ILINNIARNEQ
Ilinniagaq sorleq toqqartarneqassava?
Nunatsinni ilinniagaqarnissamut periarfissat amerliartuinnarput, sumilu ilinniarniarnerluni aalajangeruminaassinnaasarpoq. Uumassusililerisutut ilinniagaq nutaaq SILA, Illersornissaqarfiup Issittumi tunngaviusumik ilinniarfia imaluunniit immaqa sinersortaammi naalakkatut ilinniarneq? Sunaluunniit toqqaraluaraanni qinnuteqarnissamut piffissarititat eqqumaffiginissaat pingaaruteqarpoq.
Issittumi tunngaviusumik ilinniarfik ilinniartut amerlanerulersinnaaqqullugit allilerneqaqqippoq. 2024-mi 22-t ilinnialerput. 2025-mi 30-t ilinnialerput. Pilersaarut malillugu 2026-miit 50-it ilinnialersinnaassapput. Issittumi Sakkutooqarfik naapertorlugu „inissat 50-it inuttalerneqarnissaannut soqutiginnittoqarluarpoq“.
Assi: Trine Juncher Jørgensen
Ilinniarfippassuarni marsip aallaqqaataa qinnuteqaateqarnissamut killigititaasarpoq, ilinnialernissamullu qinnuteqartussaagaanni qinnuteqarnissamut kingusinaassanngikkaanni immaqalu ukioq ataaseq utaqqeqqissanngikkaanni qinnuteqarnissamut piffissarititaasup misissornissaa isumassatsialaavoq.
Ilinniarfimmik toqqaanermi assigiinngitsorpassuit eqqarsaatigineqartarput. Ilinniagaq aalajangersimasoq kisimi pineqanngilaq. Assersuutigalugu ilinniarfiup nammineq suleriaatsimut naleqquttup, nunap immikkoortuani sumiiffinnut allanut nuussinnaanerup aamma nunatsinni nunanilu allani ilinniagaqarnissamik kissaateqarnerup toqqarnissaat pingaaruteqarpoq.
Misilikkit Sunngu - Kalaallit Nunaanni ilinniagaqarnermut ilitsersuut
Qanoq
ingerlavigissanerlugu toqqassaviuk? Ilinniarnertuunngorniarfiit, inuussutissarsiutinut ilinniarfiit,
gymnasiami ilinniarfiit, qaffasinnerusumik ilinniarfiit imaluunniit piginnaanngorsarneq? periarfissarpassuaqarpoq
ilinniagaqarnissamut maani nunami Danmarkimilu.
Atuaruk www.sunngu.gl, tassani aamma ilinniagaqarnermut tapersersuineq, ilinniagaqarnermut taarsigassarsiat
il.il. ujarlerfigisinnaavat.
Ilinniakkanut najoqqutassiaq
Ilinniarfiit pillugit paasissutissiisarfik www.sunngu.gl iluaqutaalluarsinnaavoq. Tassani ilaatigut inuussutissarsiornermut tunngasunik ilinniagaqarneq, GUX-imi ilinniarneq, ilinniaqqiffiit pikkorissarnerillu pillugit paasisaqarnerusinnaavutit. Tamatuma saniatigut ilinniakkat tamarmik immikkoortunut agguataarneqarsimapput, taamaalillutit eqqissillutit ujarlersinnaallutit. Assersuutigalugu aalisarnermik imaatigulluunniit angallannermik soqutigisaqaruit ilinniagassat assigiinngitsut qulit paasisaqarfigisinnaavatit, soorlu aalisariutini naalakkatut, umiarsuarmi ikiortitut, kilisaammi qalulerinermi ikiortitut aqutsisutulluunniit aamma qalulerisutut ilinniakkanut tunngasut.
Issittumi tunngaviusumik ilinniagaqarneq inuusuttunit maannakkut nuannarineqarluarpoq.
Assi: Trine Juncher Jørgensen
Issittumi tunngaviusumik ilinniarneq
Kangerlussuarmi Issittumi tunngaviusumik ilinniarfik, Illersornissaqarfimmit neqeroorutigineqartoq, ilinniarfiit inuusuttunit soqutigineqaraluttuinnartut ilagaat.
Ilinniarfik qaammatini arfinilinni ingerlanneqassaaq, kingornalu qaammatit arfinillit angullugit siunissami qanoq pinissamik misilittaanissamik ingerlariaqqiffimmut qinnuteqartoqarsinnaalluni. Tassa katillugit ukiumik ataatsimik sivisussuseqassaaq. Sakkutuutut upalungaarsimanermullu tunngasunik suliassaqarnissaq pingaarnerussaaq. Ilinniareernermi Illersornissaqarfimmi ilinniaqqittoqarsinnaavoq.
Ilinniagaq 2024-mi siullermeerluni neqeroorutigineqarmalli ilinniartut ukiut tamaasa amerliartorput. 2024-mi ilinniartunut 22-nut inissaqarpoq. 2025-mi 30-nut ilaneqarput. Maannalu eqimattat pingasuullutik 50-it missaanniilersinnaapput.
Taamatut politikkikkut anguniagaqartoqarnissaa Illersornissamut ministereqarfiup Naalakkersuisullu januaarip naanerani nalunaarutigisimavaat.
Issittumi Sakkutooqarfik naapertorlugu „inissat 50-it inuttalerneqarnissaannut soqutiginnittoqarluarpoq“.
