Hash timmisartoqarfimmi nassaarineqartoq, umiatsiamik aallarussisoqartoq illumilu ikuallattoqartoq

Kalaallit Nunaanni Politiit ulloq unnuarlu kingulleq arlalinnik suliaqarput.

Ikiaroornartumik hashimik marloriarluni nassaartoqarsimasoq pigaartut pisortaata Aputsiaq Hansenip oqaluttuaraa. Nassaarineqartup aappaa allakkatigut Nuummut nassiunneqarsimavoq, aappaalu Ilulissat mittarfiani nassaarineqarluni.

Ilulissani ilanngaaserisut arnap nassataani hashi 200 grammi nassaarisimavaat. Politiit nal. 17.15 nalunaarfigineqarput, arnarlu tigusarineqarlunilu suliamut atatillugu unnerluutigineqarpoq. Kingusinnerusukkut killisiorneqareerluni iperagaallunilu eqqartuussivimmi suliassanngortinneqassaaq.

Aammattaaq politiit 18-it inorlugit ukiulinnik videonik assinillu tiingasulersaarutinik nassaarsimasutut marlunngornermi pasisaqarput. Taakku oqarasuaammi angallattakkami qarasaasiamilu nassaarineqarlutillu politiit ataatsimik pasisaqarmata suliaq suli misissuiffigineqarpoq.

Uummannami umiatsiaq aallarunneqarsimasoq politiit marlunngornermi ullaakkut qulinut nalunaarfigineqarput.

Pisumi pasisaasoqarpoq, pasisallu angallammut matuersaat toqqorsimaffiani nassaarigamiuk angallat aallarussimagaa pigaartut naalagaat oqaluttuarpoq.

Tamatumunnga atatillugu innuttaasut umiatsiaminnut biiliminnullu matuersaatit sumiinnersut eqqumaffigineqqullugu kajumissaarpai.

Nalunaaqutaq 13.57 politiit paasissutissanik peqquserluttoqarsimasoq nalunaarfigineqarsimapput. Pisumi nalunaarutiginnittup inuk alla ikiortissarsiorfigaa, tamatumunngalu atatillugu inuk taanna pissutsinik atornerluisimallunilu nalunaarutiginnittup kontuanit aningaasanik tigusisimavoq.

Qaqortumi illu marlunngornermi unnukkut ikuallappoq. Politiit nalunaaqutaq 22.47 kalerrinneqarput. Ikuallannermi inunnik ajoqqusertoqanngilaq, politiillu ajutoornerunersoq piaaraluniluunniit ikuallatsitsisoqarsimanersoq maanna misissuipput.