GEUS-ip Qaanaap eqqaani nunap assinga sukumiisoq nutaaq saqqummersippaa
GEUS-ip Qaanaap eqqaani Nunatta Avannaata ukiuni 2,5 milliardinit amerlanerusuni nunap ineriartornera nunap assinngorlugu 1:100.000-tut angissusilimmik takussutissiaraa.
Ujarassiuut Qaanaami misissuinerisa, maanna GEUS-imit nunap assingatut suliarineqartumi, Issittup qanoq ililluni taama isikkoqalersimanera takutippaat.
Assersuusiaq: GEUS
Ujarassiuutut ukiuni qulikkuutaani misissuinerat nunamilu misissuinerit aallaavigalugit Thule-mik taaneqartartoq maannakkut assiliartalimmik pitsaalluinnartumik nunap asseqalerpoq.
- Nunap assingani ilisimatusarnikkut misissuinerit sivisuumik ingerlanneqartut ataqatigiissumik saqqummiunneqarput, nunallu assinga pillugu paasisaqarnerulissutigineqarluni, ilisimatusartoq Thomas Find Kokfelt GEUS-imeersoq tusagassiuutitigut nalunaarummi oqarpoq.
Sumiiffiit nunap assinganut nalunaarsorneqartut Kalaallit Nunaanni qaqqat pisoqaanersaannik sanaajupput, taakkualu ilaat makkununnga tunngassuteqarput:
Tunngaviusumik ilisimatusarneq
Issittumi nunataanik paasisaqarneruneq
Aatsitassarsiortoqarsinnaanneranut periarfissanik nalilersuinermi atorneqarsinnaasut
Issittup qanoq ililluni taama isikkoqalersimanera nunap sananeqaataanik misissuinikkut paasineqarsinnaavoq, taamaattumillu ilisimatusartut Issittoq ukiuni 2,5 milliardini misisissorneqarnikuunera pissutigalugu sumiiffik pingaarutilittut nalilerpaat.
Aatsitassarpassuit
Sumiiffimmi misissuiffigineqarsimasumi ilaatigut kanngussammik, ilmenitimik saviminermillu sulfideqarnera ilisimaneqartoq, aammattaaq kuulti aatsitassallu allat nassaarineqarsinnaasut paasissutissiissutigineqarpoq.
Qaanaami nunap assingi nutaat GEUS-ip saqqummersitassaasa arfinillit pingajuattut inissipput. "Nunap assingani taakkunani Kalaallit Nunaata avannaani ujarassiorneq sukumiisumik allaaserineqarpoq,“ ilisimatusartuuneq Thomas Find Kokfelt oqarpoq.
