Tikeraat nunanit allaneersut Kalaallit Nunaanneersullu Nuummi akunnittarfimmi Hotel Hans Egede A/S-imi unnuiffissat, ataatsimiittarfiit ataatsimeersuartarfiillu atorluarpaat.
Kalaallit Nunaanni illoqarfiit pingaarnersaanniittoq suliffeqarfik akunnittarfiusoq akileraarutit ilanngaatigereerlugit siorna aatsaat taama sinneqartoortigaaq, tassa 39 millionit koruuninik sinneqartooruteqarluni.
Tikeraat nunanit allaneersut Kalaallit Nunaanneersullu Nuummi akunnittarfimmi Hotel Hans Egede A/S-imi unnuiffissat, ataatsimiittarfiit ataatsimeersuartarfiillu atorluarpaat.
Kalaallit Nunaanni illoqarfiit pingaarnersaanniittoq suliffeqarfik akunnittarfiusoq akileraarutit ilanngaatigereerlugit siorna aatsaat taama sinneqartoortigaaq, tassa 39 millionit koruuninik sinneqartooruteqarluni.
- Suliffeqarfiup oqaluttuarisaanerani aatsaat taama sinneqartoortoqartigaaq, akunnittarfiutilik siulersuisuni siulittaasuusoq Helge Tang oqarpoq.
Aqutsisoqatigiit angusat naammaginartutut ilimagisanillu qaffasinnerungaartutut, Hotel Hans Egedep 2025-mut ukiumoortumik nalunaarusiaani oqaatigaat.
Siorna 89 millionit koruuninik isertitaqarput, ukiullu siuliani 51 millionit koruuninik isertitaqarlutik.
Paasissutissat CVR-imi nalunaarsorneqarnikuni takuneqarsinnaapput.
Suliffeqarfiup Nuummi akunnittarfiit Hotel Hans Egede aamma HHE Express pingaarnertut ingerlappai.
Nammineq aningaasaatit 64 millionit koruunit Nunami akunnittarfinni annersaasup Hotel Hans Egede A/S-ip 2025-p naanerani nammineq aningaasaatai 64 millionit koruuniupput, agguaqatigiissillugulu 73-inik sulisoqarluni.
Hotel Hans Egede A/S akunnittarfiutilimmiit ingerlalluartumiit Helge Tangimit erneraniillu Christian Loiborg Tangimit pigineqarpoq.
Ataataasup piginneqataassutit a-t tamaasa pigisarai, suliffeqarfissuarmilu aalajangiineri sunniuteqarluartuullutik. Ernerata piginneqataassutsit b-t tamaasa pigisarai, piviusumilu sunniuteqartuunani.
- Suliffeqarfik uanga pigivara, 2025-milu angusat naammagisimaarluinnarlugit, Helge Tang oqarpoq.
Akunnittarfiutillip 77-inik ukiullip inuussutissarsiortutut ukiorpassuarni suli sulinissani oqaatigaa.
Nuummi pisuttuaruit Helge Tang pisuloortoq immaqa naapissinnaavat.
Peqqissuunissalu siunertaralugu Nuummi ullut tamaasa takisuumik pisuttuartarpoq, ukiorpassuarnilu taanna ileqqoralugu.
- Suli siulersuisuni siulittaasutut sulilluarpunga, aamma pisortaaneq akunnittarfimmilu pisortaq pikkorissoq suleqatigaara.
Akunnittarfiup pisortaa Jørgen Bay-Kastrup Hotel Hans Egede A/S-imi 2014-imiilli sulivoq. Allatut oqaatigalugu ajorunnanngitsoq Helge Tang oqarpoq.
Kalaallit Nunaat ukkatarineqaqisoq - Nunat tamalaaniit mittarfik nutaaq, nunanit tamalaaniit timmisartut tikittalernerat minnerunngitsumillu USA-mi præsidentip taarserneqarnerata kingorna nunarsuarmi politikkikkut pissutsit Kalaallit Nunaannik malunnaatilimmik sammisaqarnerulernerat, assigiinngitsorpassuarnik siunertalinnik tikittoqartalerneranik kinguneqarpoq, aqutsisoqatigiit 2025-mut naatsorsuutinut ukiumoortumik nalunaarusiaminni allapput.
Helge Tang takornariat upernaakkut aasakkullu tikittut Nuummi akunnittarfinni unnuiumasut imaaginnavittut oqarpoq. Aamma nunaqavissut ilaatigut ataatsimiigiartut unnuiumasut ulapaartitsipput.
- Trumpip Kalaallit Nunaat pillugu oqaaserisai pissutigalugit, Kalaallit Nunaat nunarsuup sinnerani tusanngitsoorneqarsimanavianngilaq. Tusagassiortut assiliisartullu nunarsuarmi sumiiffinniit assigiinngitsuneersut ukiortaamiilli tiguaqqasutullusooq pivaatigut.
