Hans Enoksen eqqaaniarlugu Itillimi ilerrata ujarattaa napparneqarpoq

Hans Enoksen tallimanngorpat 70-nik ukioqalertussaagaluarpoq, nunaqarfianilu Itillimi ullormi tassani ilerrata ujarattassaa kusanarluinnartoq napparneqassasoq, Naleraq allappoq.

- Hans Enoksen nunatta illersorneqarnerani nipiusimavoq ersarissoq aalajaatsorlu, Naleraq ullormi Hans Enoksenip 70-inik ukioqalertussaaffiani allappoq.

Assi: Naleraq

Thomas Munk Veirum Thomas Munk Veirum Tusagassiortoq

Saqqummersinneqarpoq 7. Aggusti 2026 - 14:26

Ussassaarut

Politikeri nuimasoq maannalu toqukkut qimagussimalersoq Hans Enoksen ullumi 70-nik ukioqalertussaagaluarpoq.

Inunngorfiani Itillimi, taassuma ilerranut kusanartumik ujarattaliisoqassasoq, Partii Naleraq, Hans Enoksenip pilerseqataaffigisaa ukiorpassuarnilu siulittaasuuffigisaa taama nalunaaruteqarpoq.

- Taamaalilluta inuunerminik aallartiffiani maannalu qasuersaarfiani naassaanngitsumik ataqqinartumik eqqaamaneqassaaq.

– Hans taamaalilluni inunngorfimmini, maannalu qasuersaarfigisamini, ataqqinartumik ataavartumillu eqqaassutissaqalissaaq.

Hans Enoksen nunatta illersorneqarnerani nipiusimavoq ersarissoq aalajaatsorlu. Inuiattut, oqaatsivut kulturerpullu, nunaqarfiit, isorliunerusut, aalisartut piniartullu - kiisalu Kalaallit Nunaata siunissaa pillugu nammineq aalajangiisinnaatitaalernissarput - aalajaalluni illersortuarsimavai. Naleraq tusagassiuutinut nalunaarummi allappoq.

Ussassaarut

Hans Enoksenip ilaqutai, Itillimilu innuttaasut tamaasa partiip qamannga pisumik ullormut tamatumunnga atatillugu eqqaamavai.

Hans Enoksen 69-inik ukioqarluni siorna septembarimi toquvoq, Sisimiut eqqaanni nunaqarfimmini Itillimi nunaqarfimmi aqutsisutut 1987-mi ilaasortanngornermini politikkimut sulinera aallartippoq.