Ilisimatusartut MIO-llu atuarfik pillugu inatsisissatut siunnersuut suli ernumanartoqartippaat

Meeqqat atuarfiannik allannguinissamik inatsisissatut siunnersuut Inatsisartut pingasunngorpat oqaluuserisassaat ilisimatusartunit meeqqallu pisinnaatitaaffii pillugit suliaqarfimmiit MIO-mit mianersoqqussutigineqarpoq. Inatsisissatut siunnersuumi allannguutissat pingaarutillit pineqarput.

Meeqqat atuarfianni nukarlerni (1. klassimiit 3. klassimut) nalunaaquttap akunneri ullullu atuartitsiffiusut ikilineqarnissaat inatsissatut siunnersuutigineqarpoq. Tamatumalu kingunerisaanik aamma atuartitsissutit ikilisinneqassapput. Meeqqat atuarfianni nukarlerni kalaallisut atuartitsineq annertusineqassaaq, qallunaatullu tuluttut atuartitsineq aatsaat 4. klassimiit aallartinneqartalissallutik.

MIO-p siunnersuut suliarineqarneralu isornartorsiorpai. Inatsisissatut siunnersuummik suliaqarnermi Ilisimatusarfik, meeqqat ilisimatusarnermut peqataatinneqarlutillu meeqqallu atuarfiannik ilisimasaqarluartoq, qanimut suleqatigineqarsimasaraluartoq MIO-mit tikkuarneqarpoq.

Ukiut atuarfiusup sivikillinera meeqqanut pisariaqartitsinerpaanut eqquissaaq

Meeqqat atuarfianni ukiumi atuarfiusumi ulluni 200-ni atuartitsisarnerup 180-inut ikilisinneqarnissaanut siunnersuut pisinnaatitaaffiit pillugit suliaqarfimmiit isumaqatigineqanngilaq:

- Meeqqanut amerlasuunut atuarfik tassaavoq orniguffik aaqqissuulluagaq, ataatsimoorfiusoq, ilikkariaatsinik ajunngitsunik neqeroortoq inersimasunillu aalajaatsunik sulisulik. Ukioq atuarfiusoq naannerulissappat meeqqanut annertuumik assigiinngitsutigut eqquisussaavoq, tamatumani meeqqat ulluinnarni eqqissimasumik sinaakkutissaqarnissamik atorfissaqartitsinerpaat eqqugaanerpaasussaallutik, MIO Naalakkersuisunut inatsisissatut siunnersuut pillugu allakkani ammasumi allappoq.

MIO-p siunnersuutip ajornartorsiutit tunngaviusut, soorlu ilinniartitsisussaaleqineq atuartitsissutinillu pitsaasunik amigaateqarneq, iliuuseqarfigineqannginnerat aamma aarleqqutigaa:

- Ilisimatusarfimmit nutaanerusumik ilisimatusarnerup takutippaat nunatsinni sumiiffinni arlaanni ilinniartitsisut amigaataanerat kiisalu atuartitsinerup pitsaassusii unammillernartut.Tamanna pissutigerpiarlugu MIO-p maqaasivaa, atuarfimmik aaqqissuuseqqinnermi ajornartorsiutit sorlai sammineqanngimmata: Ilinniartitsisunik pikkorissunik naammattunik pissarsinissarput qanoq qulakkeerneqassava? Atuartitsineq qanoq nukittorsassavarput? Atuarfiit tamarmik qanoq ililluta atuartitsinermut atortussanik pitsaasunik peqarnissaat qulakkiissavarput?, pisinnaatitaaffiit pillugit suliaqarfik aperaaq.

Ilisimatusartut ajornartorsiuterpassuit tikkuarpaat

Ilisimatusartut ukioq manna siusinnerusukkut tusarniaanermi siunnersuut isornartorsiorpaat. Isumaqatiginngissaasa ilaat tusaaniarneqarsimagaluartut suli qularisaqaqalutik Sermitsiamut allakkatigut akissuteqarlutik isummerput.

Ilisimatusartut tassaapput lektori Lars Demant-Poort, adjunkti Louise Pindstrup Scavenius, professori Rikke Ørngreen, instituttimi pisortaq Britta Lohmann, adjunkti Ivalo Mathiassen aamma ph.d.-nngorniartoq Kirsten Føns.

• Kommunit meeqqat atuarfiini ullunik atuartitsiffiusunik 200-nit 180-inut ikilisitsisinnaanngorneq atorluassappassuk 1-3 klassit sapaatip-akunneri sisamat missaanni atuanngiffeqarnerulernissaat ernummatigaarput.
• Meeqqat ilisimassutsikkut ineriartornerat ernummartigaarput. Ilisimatusartut inatsit malillugu oqaatsit ataasiinnaat atorlugit – kalaallisut – ilinniartitsisoqartalissammat taama isumaqarput. Misissuinerit meeqqat ilisimasaqarnikkut ineriartornerat – tassa eqqarsartaasii – oqaatsit arlallit atorlugit ilinniartitsisoqartartillugu pitsaanerusumik ineriartortartut takutippaat.
• Meeqqat atuarfiini nukarlerni pinngortitalerineq peerneqarpat meeqqat alapernaassusiannut pinngortitamillu paasinnissinnaaneranut qanoq sunniuteqassanersoq ernummatigaarput. Pinngortitalerineq ilisimatuussutsikkut kulturikkullu piginnaanerit ineriartortinnissaannut pingaaruteqartoq misissuinerit takutippaat.
• Nipilersorneq pillugu atuartitsinerit sisamat ataatsimut kattunneqarnerat meeqqat pinngorartitsisinnaanikkut ineriartornerannut qanoq kinguneqassanersoq ernummatigaarput.
• Allannguutissatut siunnersuutit sukkavallaamik atuarfimmilu tamarmi naammattumik isumaliutigineqarani piviusunngortinneqarnissaat ernummatigaarput.

Siunnersuummik allamik nassiussisut

Ilisimatusartut Ilinniartitsinermik Ilisimatusarfiup misissuineri, aamma nunani tamalaani ilisimatuussutsikkut misissuinernit akuerineqartunit ernummatitik aallaaveqartut naqissuserpaat.

Ilisimatusartut politikkerit inatsisit atuutereersut aallaavigalugit meeqqat atuarfianni nukarlerni ullup atuarfiusup pisariillisarneqarsinnaanera aamma siunnersuutigaat. Ilaatigut sammisat immikkoortunut tallimanut katersorneqarsinnaapput, sapaatillu-akunnerata ingerlanerani sammisat amerlanerpaamik marluk atuartitsissutigineqarsinnaallutik.

Siunnersuut Naalakkersuisunut ukioq manna siusinnerusukkut nassiunneqarsimasoq ilisimatusartut paasissutissiissutigaat.