aallartitaannut ajugaanerujussuaq Kalaallit Nunaannik isumaqatigiissutissap ilisarnaatigaa. 

Taama aviisit arlallit pingaarnertut allaaserisaminni isumaqatigiissut Amerikamiut præsidentiata Donald Trumpip, tallimanngornermi danskit nalunaaqutaat malillugu unnulluarnerani USA-p, Kalaallit Nunaata Danmarkillu akornanni naammassineqartoq nassuiarpaat. 

Ulluni aggersuni illuatungeriit isumaqatigiissut, amerlasuut Amerikamiut præsidentiata iluaqutissarisaanik takusaqarfigiuminaatsitaat atsiussagaat ilimagineqarpoq. 

Isumaqatigiissummi immikkuualuttut suli ilisimaneqanngimmata, “nutaartai” sumiinnersut takujuminaatsoq, Jyllands-Posten allappoq. 

Aviisip isumaqatigiissutissaq aallartitat “atornikuerniarfianni” nassaatut taavaa. 

- Ukiuni pissanganartorsiorluni aalassassimaareernermi, oqaatsit atorlugit akersuutereerluni aallartitallu matut matoqqasut tunuanni sulereersut, immikkut ilisimasallit oqaatigisaat malillugu, USA-p 1951-mili naalagaaffeqatigiinnik isumaqatigiissutaanut assingusoq naammassineqarpoq. Tassa oqaatigisinnaasat. 

Nillerratinngilaarallarta  

Taamattaaq Politikenip isumaqatigiissut Danmarkimut Kalaallillu Nunaannut ajugaanerujussuartut nassuiarpaa. 

Isumaqatigiissuteqarfigisarli Amerikap præsidenterimmagu, nillerrannissaarsuaq uatsilaarallartariaqartoq, pingaarnertut allaasersisami taama allattoqarpoq. 

- Isumaqatigiissutip oqaasertai suli tamanut saqqummiunneqanngillat, Donald Trumpilu akuutillugu pilikki panertinnagu skåleernissaq utaqqisinneqarallartariaqarpoq – tamatumalumi kingorna sorpassuit aamma pisinnaasut naluneqanngilaq – maannakkumulli ilungersunartorsiorneq qaangiuttutut isikkoqarpoq, tusagassiorfik allappoq. 

Trumpiaasit eqqarsaatigilluagaanngitsumik iliuuseqassava? 

Kristlig Dagbladilu aamma qularpoq, taakkulu maanna Kalaallit Nunaata Danmarkillu eqqissiallassinnaagunartut allappoq.  

Trumpilli isumaqatigiissutip oqaasertai qanoq saqqummiutissanerai, maannakkumilli pisussat sillimmartaarfiginissaat isumatusaarnerussasoq, aviisi allappoq. 

Isumaqatigiissulli piffissap qiteqqunnerani Amerikamiut qinersinissaannut iluaqutsiisinnaasoq, tusagassiorfiup erseqqissaatigaa. 

- Allanulli tamanut præsidentip ulluni aggersuni eqqarsaatigilluagaanngitsunik oqariasaartarnini noqissinnaanera, isumaqatigiissutillu allanngortinnissaanik piumasaqariasaannginnissaa imaluunniit imarinngisaanik imaqarnerassaneraa pissanganassasoq, aviisi allappoq. 

Kalaallit Nunaat pillugu suliaq tamarmi nunarsuup qanoq Donald Trumpimik ilisarisimanninneranik takutitsisoq, Kristeligt Dagbladip ilanngullugu oqaatigaa. 

Suunngitsunnguit sorsuakkiarisarpai.