- 2025-mi aasakkut init tamakkerput, ukioq manna aamma taamaappoq, Helge Tang oqarpoq.
- 2025-mi angusat naammagisimaarluinnarpakka, Helge Tang oqarpoq. Taanna suliffeqarfimmi akunnittarfiutilimmut aalajangiisarnermigut sunniuteqarluartuuvoq.
Assi: Leiff Josefsen
Ukioq manna aamma sinneqartoorluarnissaq naatsorsuutigineqartoq Hotel Hans Egede A/S-ip akileraarutit suli ilanngaatiginagit 2025-mi sinneqartoorutai 24-28 millionit koruuniunissaat naatsorsuutigineqartoq, 2024-mut ukiumoortumik nalunaarusiami eqqaaneqarpoq.
Suliffeqarfik eqqaaneqareersutut Nuummi akunnittarfinnik marlunnik, Hotel Hans Egedemik aamma HHE Expressimik ingerlatsisoq, Polarbo ApS-imit akunnittarfiutai attartorpai. Polarbo Helge Tangip Bolette Juhlillu pigisaraat.
Aamma Hotel Hans Egede A/S-ip Nuummi Samuel Kleinschmidtvej 15-imiittoq HC Ejendomme Nuuk A/S-imit attartugaraa. Nuuk Hotel Apartments by HHE-mik taaguuteqarlutik inissiat akunnittarfiusut pequtillit inigigallarneqartartullu attartortinneqarput. HC Ejendomme Helge Tangimit Bolette Juhlimillu aamma pigineqarput.
Kalaallit Nunaanni akunnittarfiit annersaat Hotel Hans Egede 156-inik initalik Kalaallit Nunaanni akunnittarfiit annersaraat, marlunnik neriniartarfeqarlunilu ataatsimeersuartarfeqarpoq.
Akunnittarfik sisamanik ulloriaqartoq ataatsimeersuartarfiit, HHE Conference & Events-imik taaneqartartut, tallimanik ulloriaqarput. Akunnittarfik akikinnerusoq HHE Express 108-nik initalik pingasunik ulloriaqarpoq.
Christian Loiborg Tang 2024-mi piginneqataalerpoq, Helge Tangimiillu akunnittarfimmik kingornussisussatut sulilerluni. Helge Tangip suliani ernerminut ingerlateqqillugu suliffeqarfimmi pisortamut tullersortitut atorfinitsippaa.
Christian Loiborg Tangili pisortap tulliatut 2025-p naanerani soraarpoq, Tusassimilu ukioq manna februaarip aallaqqaataani tuniniaanermut pisortanngorluni.
Ukioq manna angusarissaarnissaq aamma naatsorsuutigineqartoq Hotel Hans Egede A/S-imi 2026-mi isertitat katillugit 85 millionit koruunit aamma 90 millionit koruunit akornanniinnissaat naatsorsuutigineqarpoq, akileraarutillu ilanngaatigereerlugit nalinginnaasumik 35 millionit koruunit aamma 40 millionit koruunit akornanniissangatinneqarlutik.
2026-mi suliat 2025-misut innissaat naatsorsuutigalugit taamatut ilimasuttoqarpoq, 2026-milu qaammatit siulliit suliarineqartut taamaaginnarnissaat aamma naatsorsuutigineqarluni.
- Nunarsuarmili politikkikkut nalorninartoqarnera pissutigalugu, ilaatigut timmisartunut orsussap akitsoraluttuinnarneranik kinguneqartumik, niuernitta allanngoriataarsinnaanera ilanngullugu oqaatigisariaqarparput, pisortaqatigiit 2025-mut ukiumoortumik nalunaarusiaminni allapput.
Helge Tang maanna aasaanerani sulinngiffeqarnermini Danmarkimiippoq, Nuummilu mittarfiup eqqaani nutaamik akunnittarfiliornissamik pilersaarutinik sivisuumik eqqarsaateqarluni.
Akunnittarfiliornialersaarnerli suli timitalerneqanngikkallarpoq.
- Aasaanerani sulinngiffeqareerlunga angerlanissannut utaqqitippara. Pilersaarutit piviusunngussanersut ukiaru paasinarsiumaarpoq, Helge Tang oqarpoq.
Akunnittarfiutilik taanna pillugu oqaaseqaqqikkusunngikkallarpoq. Nunarsuarmi politikikkut pissutsit ilaatigut nalorninarsinnaammata, taamaammallu Kalaallit Nunaanni aamma nalorninartoqarmat, pilersaarusiornissani uninngatikkallarpaa.
