Det Hvide Husip Trumpip Zelenskyjllu sapaami ataatsimeeqatigiinnissaat uppernarsarpaa
Sapaatip akunnerata naanerani ataatsimiinnernik ingerlatassani naalagaaffiit pisortaasa marluk ataatsimeeqatigiilivinnerat, Det Hvide Husip uppernarsarpaa.
Sapaammi præsidentit marluk taakku Floridami naapissasut, Det Hvide Husimi ataatsimiinnissanik ingerlatassanik pilersaarutini allassimavoq.
Assiliisoq: Brendan Smialowski/Ritzau Scanpix
USA-p præsidentiata Donald Trumpip, Ukrainellu præsidentiata Volodymyr Zelenskyjip sapaammi Floridami ataatsimeeqatigiinnissaat pilersaarutigineqarpoq.
Tamanna nutaarsiassaqartitsivik dpa naapertorlugu Det Hvide Husip uppernarsarpaa.
Sapaatip akunnerata naanerani ataatsimiinnissanut pilersaarutini, Floridami Palm Beachimi tassani nalunaaqutaq naapertorlugu ualikkut pingasunut ataatsimiittoqarnissaa, Det Hvide Husip uppernarsarpaa. Ataatsimiinneq nunatta nalunaaqutaa malillugu unnukkut arfinernut, Danmarkillu nalunaaqutaa malillugu unnukkut qulingiluanut ingerlanneqassaaq.
Nutaarsiassaqartitsivik The New York Times aamma ataatsimiinnissanik ingerlatassanik pilersaarummik nassinneqarpoq, tassanilu præsidentit marluk taakku ataatsimiinnissaat aamma allassimavoq.
Zelenskyjip tallimanngormat Trumpimik ataatsimeeqateqarnissani nalunaarutigaa, tamannali ingerlaannartumik Det Hvide Husimit uppernarsarneqanngilaq.
- Sapaatip akunnerata naanera, sapaammiussagunartoq præsident Trump ataatsimeeqatigissavarput, Zelenskyj nutaarsiassaqartitsivik AFP malillugu oqarpoq.
Zelenskyjip Trumpillu ataatsimiinnissaat USA-p Ukrainemik Ruslandimillu ukiuni sisamani sivisussusilimmik sorsuunnerup qanoq unitsinneqarsinnaanera pillugu pilersaarummik oqaloqatiginninnerata ingerlanneqarnerini pissaaq.
Arfininngornermi EU-Kommissionip siulittaasua, Ursula von der Leyen Zelenskyjmik EU-milu nunat qullersaannik allanik oqarasuaatikkut oqaloqateqassaaq. Taama von der Leyenip oqaaseqartartua nutaarsiassaqartitsivik Reuters naapertorlugu oqarpoq.
Internetikkut nutaarsiassaqartitsivimmik Axiosimit apersorneqarluni Zelenskyj, eqqissinissamut pilersaarut pillugu innuttaasunik taasititsinissamut piareersimalluni tallimanngornermi oqarpoq – tassa Ruslandip akersuunnermik unitsitsinissaq akuerissappagu.
Ukrainemiut nunatami ilaanik allatut ajornartumik tunniussinissamik akuersisariaqassappata, Ukrainep innuttaanit tamatuma akuerineqarnissaa pisariaqartissinnaallugu, Zelenskyj siusinnerusukkut oqarpoq.
Pilersaarutini oqaloqatigiissutigineqartuni immikkuualuttunut pingaarutilinnut Ukrainip isumannaatsuunissaanut qulakkeerinninnerit kiisalu nunamik taassumalu aningaasaqarneranik sanarfeqqinnissaq ilaapput.
- Pappiaqqat isumannaatsuunissamillu uppernarsaatit oqaloqatigiissutigiumavagut, Zelenskyj tallimanngornermi tusagassiortunut oqarpoq.
- Apeqqutinut mianernartunut Donbasimut Zaporizjzjamilu atomip nukinganik innaallagissiorfimmut tunngasut oqaloqatigiissutigiumavagut, allalli aamma oqaloqatigiissutiginissaat qularnanngilaq, taanna oqarpoq.
Ruslandip viceudenrigsministeria Sergej Rjabkov, tallimanngornermi russit tv-qarfiannut, eqqissinissamut isumaqatigiissummik angusaqarnissaq ajornakusoorsinnaasoq oqarpoq. Tamannalu Rjabkov naapertorlugu Ukrainep Amerikamiut eqqisseqatigiinnissamut pilersaarutaannut ”allannguutinik annertuunik” ilanngussisimaneranik patsiseqarpoq.
