Disko Line umiarsuaatileqatigiiffiup umiarsuaa nutaajunerpaaq annersaalu Maliina Ittuk Qaqortumi mittarfik nutaaq ammarneqarpat atorunnaarsinniarlugu aalajangerpoq.
Mittarfik ammarneqarpat Maliina Ittuk Qeqertarsuup Tunuanut nuunneqarumaartoq aallaqqaammut pilersaarutigineqarpoq, tassanilu umiarsuaq 113-inik ilaasoqarsinnaasoq Ilulissat Qeqertarsuullu akornanni angallassinermi atorneqartussatut naatsorsuutigineqarpoq.
Disko Line umiarsuaatileqatigiiffiup umiarsuaa nutaajunerpaaq annersaalu Maliina Ittuk Qaqortumi mittarfik nutaaq ammarneqarpat atorunnaarsinniarlugu aalajangerpoq.
Mittarfik ammarneqarpat Maliina Ittuk Qeqertarsuup Tunuanut nuunneqarumaartoq aallaqqaammut pilersaarutigineqarpoq, tassanilu umiarsuaq 113-inik ilaasoqarsinnaasoq Ilulissat Qeqertarsuullu akornanni angallassinermi atorneqartussatut naatsorsuutigineqarpoq.
Umiarsualiviit pisariaqartitat kiorpassuarni umiarsuarmik ingerlatitseqqissinnaanissamut qulakkeersinnaasimannginnatsigit taama aalajangiisoqarpoq.
- Maliina Ittuk aalajangersimasumik umiarsualiveqartariaqarlunilu innaallagissamik nunameersumik pilersorneqarsinnaasussaq aalajaatsumik talittarfissaqartariaqarpoq – ingammik ukiukkut, Disko Linemi pisortaaneq Michael Højgaard nassuiaavoq.
- Qaqortumi taamaaliortoqarsinnaasimanngilaq – aamma Ilulissani, Maliina Ittuup siunissami angalasarfissaraluani.
Patajaatsumik umiarsualiveqarnissaq
Maliina Ittuk siorna oktobarimi Qaqortumut tikimmat.
Assi: Hans-Peter N. Bay - Alluitsup Bay
- Umiarsuaq nuutseqattaartannginniassagatsigu aalajangersimasumik umiarsualiveqarnissamut tunngavoq. Ajoraluartumik tamanna qulakkeerneqarsinnaasimanngilaq, tamatumalu kingunerisaanik ingerlatsinermi unammilligassaqarpugut, silarluttoqarnerani navianartoqarnerusarpoq umiarsuarlu ajoqusernaveersaarniarlugu arlaleriarlunilu unnuakkut nuuttariaqartarluni.
- Pissutsit pingaartumik sulisutsinnut sunniuteqarput – tamannalu siunissaq ungasinnerusoq eqqarsaatigalugu attanneqarsinnaanngilaq. Sulisut piffissaat umiarsuup nuunneranut atornagu ilaasunik angallassinermut atorusunneruarput.
Tamanna oqitsuinnaasimanngitsoq Michael Højgaard oqaluttuarpoq.
- Teknikkikkut ingerlatsinermilu suusinnaasut tamaasa eqqartorpagut, inuttagullu immikkut ittumik iliuuseqarsimapput. Umiarsuarmili tunngaviusumik atugassarititaasut qulakkeerneqanngippata isumannaallisaaneq ingerlatsinermilu akisussaaffeqarneq naapertorlugu iliuuseqartariaqarpugut.
Disko Linep isumaqatigiissut maanna atuuttoq Qaqortumi mittarfiup ammarnissaata tungaanut ingerlatiinnassavaa. Disko Linemi sulisut aalajangerneq pillugu sulisut ippassaq ataatsimiisinneqarneranni ilisimatinneqarput.
Umiarsuaq akisooq Maliina Ittuk siunissami qanoq pineqassanersoq suli aalajangerneqanngilaq. Michael Højgaardilli umiarsuup nunanut allanut tunineqarsinnaanera periarfissaanerarpaa.
Maliina Ittuk Topas Explorer Groupimut, Disko Linemik piginnittumut, maannamut unammillernartoqartitsisimavoq. Umiarsuup sananeqarnera 2019-imi aallartippoq. Umiarsualiorneq tamatuma kingorna coronamit aamma ajutoornernit arlalinnit eqqorneqarpoq, taamaammallu aatsaat 2025-mi ukiakkut umiarsuaq kiisami atorsinnaanngorpoq.
Kinguaattoornerit umiarsuarmillu sanaartorneq akisusimapput. Topas Explorer Groupip 2024-mut ukiumoortumik naatsorsuutaani umiarsuaq ’Sanaartornermut atortussanik suliarineqartumik’ katillugit 93.467.692 koruuninik naleqarnerarneqarpoq.
Maliina Ittuk Disko Linep umiarsuaataani annersaasoq 113-inik ilaasoqarsinnaavoq. Orsertagaallunilu innaallagiatortutut sanaajuvoq, innaallagiamik dieselimillu orserlugu ingerlasinnaalluni.
