Ilisimatusartut Qeqqata eqqaani umiarsuup umiusimasinnaanera misissorpaat
Ilisimatusartut aarrit tuugaavi aappalaartunik qalipanneqarsimasut aallaavigalugit Sarfannguit eqqaanni vikingit umiarsuaannik umiusoqarsimaneranik ilimatsaassaqarput. Naak umiusoqarsimaneranik takussutissaasinnaasunik suli nassaartoqanngitsoq ilisimatusartut ujartuiuarsinnarput.
Qeqertami skakimi inuttamik nassaartoqarnikuuvoq, kingusinnerusukkut kunngikkormiut 1952-imi Kalaallit Nunaannut tikeraarnerata nalaani Dronning Ingridimut tunissutigineqarluni. Ilimagineqarpoq skakimi inuttaq vikingit nalaanni qiperorneqarsimasoq. Taannalu maannakkut Danmarkimi Nationalmuseet-imiisinneqarpoq.
Assi: Arctic Hub
Ilisimatusartut David Gregoryp aamma Andreas Kallmeyer Blochip vikingit Norgemiut umiarsuaat Iterlassuatsiaani umiusimasinnaasoq misissorniarpaat.
Arctic Hub taama allappoq.
Sisimiuni sanaartornermut sioqqanik assaasilluni Sarfannguit eqqaanni Qeqertami Ikertuumi immami arlalinnik nassaartoqarsimavoq.
- Sanaartornermi sioqqanik assaasillutik qisuit umiarsuarsuup sannaatut isikkoqartut aarrillu saarngit aappalaartumik qalipaatillit nassaaraat, David Gregory Danmarkimi Nationalmuseet-imi pisortaasoq Sermitsiamut oqarpoq.
Aarrit tuugaavi aappalaartunik qalipanneqarsimammata vikingit nalaanni Skandinaviami tunisassiassaasut ilisimatusartut ilimagaat.
Taamaattumik David Gregoryp Andreas Kallmeyer Blochillu umiarsuarmik umiusoqarsimasainnaanera ilimagaat.
Navianartorsiorujussuarneq iluanaarnartoq
Taamaattumik ukiut pingasut matuma siorna nassaarineqartut suminngaanneernersut paasiniarlugu misissuipput.
- Sioqqanik assaavigineqarsimasumi, immap naqqa manissuinnaanngitsoq takusinnaavarput, taamaasillunilu sumiiffik nassaareqqipparput. Dronemillu aqqartilluta immap naqqani soqarnersoq takusinnaanngilarput, David Gregory oqarpoq.
Tamannali ilisimatusartunit tunuarterfigineqanngilaq. Pilersaarutaavoq atortorissaarutit pitsaanerusut atorlugit maajimi uteqqinnissaat, piffissaqarnerulissallutillu immap naqqani umiarsuup umiuffigisinnaasaani 100 meterisut takitigisumi 100 meterisullu silitsigisumi misissuiffigineqarnissaa.
- Taamaattumik navianartorsioqqajaanissaq annikitsuararsuuvoq iluatsitsilluarnikkut pissarsiaqarnartorujussuulluni, David Gregory oqarpoq.
Umiusoqarsimaneeranik ilimatsaassaqarnertik ilumoorpat, David Gregoryp neriuutigaa septembarimi imaanut aqqarlutik misissuinissamut uteqqissallutik.
Innuttaasut peqataatinneqarnerat
David Gregory aamma Andreas Kallmeyer Bloch novembarimi Science Week-ip nalaani Kalaallit Nunaannut tikeraarput, Sarfannguanilu najugaqartut naapippaat.
Ilisimatusartut nunaqavissut peqataatinnissaat pingaartippaat.
- Uagut umiarsuarinngilarput. Neriuutigaarput inuit tassani najugallit misissuinitsinnut peqataatissinnaallugit, ilisimasarpassuaqaraluarluta qimaannannginniassagatsigit.
Sisimiuni innuttaasut Nunattalu Katersugaasivia oqaloqatigereerpaat, taakkualu tamarmik suliniut soqutigilluinnarpaat.
- Maannamut umiarsuarmik umiusimasumik nassaartoqarsimanngisaannarpoq, taamaattumik Kalaallit Nunaata oqaluttuarisaanerani soqutiginaateqassasoq isumaqarpunga, David Gregory oqarpoq.
