Eqqissiviilliortitsinerit, aserorterinerit tillinniarnerillu suli amerlapput

Kalaallit Nunaanni Politiit piffissami matumani nalliuttorsiorfiusumi, nuannersumik, kissalaartiumik ilaqutariinnilu eqqissisimasumik katersuuffigineqartussaasumi, ulloq unnuarlu suli ulapittuarsinnarput, eqqissiviilliornernut, aserorterinernut, tillinniarnernut imigassartorsimallutillu pisunut nuna tamakkerlugu orniguttaqattaarlutik.

- Ullup unnuallu ingerlanerani ulapippugut, pingaartumik aalakoornartulimmik imigassartorsimanerup kinguneranik pisunut, kisianni aamma eqqissiviilliornernut, aserorterinernut, tillinniarnernut tillinniarniarlunilu misiliinernut, Kalaallit Nunaanni Politiini nakkutilliisut pisortaat, Thomas Jeppesen oqaluttuarpoq.

Uani pisorpassuit ilai pillugit oqaluttuarpoq:

Aserorterinerit

Nuummi sapaammi ullakkut nal. 08:33 nalunaarutigineqarpoq meeqqerivimmi aserorterisoqarsimasoq:

- Meeqqerivimmi igalaat aserorterneqarsimapput, Thomas Jeppesen oqaluttuarpoq.

Aserorterineq alla aamma politiinut nalunaarutigineqarpoq:

- Nuummi angerlarsimaffik aamma aserorteriffigineqarsimavoq, matu igalaallu aserorterneqarsimallutik, tassunga atatillugu inummik tigusarinnippugut pisumi pineqartoq unnerluutigineqassammat.

Tillinniarnerit

Ilulissani inuk kommunip allaffianut tillinniarniarsimasoq:

- Kalerrisaarut aallartippoq kommunip allaffiani Ilulissani, arfininngornermi nalunaaqutaq 12:22 tamanna politiinut nalunaarutigineqarpoq Matu-securitymiit  angut kommunip allaffianut iserniarsimasoq kissarsuuteqarfik aqqutigalugu, kisianni angutip tillinniarniarnera iluatsinngilaq, politiillu suliaq misissuiffigaat pinerluttuliortorlu kinaassusersiniarneqarpoq.

Sisimiuni politiit nalunaarfigineqarput meeqqerivimmut sisimiuni tillinniartoqarsimaneranik nalunaaqutaq 03:53:

- Nalunaaruteqartup meeqqerivik saneqqullugu takuaa inuit pingasut tassanngaaniit arparlutik qimaguttut, taakkunannga ataaseq puussiamik tigumiarpoq, politiillu suliaq misissuiffigaat, maannalu inuk ataaseq pasineqarpoq.

Aqqusinermi eqqissiviilliortitsinerit

Maniitsumi aqqusinermi eqqissiviilliorneq nalunaarutigineqarpoq arfininngornermi nalunaaqutaq 20:03. 

- Inuk sanioqquttunut ersarissumik nipiliorluni eqqissiviilliortitsivoq. Politiit ornigupput inullu unitsillugu, taanna oqaluunneqarpoq qimagullunilu.

- Arfininngornerup unnukkuani kingusinnerusukkut Nuummi aamma aqqusinermi eqqissiviilliorneq nalunaaqutaq 22:57 nalunaarutigineqarpoq, inuk aqqusinermi eqqissiviilliortitsivoq, ilaatigut matunut kasuttoqattaarluni, politiit ornigupput eqqissiviilliornerlu unitsillugu.

Arfininngornermi sapaatillu akornanni unnukkut nal. 01:52 inuk biilimik ingerlatsisinnaanermik allagartaqanngitsoq unitsinneqarpoq:

- Inuup pineqartup biilinik ingerlatitseqqinnermut allagartaqarnini takutissinnaanngimmagu, taamaammallu biilimik ingerlatitsinnaanermut allagartaqarani biilersimasutut unnerluutigineqarpoq.

Nuummi politiit aqqusinermi eqqissiviilliorneq pillugu nalunaarfigineqarput:

- Nuummi tankbutikkip silataani inuk qunusaarisutut pissusilersorpoq politiillu ornigullutik eqqissiviilliornerlu unitsillugu.

- Nalunaaqutaq 03:58 Nuummi aqqusinermi eqqissiviilliorneq alla nalunaarutigineqarpoq, tassanilu angut arnarlu pisuinnaat aqqutaanni annertuumik nipiliorput politiit pisumut unitsitsiniarlutik orniguttariaqarlutik.

Politiinut saassussinermi qilanaat atorneqartoq

Nuummi politiit misigisaqarput, inuk imaluunniit inuit arlallit politeeqarfimmut qummoroortunik aallartitsisoqarmat:

- Inuit suli kinaassusersinngisagut nalunaaqutaq 05:45 qummoroortartunik aallartitsipput Nuummi politeeqarfik eqqorniarlugu. Tamanna soorunami akuersaarneqarsinnaanngilaq, taamaattumik misissuineq aallartipparput, taamak iliortut akisussaatinniarlugit, politiinut imaluunniit allamut qummoroortartut  atorneqarnissaat akuersaanngilarput, Kalaallit Nunaanni politiit nakkutilliisuisa pisortaat, Thomas Jeppesen, naqissusiivoq.