Eqqartuussisoq inuulluaqqusillunilu qujavoq: Tamaaniinnera immikkut pisinnaatitaaffiuvoq

Stig Nørskov-Jensen Kalaallit Nunaanni Eqqartuussivimmi eqqartuussisut pisortatut ulluni makkunani soraarninngortussanngorpoq.

Stig Nørskov-Jensen Kalaallit Nunaanni eqqartuussisunut ukiuni arfineq-marlunni kingullerni pisortaavoq, Københavnillu Eqqartuussiviani allattoqarfimmi tamatuma siorna pisortaanikuulluni.

Assi: Oscar Scott Carl

Morten Okkels Morten Okkels Tusagassiortoq

Saqqummersinneqarpoq 28. Juuli 2026 - 17:32

Kalaallit Nunaanni Eqqartuussiviit Allattoqarfianni, eqqartuussisut pisortaat Stig Nørskov-Jensen juulip naanerani soraarninngussaaq.

Naalagaaffiup iluani taamaasilluni ukiuni 42-ni kiffartuussivoq, taakkununnga ilanngullugit ukiut arfineq-marlut kingulliit Kalaallit Nunaanniilluni.

– Kalaallit Nunaanni Eqqartuussivimmi aamma nunap immikkoortuini eqqartuussivinni aqutsisuuneq, sulisullu pikkorissut peqatigalugit Kalaallit Nunaanni eqqartuussiviit ineriartortinneqarneranni peqataaneq immikkut pisinnaatitaaffiuvoq, Stig Nørskov-Jensen oqarpoq.

Ussassaarut

– Unamminartut ukiut ingerlaneranni amerlaqaat, ilaatigut Covid-19 pissutigalugu, suliassat amerlasuut pissanganartut, misigisallu nuannersut aqqusaarpavut. Eqqartuussivik, suleqatigisimasakkalu tamaasa qutsavigingaarpakka.

Stig Nørskov-Jensenip nulianilu Danmarkimi soraaninngornissartik maanna eqqissillutik atussavaat, qilanaarpullu. Kalaallit Nunaanniillu nuunnissamik aalajangerniarneq oqitsuinnaasimanngilaq.

- Kalaallit Nunaanniinnera inuuninni pingaaruteqarnerpaat puigunaannerpaallu ilagaat, Stig Nørskov-Jensen oqaluttuarpoq.

Stig Nørskov-Jensenip kingoraartissaatut atorfik inuttassarsiuunneqalereerpoq sulilu qinnuteqartoqarsinnaalluni. Eqqartuussisoq Kirsten Hee Larsen maannamut aggustip aallaqqaataaniit atorfik akisussaaffigigallassavaa.