Ilinniartut Savalimmiormiut kalaallillu atuanngiffeqarnermi skolehjemmimiiginnarsinnaalissasut

Savalimmiormiut kalaallillu inuussutissarsiornermik ilinniagaqartut atuanngiffeqarnermi nalliuttunilu atuarfimminni skolehjemmimiiginnarnissaminnut periarfissaqalerput. Meeqqanut Ilinniartitaanermullu Naalakkersuisoqarfik taamatut tusagassiutitigut nalunaaruteqarpoq.

Ilinniartut inuussutissarsiutitigut ilinniarfimmut ungasissumiittumut ilinniariartartut ullumikkut skolehjemmimi najugaqarnissamut periarfissaqareerput, taakkualu amerlanerpaartaat sapaatip-akunnerata naanerani unnuisinnaapput.

Maannakkut ilinniartut aasaanerani atuanngiffeqarnerat kisiat pinnagu atuanngiffeqarnerni allani tamani atuutilissaaq.

- Savalimmiunit Kalaallillu Nunaannit ilinniariartut atuanngiffeqarnerminni nalliuttuniluunniit allamik najugassarsiornermut piffissaq aningaasallu atussanngilaat. Suliniut tamanna iluaqutigalugu siunissami Savalimmiuniit Kalaallit Nunaanniillu ilinniarsimasut amerlanerulernissaat neriuutigaara, meeqqanut ilinniartitaanermullu ministeri Mattias Tesfaye (S) oqarpoq.

Skolehjemmit Savalimmiuneersunik Kalaallillu Nunaanneersunik inisimasullit ulluni taakkunani ammanissaminnut tapiiffigineqarnissamut periarfissaqalissapput. Tapiissutinik pissagunik atuanngiffeqarnermi nalliuttunilu ammasarnissaat piumasaqaataavoq.

Suliniut tamanna danskit naalakkersuisuisa Folketingimilu amerlanerussuteqartut maajimi 2025-mi isumaqatigiissutaannut ilaavoq. Aaqqissuussamut 2026-miit atuutilersussamut 2,5 millionit koruunit immikkoortinneqarsimapput.

Aningaasatigut tapiissutit 2,5 millionit koruuniusut saniatigut nunami skolehjemminut isernissamut periarfissat aamma annertusineqarput.

Ilinniartut 45 minutsit atuariartorlutik angalasartut maanna akuerisaasinnaalerput, siornatigut minnerpaamik akunneq ataaseq minutsillu 15-it ilinniarfimmut atuariartortartussat kisimik akuerisaasaraluarput.

Aammattaaq atuartut sivisuumik angalasartussat weekendimi unnuisinnaasassasut Danmarkimi Meeqqanut Ilinniartitaanermullu Naalakkersuisoqarfiup kajumissaarutigaa.

Kajumissaarut skolehjemminut tamanut, ilinniartunik Savalimmiormiunik kalaallinillu inisimasoqartunuinnaanngitsoq, atuuppoq.

/ritzau/