MOTOORI
Danskit umiatsialiortartut nutaat Kalaallit Nunaanni iluarineqarlualersoq
Danskit suliffeqarfiutaat Tuco Group ApS issittumi inuussutissarsiutigalugu aalisariutinik ilaasunillu angallassissutinik sanasarpoq. Angallatiliaat ProZero Disko Linemit aamma Albtratros Arctic Circlemit pisiarineqareerpoq, sanaartortartullu Nuummi suleqatissaminnik ujaasipput.
Albatros Arctic Circlep angallat ProZero 13,5 meteriusoq Tuco Groupimit 2024-mi pisiaraa. Angallat Kalaallit Nunaata imartaani angallassissutinngorlugu immikkut sanaajuvoq, aamma Kalaallit Nunaanni imaatigut angallannermi malittarisassat immikkut ittut malillugit ilaasut aqqaneq-marlunnik tikillugu angallassinissamut Imarsiornermik Aqutsisoqarfimmit akuerineqarsimalluni.
Assi: Tuco Group
Danskit angallatinik sanaartortartut Tuco Group ApS, Faaborgimi Fyn-imiittumi amutsiveqartoq, issittup imartaani imaannaanngitsumi tulluarsakkanik immikkut ilisimasaqarput.
Disko Linep aamma Albatros Arctic Circlep ProZero pisiareereerpaat, maannalu suliffeqarfiup Nuummi suleqatissaminik ujartuinini ingerlappaa, assersuutigalugu isumaqatigiinniarnernut aserfallatsaaliuinermullu tunngatillugu suliaqartartussanik. Tuco Group pisortaaneq Jonas Pedersen oqarpoq.
– Kalaallit Nunaanni niuersinnaanngornissarput sivisuumik anguniarsimavarput. Tunisassiavut tulluartuusut isumaqarpugut, maannakkullu Nuummi suleqatigisinnaasatsinnik oqaloqateqarpugut.
Angallatit ProZero-mik taaguutillit inuussutissarsiutigalugu angallatitut sanaajupput, glasfiberiupput imaanilu peqqarniissinnaaqisumi ingerlasinnaanngorlugit sanaajullutik.
Angallatit ilusaat assigiinngitsut 300-nit amerlanerusut pingasunik tunngavillit ProZero-mi pigineqarput, pisortaq Jonas Pedersen oqarpoq.
Assi: Tuco Group
Atuisup pisariaqartitaanut naleqqussaasoqarsinnaasoq
Angallatit misilittarluarlugit qularnaarlugit sanaartugaasut tunisassiortup oqaatigaa. Angallatip qaava atuisup pisariaqartitaanut naleqqussarneqarsinnaalluni. Assersuutigalugu Albatros Arctic Circlemut angallat ulluinnarlugu angallassisarneranut arfernillu takornariarnermut naleqqussaavoq, initaani sammisassaqarfiulluarsinnaalluni, qaavanilu isikkivimmut isiginnaartoqarsinnaalluni.
Angallatit ilaasunik angallassinerup saniatigut Kalaallit Nunaata imartaani assigiinngitsunik imaatigut suliaqarnissamut tulluartuunerarneqarput, tunisassiortoq ilisimatitsivoq.
Angallatit nutaaliaasunik angallassinermut isumannaallisaanermullu aamma atortorissaaruteqartarput, soorlu radarimik, itissusersiutinik ikuallannermillu nammineq qamisaasartoqarlutik.
Kabini 12-nik ilaasoqarsinnaasoq.
Assi: Tuco Group
– Angallatitta sulinermut atortut pitsaaqutai tassaapput milerarluarnikuunerat, atuisullu pisariaqartitaanut naleqqussarsinnaanerat. Tamanna sukkassutsimut ingerlatsinermullu tunngatillugu toqqissisimanermik aamma atuisut ataasiakkaat immikkut pisariaqartitaannut naleqqussarnissamut eqaannerusumik periarfissiivoq, Jonas Pedersen oqarpoq, taannalu Kalaallit Nunaanni ProZero-mik pisisimasunik pitsaasumik utertiffigineqarpoq.
- Ingerlaarluarsinnaanerat iluarineqartoq utertiffigineqarnikuuvugut, Jonas Pedersen oqarpoq.
Danmarkimi sanaartorneqartut
Angallatit pisisartut pisariaqartitaannut naleqqussarlugit sanaajupput, naammassereerlugillu 8-15,99 meterit akornanni takissuseqarlutik.
- Angallatitta ilusaat assigiinngitsut 300-nit amerlanerupput, tamarmik pingasunik tunngavillit, Jonas Pedersen oqarpoq.
Angallatit Danmarkimi Faaborgimi tamarmik sanaartorneqartarput, Tuco 1998-imiilli umiarsuarnik immikkut ittunik sakkutuunut inuinnarnullu sanaartortartuuvoq.
