Franskit konsuliat nutaaq Nuummi sulilluni aallartippoq – sulili inissarsiorpoq

Jean-Noël Poirier Kalaallit Nunaanni franskit konsuliattut toqarneqarpoq ullumilu tallimanngornermi atuuffittaamini aallartilluni. Inissarli suli amigaatigaa.

Konsulip nutaap tusagassiortut Katuap saavani inuinnaat aqqutaanni naapippai.

Assi: Morten Okkels

Thomas Munk Veirum Thomas Munk Veirum Journalist

Saqqummersinneqarpoq 7. Februaari 2026 - 09:36

Ussassaarut

Frankrigi maanna Nuummi nutaamik konsuleqalerneratigut, Præsident Emmanuel Macronip neriorsuutaa februaarip arfernanni piviusunngorpoq.

Konsuli nutaaq Jean-Noël Poirierimik ateqarpoq tallimanngormallu pilersaarutit malillugit, Canadamit aallartitat, maanna illoqarfimmi namminneq konsualtiminnik ammaasut peqatigalugit Nuummut tikilluni.

Franskilli konsuliat suli konsulatissaqanngikkallarpoq. Franskit ininik sinniisoqarfimminnut naleqquttunik suli ujarlertut, oqaaseqartartup oqaatigaa.

Franskit nunanut allanut ministereqarfiat malillugu konsulatip nutaap kulturikkut, ilisimatusarnikkut aningaasaqarnikkullu Kalaallit Nunaata Frankrigillu attaveqaataannik ineriartortitsinissaq suliassaraa.

Jean-Noël Poirier siusinnerusukkut franskit Vietnamimi ambassadøreraat, taamatullu aamma Libyami aallartitatut atuussimalluni. Taanna pisortatigoortumik sapaatip akunnerani matumani siusinnerusukkut toqqarneqarpoq.

Ussassaarut

Franskit konsulatitaavat Emmanuel Macronip Nuummut ulloq 15. Juni 2025 tikeraarnermini neriorsuutigaa.

- Ilissinnut qaninnerujumalluta iligiumallusilu maani Nuummi nutaamik generalkonsulatimik ammaanissarput aalajangerparput, præsidenti taamani oqarpoq.

Frankrig siusinnerusukkut Krissie Berthelsen Winbergip honorær konsuliunerani sinniisoqarfeqarpoq.