Folketingimut ilaasortaanikoq ukiuni 19-ini qineqqusaarnikuunani politikimut uteqqittoq
Atassutip folketingimut qinigassanngortitani tallimanngorpat saqqummiuppai, Folketingimilu ilaasortaanikoq Ellen Schärfe taakkua ilagaat.
Atassutip folketingimut qinigassanngortitani sisamat tallimanngormat tusagassiortunik katersortitsinermi saqqummiuppai. Saamerlermiit: partiip siulittaasua Aqqalu C. Jerimiassen, Bentiaraq Ottosen, Malu Ostermann, Orla Joelsen aamma Ellen Schärfe.
Assi: Arnaq Nielsen
Atassut Folketingimut qinersinissamut qinigassanngortitaminik saqqummiussisuni kingullersaalluni tallimanngornermi tusagassiortunik katersortivoq.
Qineqqusaartut Folketingimut ilaasortaasimasoq Ellen Schärfe (siornatigut Christoffersen) ilagaat.
Taanna Atassut tunuliaqutaralugu Folketingimut 1998-imi qinigaavoq, tassanilu piffissami sivisujaami ilaasortaalluni.
Partiip siulittaasua Aqqalu C. Jerimiassen Ellenip partiimit qinigassanngorteqqinneqarnera tulluusimaarutigalugu saqqummiussinermi oqarpoq.
- Inuusuttuullunga nammineq taanna qinernikuuara, partiimi siulittaasoq oqarpoq.
Partii katillugit sisamanik qinigassanngortitsivoq: Bentiaraq Ottosen, Malu Ostermann, Orla Joelsen aamma Ellen Schärfe.
- Naligiinnerulernissaq pisariaqartinneqartoq
Ellen Schärfe kingullermik Folketingimut 2007-imi qinigassanngortippoq, tassanilu 3.378-inik taaneqarluni ilaasortanngunngitsoorpoq.
Ellen Schärfe Folketingimut 2007-imi kingullermik qineqqusaarpoq.
Assi: Arnaq Nielsen
- Qineqqusaarnissara eqqarsaatigilluaqqaarpara, Folketingimili allannguinissamut peqataanissara uannut pingaaruteqarpoq, Ellen Schärfe Sermitsiamut oqarpoq.
Naalagaaffeqatigiinnermi naligiinnerusumik atugassaqartitsinissaq suli pisariaqartinneqartoq aamma oqaatigaa.
- Inuiaqatigiit aaqqissuussaanerat inatsisillu qallunaanut naleqqussakkat atorneqarput, taamaattumik ileqqutoqqatta, kulturitta inuiattullu kinaassusitta misissornissaat piffissanngorpoq.
- Naalagaaffeqatigiinnermut ilaagaluarluta assigiinngilluinnarpugut, oqarpoq.
Trumpip sunniuteqarnera
Ellen Schärfe naalagaaffeqatigiinnermi ataasiussuseqarnissaq maannakkut pingaaruteqartoq isumaqarpoq:
- Maannakkut ataqatigiinnerput nunatta ineriartortinnissaanut atorniassaa sulissutigissavarput, oqarpoq.
USA-p præsidentiata Donald Trumpip Kalaallit Nunaannik tiguaaniarluni soqutiginninnera sunnertissutigingaatsiarsimallugu folketingimut qinigassanngorteqqinniarluni aalajangerneranut pissutaaqataaqataasoq oqarpoq:
- Isiginnaaginnarusunngilanga. Ersiorusunngilanga. Akisussaaffimmik tiguseqataaniarpunga, oqarpoq.
