Eqqartuussivimmiit e-Boksikkut aggersarneqarsinnaanngungajalerputit
Kalaallit Nunaanni Eqqartuussivik eqqartuussinermi sulianut attuumassuteqartunut ilisimannittunillu e-Boksi atorlugu marsip aallaqqaataani aggersaasinnaalissaaq. Allakkat pisussaaffiliisut pineqarput, eqqartuussisuuneq naqissusiivoq.
Eqqartuussisoq Stig Nørskov-Jensen oqarpoq, Digitalimik aaqqiissut aamma innuttaasunut iluaqutaassaaq.
Assi: Oscar Scott Carl
Kalaallit Nunaanni Eqqartuussivik nalunaarutinut digitalimik marsip aallaqqaataaniit periuseqalissaaq.
Tassa eqqartuussiviup e-Boks aqqutigalugu inuk eqqartuussivimmi sassartinneqartussaasoq, qaaqquneqartussaasoq imaluunniit eqqartuussivimmi aalajangiiffigineqartussaasoq nalunaarfigisalissavaa.
Eqqartuussiviit assigiinngitsutigut aggersaasarput, ilaatigut politiit ikiortigalugit oqarasuaatikkulluunniit. Tassa maanna atortorissaarutit digitaliusut atorlugit nalunaaruteqartoqartalissaaq.
Nalunaarutinik anngussisarneq nutaaq aggersarneqartut aamma iluaqutigisinnaavaat, Kalaallit Nunaanni Eqqartuussivimmi eqqartuussisuuneq isumaqarpoq:
- Amerlasuut politiiniit orniguffigineqanngikkaluarlutik sulinerminniluunniit sianerfigineqanngikkaluarlutik e-Boksikkut nalunaarfigineqarusunnerussasut ilimagaara, Stig Nørskov-Jensen oqarpoq.
Nalunaarut pisussaaffiliisoq
Stig Nørskov-Jensenip nittartakkagut aggersaanerit nutaat innuttaasunut allatigut aggersaanertuulli pisussaaffiliisuusut erseqqissarpaa.
- Nittartakkatigut allakkat ammarneqareerpata nalunaarut tiguneqarsimasutut tunniunneqarsimasutullu takusinnaassavarput. Aamma peerneqareersimappata taamaappoq, tamatuma kingorna takkuttussaatitaaneq atuutissaaq, tassa eqqartuussinermut aggersaaneq taama ippoq, eqqartuussisuuneq oqarpoq.
Pissutissaqanngitsumik eqqartuussivimmut ornigutinnginneq inerteqqutaavoq, suliallu kinguaattooraangata tamanna eqqartuussisunut ajornartorsiortitsillunilu aningaasartuutaalersarpoq.
Kalaallit Nunaanni Eqqartuussivik nittartakkatigut aaqqiissut nutaaq tamakkiisumik atuutilersinneqariartuaassasoq ilisimatitsivoq. Siullermik eqqartuussivinni inuinnaat suliakkiissutaanni atuutissaaq, kingusinnerusukkut aningaasanik akiliisitsiniarnermi kingornalu pinerluttulerinermi suliaqarnermi.
Inuit ilaasa digitaliusumik allagarsiivik piginngippassuk eqqartuussiviit allakkatigut nalunaarutinik nassiussisinnaasassapput.
