Folketingip Kalaallit Nunaata Savalimmiullu namminneq erfalasorlutik atorlugu OL-eqataasalernissaannut ikiorniarai

Kalaallit savalimmiormiullu timersortartut namminneq erfalasortik atorlugu OL-imi peqataasarsinnaanerat ukiorpassuarni kissaataavoq.

Folketingip siulittaasoqarfia suliaq taperserlugu maanna akuliuppoq.

Siulittaasoqarfiup nunat tamalaat OL-imut ataatsimiititaliaanut (IOC) ima kajumissaarisimanini tusagassiuutitigut nalunaarutigaa:

"Nunat taakkua nukittuunik namminersortunillu timersornikkut kinaassuseqarput. Siulittaasoqarfiup suliaq Savalimmiormiunut kalaallinullu, nunani tamalaani erfalasortik atorlugu unammisarfimmi annerpaami unammeqataanissamik takorluuisunut, pingaaruteqarluinnartoq tapersersorusuppaa,“ Folketingimi siulittaasoq Søren Gade suliaq pillugu oqarpoq.

Kajumissaarut piviusunngortinneqassapput timersortartut Savalimmiuneersut Kalaallillu Nunaanneersut OL-ip ammaanersiorneqarnerani, Savalimmiuni erfalasoq Merkið aamma Kalaallit Nunaanni Erfalasorput atussavaat.

Siulittaasup Kalaallit Nunaata Savalimmiullu nunani tamalaani unammiuaarnerni qaffasissumik angusaqarsinnaanertik takutinnikuugaat IOC-mut kaammattuuteqarnini tunngavilersuutigaa, soorlu Savalimmiut 2026-mi assammik arsarluni EM-imi peqataanera aamma kalaallit timersortartut OL-imi 2026-mi ukiuunerani peqataanerat.

Folketingimi ilaasortap nalunaarut nuannaarutigaa: Akuerineqarneq pingaarutilik

Nunat tamalaat suleqatigiinneranni peqataanerulerusullutik namminneq OL-imut peqataanissartik kissaatigigaat siulittaasup aamma oqaatigaa, kiisalu nunani tamalaani timersornikkut peqatgiiffinni arlalinni ilaasortaareernerat.

Folketingimi ilaasortap Naaja H. Nathanielsenip (IA) Folketingip siulittaasoqarfianit nalunaarut nuannaarutigaa. Nammineq erfalasoq sinnerlugu peqataasinnaaneq pingaaruteqartuusoq oqaatigaa:

“Kalaallit kinaassusaasa akuerineqarnerat pingaaruteqarpoq, aamma nammineerlutik peqataasinnaatitaanerisa naqissuserneqarnerat. Siulittaasoqarfiup suliaq tamanna tapersersormagu Inuit Ataqatigiinni nuannaarutigeqaarput, danskillu naalakkersuisuisa sulinissaminnut tunngavimminni suliap nanginneqarnissaa siunniummassuk,” Naaja H. Nathanielsen oqarpoq.

Folketingip siulittaasoqarfiata Savalimmiuni juunimi ataatsimeersuarnerani apeqqutip oqaluuserisassanut ilanngunneqarnera IOC-mut saaffiginninnermut pissutaavoq.