Ilisimatusartoq Trumpip iliuusaanut:
- Tunuaallalluni pisut ataatsimut qiviartariaqarput – Trump naalagaarusuppoq

USA-p præsidentia Donald Trump Kalaallit Nunaannut soqutiginninnini pillugu qaammatini arlalinni nipaarlooreerluni ataasinngornerup unnuaani nutaarsiassaqalerpoq.

Donald Trumpip nunarsuup kitaata affaani eqqissisimasoqarnissaanik kissaateqarnera, Kalaallit Nunaatalu tiguarusunneranik kissaateqarnera allanngoqqinnavianngitsoq, DIIS-imi ilisimatusartuuneq Ulrik Pram Gad Sermitsiamut oqarpoq.

Taama oqariartuuteqarnerani piffissaq nalileruminaappoq, ilisimatusartulli præsidentip suna siunertarineraa qularinngilaa:

- Immaqa susassaaleqisimavoq, immaqa arlaannik eqqaasaqarsimavoq immaqaluunniit USA-mi nutaarsiassani pingaarnersiuineq sunnerniarsarivaa. Kia ilisimavaa.

- Pisut taama sukkatigisut taamarujuk soqutigiunnaartariaqarpagut. Maanna nalunngilarput Kalaallit Nunaat tiguarusukkaa. Pigerusunneruaa, aamma Kalaallit Nunaat aqukkusuppaa taamaalilluni Kalaallit Nunaanniit iliuuserineqartut USA-p isumannaatsuunissaanut aarlerinartorsiorsiortitsisinnaajunnaarsikkusullugit, Ulrik Pram Gad oqarpoq, nangillunilu:

- Politikkikkut iliuuserisartagai aalassatitsiniarnerusartut aamma nalunngilarput. Taamatut periaaseqarpoq, inuit qulalersinniartarpai.

- Trumpip nunarsuaq allatut isigaa

Donald Trumpip nalunaaruteqarnera USA-p qanittukkut nunami isumannaallisaanermut periusissiamik nutaamik saqqummiussinerata kingorna pivoq, Ulrik Pram Gadillu Kalaallit Nunaannut immikkut aallartitaqalernermik nalunaarut periusissiamut tamatumunnga tulluartoq oqaatigaa:

- Nunap immikkoortuanik annertusaaneq imaluunniit Kalaallit Nunaat periusissiami eqqaaneqanngimmat ilaasa eqqissiallaatigaat, allassimavorli USA-p nunarsuup kitaa aqukkusukkaa, oqarpoq.

Ulrik Pram Gad annikitsualuit iliuuserisassallu kisiisa isiginiarneri naammanngitsut isumaqarpoq, tunuaallallunilu pisut ataatsimut isigineqartariaqarnerarlugit:

- Trumpip nunarsuaq ukiuni 70-80-ini sungiusimasatsinnit allaanerusumik isigaa. Inuiaqatigiit pisinnaatitaaffii, namminneq aalajangiisinnaatitaaneq nunallu oqartussaassuseqarnera soqutigivallaanngilai. Naalagaaginnarusuppoq, politikkikkullu annaasaqaatigissanngikkuniuk taamaaliorsinnaalluni, Ulrik Pram Gad oqarpoq.

Sukannernerusumik inissinneqassasoq

Kalaallit Nunaata Kunngeqarfiullu politikkikkut iliuusissaat qanoq isumaqarfigaagit?

- Marlunnik iliuuseqartoqarsinnaavoq. Trump illuatungaannarsorluni iliuuseqaraangat sakkorunerusumik inissinneqarsinnaavoq. Oqariartuuteqarneq sukanganerulersillugu; Naamik, amerikamiorusunngilagut, Ulrik Pram Gad oqarpoq, nangipporlu:

- Oqaatigisaqattaarneratigut Donald Trumpip illuatungaannarsornerani sakkortunerusumik kignuneqarsinnaalersinnaavoq.

Trumpip nunamini kalaallit Amerikamiusunngorusuttutut saqqummiutissannginnerat pingaaruteqartoq, ilisimatusartoq oqarpoq.

Peqqissaartoqarunnanngilaq

Donald Trumpip isumaqatigiinngissutit pillugit oqaloqatigisarnissaa pingaaruteqartoq, ilisimatusartoq aamma isumaqarpoq:

- Naalakkersuisut, danskit naalakkersuisui amerikamiullu illersornissamut aningaasaleeqataanissaq pillugu isumaqatigiippasipput, tamannalu piviusunngortinneqassappat USA-p iliuuseqarnissaanut pissutissaqarpallaanngilaq, Ulrik Pram Gad naliliivoq.

Donald Trumpimulli attaveqarneq ajornanngitsuunissaa peqqissaartuunissaalu ilisimatusartup ilimaginngilaa.

- Kalaallit Nunaat tiguarusullugu anguniagaqarami taamatut ingerlaannassaaq, tamannalu Kalaallit Nunaata, Danmarkip Europallu akueriunnanngilaat. Tamanna inuiaqatigiit namminneq aalajangiisinnaatitaanerannik naalagaaffiillu oqartussaanerannik unioqqutitsinerussaaq. Akuerineqarunnanngilarlu, Ulrik Pram Gad oqarpoq.