Ilinniakkat qulit kalaallit oqaasii kisiisa atorlugit naammassineqarsinnaapput

Innuttaasut kalaallisuinnaq oqaasillit ilinniarnissamut killilinnik taamaallaat periarfissaqarput. Taamaattoq ilinniartitaanernik allamiut oqaasiinik piginnaasaqarnani naammassineqarsinnaasunik peqartoq, naalakkersuisoq Naleqqamut akissummini ilisimatitsivoq.

Kalaallisuuliornermik ilinniarneq kalaallit oqaasiinit allaanerusunik ilisimasaqarnissamik piumasaqaatitaqanngitsut ikittut ilagaat.

Assi: Martin N Johansen/Biofoto/Ritzau Scanpix

Morten Okkels Morten Okkels Journalist

Saqqummersinneqarpoq 9. Aggusti 2026 - 14:09

Kalaallit Nunaanni ingerlaqqiffiusumik ilinniakkamik danskit tuluilluunniit oqaasii ilanngunnagit kalaallisuinnaq ingerlanneqarsinnaasoqanngilaq.

Ilinniartitaanernilli kalaallit oqaasii atorlugit naammassineqarsinnaasunik peqarpoq. Taama ilinniartitaanermut naalakkersuisoq Nivi Olsen (D) Inatsisartunut ilaasortamut Jens Napãtôĸ (N) akissummini ilisimatitsivoq.

– Inuussutissarsiornermi ilinniartitaanernut tunngatillugu, ilinniakkat qulit kalaallit oqaasii kisiisa atorlugit naammassineqarsinnaapput.

Ussassaarut

Campus Kujallermi TNI- Pinnersaasersuuserisunngorniarneq, Pisiniarfimmiunngorniarneq Flexilu neqeroorutaapput.

Peqqissaarnermik Ilinniarfimmi ikorfartortinut, peqqinnissaqarfimmi sulisutut peqqinnissaqarfimmilu ikiortitut kalaallisut ilinniartitsinerit neqeroorutaapput.

Perorsaanermik Ilinniarfimmi ulluunerani neqeroorutini sulisunut, siunnersortinut assistentinut isumaginninnermilu ikiortitut ilinniartitaanerit kalaallisut ingerlanneqarsinnaapput.

Periarfissat qulingat tassaavoq kalaallisuuliornermi ilinniarfik Sisimiuniittoq.

Ilinniarfiit kalaallisut atuartitsinermut naleqquttunik atortussianik amigaateqarneq immikkut unammillernartitarigaat, Naalakkersuisoq itisiliilluni ilisimatitsivoq.